Read Alladian TOMLÍKNAM 15 Bible Online

TOMLÍKNAM 15 - Alladian bible

TOMLÍKNAM 15

¹Judialokke amieke ayoko Antioklo tokla bíro kídíem luyilto. “Nolu Mosike ngiitom luyil nampe, agíe dínbíng iyod sumamílo turnamem paamayé.”

²Si agomsi Paul melang Barnabame, míngkesuna ayoko bulukíng lekope metak sulíkla Jirusalemlo gíla tomlíknam kídí emlang miro kídíem sok agom sok legape kaarík sudope melíkto.

³Mondolie bulum melíkto, delo bulu Phonekia delokke Samari amolok endakla Mipak kídíe kape kísa Ruutumme míngke sukadí dem pokanto. Si agom si bírokídí takamem ashénge imoto.

⁴Bulu Jirusalemlo pííyéname, bulum mondoli kídí, tomlíknam kídíe delokke mirokídíe yamríkto, bulukíng Shédíke inam saanam takamem bulu pokanbito.

⁵Delokrongem Pharisi lokke míngkesuna ayoko darepla pokai, “Mipak kídíde dínbíng iyodsula Mosike ayonem igerupe aido.”

⁶Tomlíknam kídí elang miro kídíe sim agomsim tatkí bosudope dumsuto.

⁷Oolko pobo surongem, Pitor bí dakrepla bulum poto, “Bíro kídía, nolu kénsudung, kerape Shédí bí noluke aralok Mipak kídíe tatla delokke míngke sudope tatpona dooyingem ngom pobidope ullentung.

⁸Aapí aang kaaluna Shédí bí bulum Deena Aidem bila bulum, ngolum inam kísape torík sunamem lengkanto.

⁹Bí ngolumlang bulum ingu sumang, legade bí buluke ainangem míngkelok arbíntoku.

¹⁰Supak demílo, kapeila nolu ngoluke abu kídíete delokke ngolu agíete gelamanam egedem míngkesuna kídílo pyalíkla Shédíme darkaape míídune?

¹¹Demang! Buluke akampe Ruutum Jisuke ayang gooralok ngolu turdungku emla ngolu kéndung.”

¹²Kebang tabude Barnaba kelang Paulke, bulu kelok Shédíke Mipak gooralo irisinyo iyod sangot inamem pobo kunamem asoope tadííto.

¹³Buluke poyin rongem Jems bí polento; “Bíro kídía, ngokke agomem tatgap langka!

¹⁴Shédí bí Mipaklok agí kepe amiko laalen bila bulum ankíla kerape lengkan namem Simon[11] bí poyinbito.

¹⁵Kaaluna mirikídí agome sikepe atnam so gyabdung:

¹⁶“ ‘Sok méélamlo ngo aalangkula Dabidke oletna kumkengem mosaayéku. Sokke bénrongem ngo morepyéku.

¹⁷Delo abíd abíd amikídí takame delokke ngokke amínem gokna Mipak kídí takame Ruutumme matayé, sim atí kídar sim idope.

¹⁸Yénam takamlo kénnam Ruutum bí podung.’

¹⁹“Delok legape ngok mííname si, Shédíkíng angkuna Mipak kídíem bomrame emla ngolu míímope aimang.

²⁰Dempenem ngolu bulum murtilo donam binam atíem domadope, abír ajon ibosunamem imadope, paksulnam simon emlang iyyiem domape, nyodope sithiko atbimílo aiyayépe.

²¹Kapeila Mosike ngiitomem Sabbath longe miyolo, kumkeng ekum kídílo pori ritídung delokke taon miyolo pokan bitídung.”

²²Delokrongem tomlíknam kídíelang miro kídíe, mondoli tabunge duudum sudola buluke agí amieke ullenla Antioklo Paulkílang Barnabakíng melíkdope luyin bosuto. Bulu Juda (Barsabba emnam) delokke Sila, bíro kídí gooralok ruutumpe yégena kídí aralok sim annyi sim ullento.

²³Bulukíng bulu rumkíngke atnam sithi sim melíkto. “Noluke bíro tomlíknam delokke bíro kídílok, Antioklo, Sirialo delokke Kilikialo duuna míngkesuna bíro Mipak kídílo salame:

²⁴Ngolu tatname ngolum tatkí sumape ngolu kelok amieke ayoko gílen langkula nolum itit sikatla, buluke agomlok noluke aapíem gepo momape idung.

²⁵Dekepe iname ngolu takame amieke ayoko ullenla nolukíng ayanam angong kídí Barnaba kílang Paulkíng metak sulíkdope tolík bosutung.

²⁶Bínyi agí turnamem tosii sumape Ruutum Jisu Kristoke legape ankína amieke.

²⁷Delok legape ngolu Juda melang delokke Silame ngoluke atnam akampe nappalok luyin bosula melíkdung.

²⁸Si kaaname Deena Aid kepelang ngolukepe ainamko de rumkíngke iperunam kékonso nolum gela manam eged bimang.

²⁹Nolu murtilo sobo palíknam atíem, iyyiem, paksulnam simon adínem domape nyola delokke abír ajon imembosu mapeka. Nolu aipakpe sim atíkídí sim mepak bosu langka. Aipe duulangka.”

³⁰Ami melíknam kídíe Antioklo tokto, bulu mondoliem tomdum supala sithiem bito.

³¹Ami kídíe dem porito delokke luír poírnam agom legape ashéngkai.

³²Juda lang Sila, kaaluna miri annyide luír poírla bíro kídíem edíng podíla ito.

³³Delo loonyi longumko doorongem, bulum melíkna kídílo bíro kídíde aipe gídokupe kumlík joolíkla ipala melíktoku.[12]

³⁵Idakkom Paul lang Barnaba bínyi Antioklo duuto, delo bulu amiem bojéko luyilla delokke Ruutumke agomem poboto.

³⁶Longe ayoko doorongem Paul bí Barnabame poto, “Lekoteng gílat langkula Ruutumke agomem ngoluke pogongko takam taonlo duuna bíro kídíe kape yédudí kanggong langkuju.”

³⁷Barnaba bí Joan Markme bulukíng gíbo sudope emla mííto,

³⁸idola Paul bí Joan Markme gíbo namem aipe míímato, kapeila bí bulukíng agér iyinlope duubo supala bulum Pamphilialo mepala gínyotoku.

³⁹Bulu gyabbo sumape ikane jonbo suyimang. Barnaba bí Markme gíbola Kuprio danpe ento.

⁴⁰Idakkom Paul bí Silame gíbola míngkesuna kídídem Ruutumke yanggolok melík kosula gílento.

⁴¹Bí Siria delokke Kilikialok gíla mondoli kídíem edíng ludíng gooto.