Read Alladian TOMLÍKNAM 12 Bible Online

TOMLÍKNAM 12 - Alladian bible

TOMLÍKNAM 12

¹Dekepe idudelo, Herod Rojade mondoli lokke amiem iréépe emla, bulum ayoko umto.

²Bí Joanke bíro Jems me yoksalok pakamoto.

³Sikepe inamsi Judai kídíem aipe míímodo emla kaayédem, bí Pitor meteng umpe emla enbomto. Depe idude siiyé líkmanam ettíng doman dodíe.

⁴Pitorme umpala, bí bím pateklo líkla midum appipe ila sipaying opéé appiko bím kaabom dope melíkto. Herodke míínamde bím Gíbong gíídí irongem ami takam kangkolo bisar ipe emla ito.

⁵Dekepe iname Pitorme pateklo líkto, idakkom mondolie bíkke legape ankírupe Shédíkíng kumto.

⁶Herodke bím bisar pekolo bomadí yume kerape, Pitor bí alaglok íkoli annyiem gedula, sipaying annyi pénsamlo kedduai, delokke eyablo sontori kídíe dakbomto.

⁷Menang asak Ruutumke teyong kotoki kone aala patek delo angune nguntít bomkai. Bí Pitorme arotkon delok pila pingutto. “Menape, gereptola,” emla bí poduem íkolie Pitorke lakkitlok olet sukai.

⁸Delokrongem teyong kotokide bím pokai, “Nokke ege galugem lang leyugem getola,” emla bím teyong kotokide poto.

⁹Pitor bí patek luyudelo bíkkíng gímín getoku; idakkom teyong kotoki inamde arokuadí dem bí atí kénsumato.

¹⁰Bulu kerang sontoriem gíbong langaala taonlo delokke arem gét delo pííto. De agísue bulum siyya subikai, delo bulu delok gíto. Bulu bedang kolok mootengko gíyédem, menang asak teyong kotokide bím petom mepala gíkaku.

¹¹Delokrongem Pitor bí agísue kénsu langkula poto, “Ruutummin bíkke teyong kotokiem melíkla Herodke alag loklang Judai takamke míínam tabulok ngom iturtoku emla, supak ngo atí mííne míngo kamape berokpe kénkaku.”

¹²Bí dem legadem kénsu yékudelo, Joan Markke ane Marike ekumlo aato, delo deddína amie dumsula kumdungai.

¹³Pitor bí luyuke eyabdelo aala pigato, delo Roda emnam béérang mimekoko eyabdelo kaape emla lento.

¹⁴Bí Pitorke agomem tatkén yédem, bí ashérunge ikane eyabem siyya bimape duklat sulangkula, “Pitor bí lamgési dakdung!” emla pokanto.

¹⁵“No aapí dungkollo duuyimang” emla bulu bím lugooto. Edílo bí arorunge emla pogaptodí, bulu “De bíkke teyong kotokiepe” emla manbosuto.

¹⁶Idakkom Pitor bí piga gatíto, delo eyabem siyya yédem bím kaala kaalom suto.

¹⁷Pitor bí bíkke alaglok bulum asoope emla ruuto delokke kape kísa Ruutum bí pateklokke laalen tokudí dem legadem pokansuto. “Jems melang bíro kídíem pokan bilangka” emla bí popala delokrongem rego konlo gíto.

¹⁸Rohdem sipaying kídí aralo sengéépe ebín bosukai. “Pitor bí kape ikan?” emla manbosuto.

¹⁹Herod bí Pitorme matamoto idola bím pangku mala, bí sontori kídídem ínggapto delokke bulum mokadope hukum bito. Delokrongem Herod bí Judai lokke gílangala Kaisarialo gíto delokke delo anyongko duuto.

²⁰Bí Tur kelang Sidon lokke ami kídíem akmínsuto, dekepe iname bulu atelkope Herodme kaarík supe emla gíbosuto. Kerape bulu Blastome agídanpe sotlento. Blasto bí roja lokke míngke sunam béérang kuai. Delokrongem bulu Herodkíng gíla bulukíng aibosu dokupe roguto, kapeila roja among delok buluke doolunge donamem paadungai.

²¹Méélamdem aipe pobosudí longedelo, Herod bí roja ege galugem gela roja palelo duudola ami kídíem kebang luboto.

²²Ami kídíde dem talla erbomdola poto, “Si tanike agommang, Shédíke agomemino.”

²³Herod bí Shédíme yidge mangkolok, menang asak Ruutumke teyong kotoki kone bím tarí iketto, delo bím tapume dola sikai.

²⁴Idakkom Shédíke agome pakyape gooyala byargooto.

²⁵Barnabalang Saul bínyi buluke mííbomnam agérdem irodem, bínyikíng Joan Markme gíbo langkula Jirusalemlo gílat sutoku.