Read Alladian TOMLÍKNAM 16 Bible Online

TOMLÍKNAM 16 - Alladian bible

TOMLÍKNAM 16

¹Paul bí Derbelo aato delokrongem Lustralo, delo Timothi emnam luyil sunako duuto, bíkke anede míngkesuna Judai amiko, idola bíkke abude Grik amiko.

²Lustra lolang Ikoniolo duuna bíro kídíde bím yidname ito.

³Paul bí enkolo bím enbope emla mííto, dekepe ila bí delo amodelo duuna Judaikídí legalok bím dínbíng iyodem ito, kapeila bulu bíkke abude Grik amikuai emla takame kénto.

⁴Bulu taon lokke taon konlo gíla, Jirusalemlo duuna tomlíknam kídí kelang miro kídíke amikídíe igedope emla luyin bosunam agom kídarem pokan gooto.

⁵Dekepe iname mondoli kídíem míngkelo ralmoto delokke loodíke amie bojéyayang imoto.

⁶Paullang angong kídare Phrugia delokke Galatia amolo gíto, kapeila Deena Aide bulum dooyingem Asia amolo pogoo momang.

⁷Bulu Musia ayirlo pííyédem, bulu Bithunialo aape emla ituai, idakkom Jisuke Aide bulum delo aamomang.

⁸Dekepe ila bulu Musialok gíla Troaslo tokto.

⁹Yoh dem Paul bí Makedonia lokke amiko dakla bím sikepe rogudope kaarí kaanyoko kaato. De “Makedonialo aala ngolum igultola.” emnako bí tatto.

¹⁰Paul bí kaarí kaanyodem kaarongem Shédí bí ngolum bulukíng dooyingem pobidope goktung emla mííyin sula ngolu menape Makedonialo enpe emla leemoto.

¹¹Troaslokke ngolu siyénglo aala jonnampe Samothra delo yudato, delokke longekon delo Neapolilo aato.

¹²Delokke ila Rom ami kídí lokke langkamnam Makedonia distik lokke bottena taon Philippilo pííto. Delo ngolu oolko duuto.

¹³Sabbath longelo ngolu taon luyablo gíla korolo gíto, delo ngolu kumsu peko amongko paayé emla míísuto. Ngolu duula delo dumsuna mime kídíem agom polenboto.

¹⁴Tatgapna mimekídí aradelok akonde Shédíme kumsuna Thuatira taonlokke sémukna ege kona, Ludia bí. Ruutum bí Paulke agomem tallídope bíkke aapíem siyyabito.

¹⁵Bílang bíkke ekum erang tabude baptis isurongem, ngolum bíkke ekumlo tomto. Bí pokai, “Nolu ngom Ruutumkíng míngke sunako emla míídumílo, ngokke ekumlo aala doolangka.” Dekepe bí ngolum delo aamoto.

¹⁶Longeko ngolu kumsuko amolo gídungane, méélam kerang agomem pomona aid duubomnam pakneko ngolum ríksuto. Bíkke kaalu kangor agom pobo kolok murkongem bojéko bíkke ruutumem paamoto.

¹⁷Si mimeko si Paulkíng delokke ngolu takamkíng, ulojérla gímín geto, “Si ami kídí si Teyong yalum Shédíke béérang kídíe, bulu nolum turpeko bedangem pobidung.”

¹⁸Deddína longem bí dekepe ito. Méélam yalumdem Paul bí ebínpe míngkane bí ngéngkut sudo langkula aiddem luto, “Jisu Kristoke amínlok ngo nom sok mime sokke gígéé langkuka emdung!” Delopak aidde mimedem gínyotoku.

¹⁹Pakne mimekoo delokke ruutum kídíe buluke murkong pangkeng dokenge nyokkai emla edílo kénsutodí, delo Paul melang Sila bínyim ruutum kídílo lengkandope emla dukan bojarlo hogoo bomto.

²⁰Bulu bínyim migom keralo bomala poto, “Si ami kídí si Judai amieke, delokke bulu ngoluke taonem ebín motung

²¹bulu ngoluke ngiitom mirupe ngolum poyildung, ngolu Rom kídíke amiemin, ngolu sim ayon sim torík sulamang delokke igelamang embodung.”

²²Mibamde Paul melang Silame díngkolo díídumsuto, migomde Paul kelang Silake egem bédbito; delokke bulum demnge dope lulíkto.

²³Bulum demngal geyéla pateklo líkto, delokke patek ruutum dem bulum aipakpe kanggap bomdope hukum bito.

²⁴Sikena hukumem paala, bí bulum patek aralo buluke alem gaang annyilo yééla meto.

²⁵Yoh raajang delo Paullang Sila bínyi kumla delokke miri lula idungai, delokke abíd patek ajon kídíde bínyim tatgapla dungai.

²⁶Menang asak dekepe iduem patek delokke ekum gaang kídíe engen dope botterupe taronko tonto. Letellok patek eyab kídíe bényakai, delokke mipil miyong íkolide elukai.

²⁷Patek ruutumde gerepto, delo bí patek eyabe siyya dope kaayédelo, agí yoksem satsula agíem níkka supe ito, kapeila patek ami kídíe duknyok kaku emla bí mííto.

²⁸Idakkom Paul bí ulogokto, “No agíem moka sumapeka! Ngolu takam si dung!”

²⁹Patek ruutumde meruko kola dugaala Paul kelang Silake keralo oletla pesuem dan gosuto.

³⁰Bí delo bulum takam laalenpala íngkíto, “Poyilna kídía, kape imílo ngo turyékun?”

³¹Bulu poyansuto, “Ruutum Jisukíng míngke sulangka, demílomin nolang nokke ekum erang kídíe turyékune.”

³²Delokrongem bulu Ruutumke agomem bímlang delokke bíkke ekum lokke abíd takam emte pokanto.

³³Delo yoh delo patek ruutumde bulum gíbola buluke taríem írbínto, delokrongem bílang delokke bík ekum erang tabunge baptis laasuto.

³⁴Patek ruutumde bulum bíkke ekumlo tomla bulum dobo domoto, delokrongem ekum erang tabude ashérunge ito, kapeila bulu Shédíme míngke sukai.

³⁵Longe pííyédem, migom kídíde ami kídíem ordarem bomala patek ruutum delo gídope melíkto. “Dem ami kídídem melen langkuka.”

³⁶Patek ruutumde Paulme poto, “Migom kídíe nomlang Silame melen dokupe ordar bitung. Supak nolu gíladoku, aipe gílang kuka.”

³⁷Idakkom Paul bí migom kídídem poto, “Bulu ami takam kangkolo ngolum íngkí tatkí mape demto, ngolu Rom amie, ngolum pateklo líkto. Delokke bulu ngolum supak asoope megéé dungkunía? Depe imayé! Bulum agíem aasumola ngolum gílen bomo langkuka.”

³⁸Migom kídíde migom ruutumlo dem pokan bitoku, delo bulu Paullang Sila bí Rom amie emnam dem tatrongem ansuto.

³⁹Bulu bulukíng aala ngiila delokke bulum taon delokke gígéé dokupe rogula, pateklokke gílen líktoku.

⁴⁰Paullang delokke Sila bí patek lokke gílen rongkuem, bulu Ludiake ekumlo aato, delo bulu bíro kídíem ríksula luír poírto. Delokrongem bulu gítoku.