Read Alladian TOMLÍKNAM 13 Bible Online

TOMLÍKNAM 13 - Alladian bible

TOMLÍKNAM 13

¹Antiok mondolilo mirie kelang luyilsuna kídí eke: Barnaba, yorana emnam Simeon, Kureni lokke Lukio, Galil lokke gobornorpe ina Herodkíng lekope usaa bosunam Manaen, delokke Saul bulu dungai.

²Bulu Ruutumme dobom tííbom suyimape kumla duudungem, Deena Aide pokai, “Barnaba melang Saulme ngokke bínyim tomlíkko amolo mengu sulangka.”

³Dekepe iname bulu doma tíímape kumge yéla, bínyim bulu alage leetanla kumlík geyéla melento.

⁴Annyidem Deena Aide ullík kolok bulu Seleukilo gíto, delokke ila Kuprio taonlo yudato.

⁵Bulu Salamilo pííyédem, Shédíke agomem Judai kídíke kumkeng ekumlo pokan gooto. Bínyim agér igulnape Joan Markme bínyikíng yémoto.

⁶Bulu Papho doolulo píímang tetengem asi raadalo duuna doolung kídílo gígooto. Delo bulu Bar-Jisu emsuna montrong ina delokke mena kotokiko kaaríksuto.

⁷Bí gobonorpe ina Sergio Paulke nebíípe idungai. Milo aro gobonorde Barnaba melang Saulme tomdope melíkto kapeila bí Shédíke agomem tallíto.

⁸Idakkom montrong ina Eluma (Griklo dekepe bíkke amíne kadung) bí bulum akla gobornordem míngke sumo pemang emla ralbomto.

⁹Delokrongem Paul emlate mínnam, Saul bí, Deena Aidlok bíísétla Eluma me kanggap bomdola pokai,

¹⁰“Nomino uyulokke ue delokke aina atí takam lokke mirue! No deddína atí atímana melí yaddong agér mílílo yédung. No Ruutumke aina bedangem edílokom meyimape itum yénía?

¹¹Supak Ruutumke alage nokkíng píídak. No mingma daknamoko, delokke anyongko no doonyi angunem kaapa yimape iyé.” Menang asak kaamo amuge bíkke amiglo angkai, delo bí memgosula, alaglok gakbom pena ami matato.

¹²Gobornorde dekepe inamdem kaarodem bí arope míngkesuto; legade Ruutumke poyilem tatla bí irisinyope mííto.

¹³Paullang bíkke angong kídíe Papholok yudla Pamphilia lokke Perga taonlo yudaato, Joan Mark bídan bulum mepala Jirusalempe enlat sutoku.

¹⁴Perga lokke gílangala bulu Pisidiake Antioklo gíto. Sabbath longelo bulu kumkeng ekumlo aala duuto.

¹⁵Ayon kitab emlang polu poor kitabem pori rongem kumkeng ekum ruutum kídíe, “Bírokídíe, nolu ami kídíem luír poír penam ngiitom kadumílo, potola,” emla bulum poto.

¹⁶Paul bí, bíkke alage beleng líkdola poto: Israel lokke amikídí delokke Shédíme kumna Mipak kídía ngokke agomem tatgap langka!

¹⁷Israel ami kídíke Shédí bí ngoluke abu kídíem ullento delokke ami kídíem buluke Ijiptlo duudungem jémoto, botteruna pauarlok bí bulum Ijipt amolokke gílen botoku

¹⁸delokke buluke akor siorem mooruk amolo tagying appi kopekai jémgeto.

¹⁹Bí Kanaanlo opín kínítko nyokmo toku delokke buluke duubomnam amongem bíkke ami kídíe duubomdope bito.

²⁰Si takamsi dítag língko appi kolang tagying pilngolo ito. “Sok méélamlo, Shédí bí bulum Kaaluna miri Samuelke píímang adape bisarnem bito.

²¹Delokrongem ami kídíe rojako matato, delo Kishke oo Saulme bí bulum bito. Bí Benjaminke adong lokke tagying appiko yéboto.

²²Saulme langgé palangkula, bí Dabidke legangem pokansuto; ‘Ngo ngokke mííbanam ami Jesséke oo Dabidme paatung; ngokke ipe emla míínam takamem bí iboyé.’

²³Sok amisok otíng oyine, bíkke pébisunam kísape, Mopít bokuna Jisume Israello oto.

²⁴Jisuke píímang adape, míílat sukupenam emlang delokke Israel ami takamke baptis ipenamem Joan bí poyilto.

