Read Alladian TOMLÍKNAM 14 Bible Online

TOMLÍKNAM 14 - Alladian bible

TOMLÍKNAM 14

¹Ikoniolo Paul lang Barnaba bínyi Judai kídíke kumkeng ekumlo gíyasupe gíto. Delo bulu sepekrupe poname deddína Judai amielang Mipak kídíe míngkesuto.

²Idakkom míngke sulímana Judai kídíde Mipak kídíem luku pokula buluke aapílo bíro kídíem akdope luaklíkto.

³Dekepe iname Paul lang Barnaba bulu delo Ruutumke legape mirampe pobola, bulum irisinyo iyodem ibola bíkke yanggong agomem edíípe lubola oolooko duuto.

⁴Taon delokke ami kídíe ipan sukai, ayokone Judai kídíem aabosuto. Ayokone tomlíknam kídíem aabosuto.

⁵Delo Mipak kídí elang, Judai kídíela, buluke ruutum kídíe dumsula, bulum irééla delokke elílok gepe emla ruubosuto.

⁶Idakkom bulu dem ansula Lustralo lang Derbe taonlo delokke ayir agong doolung kídílo duknyok geto.

⁷Delo bulu tatpona dooyingem poyarbito.

⁸Lustralo amiko lebyanako dungai, bí odo lokkekai lebééla gíkí berokmang.

⁹Paulke podungem bí Paulke ponamem tatgapto. Paul bí jonnampe bíkkíng kaasudola, kaaname bí ipídope míngkeng kanako,

¹⁰delo poto, “Nokke alelok dakreptola!” Delo amide tíkrepla gísulento.

¹¹Milude Paulke inamem kaayédem, bulu Lukaonia agomlok bottepe pokai, “Shédí kídíe tanipe ila ngolukíng píídung!”

¹²Barnabame bulu Jia, delokke Paulme bulu Herme emla amín mínto kapeila bí agom pobona ruutumpe ito.

¹³Taon luyulo kumkeng ekume duuna Jiake mirie gooruem lang appunem taon gétlo bomato kapeila bílang milude bulum sobo pabipe emla mííto.

¹⁴Idakkom tomlíknam kídí Barnaba lang Paul bí dem tayyédem, bulu agí egem bétsula milung gooralo dugaa danla luto:

¹⁵“Ami kídía, nolu kapeila depe idune? Ngolukom noluke kísana taniemin. Ngolu nolum tatpona dooyingem boma bidung, among talengem delokke delo aradelo duuna atí takamem pína, turna Shédíkíng aalangkula sok are kamana atí kídí sim mepak langkula yédope emla nolum podung namino.

¹⁶Kerape bí opín takamem agí mínggípe yédope melíkto.

¹⁷Depe idokom bí hakii memape imang; nolum pedong asiem bila ali ayém moodílo bila nolum ayangem bí lengkanto; bí nolum donamem jémola delokke noluke aangem ashémoto.”

¹⁸Sikepe bínyi pola ami kídíem dadape sobo pape inamem lutumto.

¹⁹Delokrongem Antiok loklang Ikoniolok Judai amieke aala milungem agíkepe sotto. Bulu Paulme elíng gela delokke taon luyulo bí sikai emla mííla sopakto.

²⁰Idakkom luyilsuna kídíde bím daggola iname, bí gerep langkula taon delo gílat toku. Longe kondem bílang Barnaba bínyi Derbepe ento.

²¹Bulu tatpona dooyingem delo taon delo pola bojéko luyil sunape imoto. Delokrongem bulu Lustra, Ikonio delokke Antioklo enlat langkula

²²luyilsuna kídídem edíng podíla delokke luír poírla bulum míngkesula dunggap dope pogapto. “Ngolu deddína ankí kenuem paala Shédíke amolo aape aido,” emla bulu poto.

²³Paul lang Barnaba bínyi mondoli mipílo miro[10] kodada bulukepe ulbito, delokke doyimape kumla buluke míngkesuko ruutumkíng bulum melíkto.

²⁴Pisidia gooralok gílangala, bulu Pamphilialo pííto,

²⁵delo bulu agomem Pergalo pokan rongem, bulu Attalialo gíto.

²⁶Attalia lokke bulu Antioklo yudatoku, de bulum mondoli ami kídíke Shédíke ayang gooralok buluke ipíítonam agérem melíkkue.

²⁷Delo bulu pííla mondoli kídíem tomdum supala Shédíke bulukíng yémín imín genam delokke kape kísa bí Mipak kídíe míngke sudope bedangem ítbín bitodí dem takam bulu ami kídíem pokan botoku.

²⁸Delokrongem bulu delo míngkesuna kídílo oolrungko duubosuto.