²⁵Joan agíke agérem iyindola poto, ‘Ngom séko emla nolu míídun? Ngo bímang. Idakkom bí ngokke méélampe píídak, bíkke leyugem ngo yukbínpete ibamane.’

²⁶“Abrahamke ome-oo, bírokídía, delokke Shédíme pesona Mipak kídía, turge nana agom sim ngolukímin melíktune.

²⁷Jirusalem lokke amikídíe delokke buluke ruutum kídíe Jisume kangkén mato, depe idola bím mepak namde Sabbath longe mipílo porinam kaaluna miri kídíke agomem bulu apíí motung.

²⁸Bím moka nana aro hakii paamato, ilate Pilatme bím petdope lulíkto.

²⁹Bulu bíkke legang atnam takamem igeyédem bím esiilok laayi langkula agokolo yuto.

³⁰Idakkom Shédí bí bím sikolokke kiireptoku,

³¹delokke deddína longem bíkkíng Galil lokke Jirusalemlo bedang enbosuna kídíe bím kaato. Bulu ngoluke ami kídílo hakiipe supak dung.

³²Ngolu nolum tatpona dooyingem pobidung: Shédí bí ingkuem ngoluke abu kídílo pébi sutuadí dem

³³bí buluke ome-oo kídí legape Jisume kiirep langkula aro motoku. Sim annyi napena Mirilunggulo lubitung: “ ‘No ngokke ue silo ngo nokke Abupe ikai.’

³⁴“Shédíke bím yaamo mape sikolokke kiirep kugangem so agom kídarso potung: “ ‘Ngo nolum Dabidme pébisunam deena delokke berokna ayang igulem biyé.’

³⁵“Dekepe iname sim rego konlo pobitung: “ ‘No nokke Deena Amidem yaadope kaamo mayé.’

³⁶“Kapeila Dabid bí agí siirumlo Shédíke míínamem ibirongem bí sikai; bím agí abu yukolo yuto delokke bíkke amíle yangkai.

³⁷Idakkom sékom Shédí bí sikolokke kiirep tokudí bí yaanamem paamato.

³⁸Delok legape ngokke bíro kídía, Jisukelo paab kídarem maab kunamem nolum pokandung dem nolum ngo kényépe emla míídung.

³⁹Mosike ngiitomlok nolu ingkona paabem ipít sulamadí, dekena paabem míngkesuna kídíe Jisu kelok ipít suladung.

⁴⁰Kaaluna miri kídíe ingkuem potodí de nolukíng imadope ansulangka:

⁴¹“ ‘Luge pogena nolu kapei emla mííla nyoklangka, kapeila noluke longelo ngokke ipenam atíem akone nolum pobidokom nolu aro míímang.’ ”

⁴²Paul melang Barnaba bínyim kumkeng ekum delokke ami kídíe sim atí kídí sim lekoteng angkupena Sabbath longelo pobo langkuka emla poto.

⁴³Duudumsuna kídíe gípan surongkuem, Judai amikídí elang Judai dormolo ikuna kídíe bojéko Paulkíng delokke Barnabakíng gímín geto. Bínyi bulum luposula delokke Shédíke ayang gooralo duuyardope pogapto.

⁴⁴Sabbath longekon delo taon delokke ami alum kone Ruutumke agomem tatpe emla duudum subomto.

⁴⁵Judai kídíde miludem kaayédem, bulu nesurunge ila Paulke agomem lukaato.

⁴⁶Delo Paul lang delokke Barnaba bínyi mirampe poyansuto: “Ngolu Shédíke agomem nolukíng pobo penamíai. Nolu dem tomape delokke agísue turyarpeko bedangem míímang, ikolok ngolu supak Mipak kídílo aabomdung.

⁴⁷Legade sikepemin Ruutum bí ngolum potone: “ ‘Ngo nom Mipak kídíke angunpe imoto, no among rego regolo turkunam bedangem bomayé.’ ”

⁴⁸Mipak kídíe dem tayyéname bulu ashénge ila Ruutumke agomem yidgeto delokke turyar penam legape ullennam kídíe arope míngkesuto

⁴⁹Ruutumke agome among tabulo byargongkai.

⁵⁰Idakkom Judai amikídíe Shédíme pesona ai-siina mime kídíem lang taon lokke ruutum kídíem lukung líkto. Bulu Paul melang Barnabame taronang idope lulíkla, delo bínyim buluke among lokke monlen toku.

⁵¹Dekepe iname bulum ikarpe buluke alelok pemugem danbín sula Ikoniolo gíto.

⁵²Delokrongem luyilsuna kídíe Deena Aidlok ashénge ito.