Read Alladian TOMLÍKNAM 18 Bible Online

TOMLÍKNAM 18 - Alladian bible

TOMLÍKNAM 18

¹Sokke méélamlo, Paul bí Athenem megeyéla Korinthlo gíto.

²Delo Klaudioke Judai ami takamem Romlokke gígéé dokupe ordar bikolok mongnyo pakpe agí méng Priskilame gíbola Itali lokke angkuna Akula emnam Judai amiko bí kaaríksuto. Paul bí bulum kaape emla,

³delokke bínyike kísape bíte tombu ege sumna amipe ikolok bí bulukíng duumínla agér gérbosuto.

⁴Sabbath miyolo bí Judai kídí emlang Grik ami kídíem míngke sumope emla kumkeng ekumlo pokí lukí bosuto.

⁵Edílo Makidonialok Sila lang Timothi bínyi píítodí, delo Paul bí ngiitom pogongkolo alumpe yéla “Jisu bímin Kristo” emla Judai kídílo hakii bito.

⁶Idakkom edílo bulu bím lutumla atímape lutodí, delo bí egem píkdan sula bulum luto, “Nolu nyokyékom nolusuke. Ngokke ipenamem itobong. Supak lokke ila ngo Mipaklo gíyéku.”

⁷Delokrongem Paul bí kumkeng ekumdem megeyéla Shédíme kumna, Tit Justoke ekumdelo gíto.

⁸Kumkeng ekum ruutum Krispalang bíkke ekum rarung takame Ruutumme míngke sukai, delokke bíkke agomem tatna Korinth amieke bojéko míngkesula baptis laato.

⁹Yume konem Ruutum bí Paulke kaarí kaanyolo Paulme sikepe poto; “Peso mapeka: asoope duumape ngiitomem poyar bolangka.

¹⁰Kapeila ngo nokkíng dung, delo sékote nom míílo aabom mayé, kapeila ngokke amie so taon so bojéko dung.”

¹¹Dekepe iname Paul bí dítag kolang poolo akkékope bulum Shédíke agomem poyilla duuto.

¹²Gallioke Akaialo gobornorpe idudelo, Judai ami kídíe atelkope Paulme umla bisar ikolo bím aaboto.

¹³“Si ami si ayonem ipatsula ami kídíem Shédíme kumsudope poyildung” emla bulu poto.

¹⁴Paul bí poyan supepak iduem Gallio bí Judai kídíem poto, “Nolu Judai kídía, si ibaa rumanam demangkom botteruna imem komílo ngo nolum tatgap bipenam kuai.

¹⁵Idakkom si agom, amín delokke noluke agí ayon legang kootíre iname atídem noluke aralo luyin sulangka. Ngo sikena atíkídíem bisar bonape ilíímang.”

¹⁶Dekepe ila bulum bisar ikodelok ullentoku.

¹⁷Delokrongem bulu takam kumkeng ekum ruutum Sosthene me uujét aabomla bisar iko keralo mogooto. Depe idokom Gallio ankí bimang.

¹⁸Paul bí Korinthlo anyongko duupoto. Delokrongem bí bíro kídíem megeyéla Siria danpe, Priskila melang Akulame angoope enbosula entoku. Bíkke enlen mangadape, Kenkrialo bíkke dumídem ngíbín suto kapeila bíkke pésunamko kato.

¹⁹Bulu Ephesolo pííto, delo Paul bí Priskila melang Akula me meto. Bí agíe kumkeng ekumlo gíla Judai ami kídíem lukí pokí bosuto.

²⁰Bulu bím bulukíng oolooko duupodope rogutuai, bí tomang.

²¹Idola bí gílen daklangkula, pébisuto, “Shédí bí ayang yémílo, ngo lekoda aayéku.” Delokrongem bí Epheso lokke yullentoku.

²²Bí Kaisairalo pííyédem, gíla mondoliem ashé lupuem pogeyéla delokrongem Antioklo tokto.

²³Antioklo anyongko duurongem, Paul bí delokke gílenla Galatia delokke Phrugia lokke rego mipílo magoola luyilsuna takamem luer poerboto.

²⁴Depe iduem, Aleksandria lokke Apollo emnam amiko, Ephesolo aato. Bí Dooying kitabem bojépe kénna amikuai.

²⁵Bím Ruutumke legangem airupe poyil namkuai, delokke bí Joanke baptis inam legang petomem kénto idokom ernamrupe Jisuke legang emte aipakpe luyil dungai.

²⁶Bí kumkeng ekumlo mirampe polenbokai. Edílo Priskila lang Akula bínyi bíkke agomem tattodí, bulu bím bínyike ekumlo tomala delo bí Shédíkelo yépenam legangem edíírupe pobito.

²⁷Apollo bí Akaialo gípído delo, bíro kídíe bím luír poírla delokke luyilsuna kídílo bím aipe kaarík dope sithi atlíkto. Bíkke Akaia amolo píídodem, Shédíke yanggolok míngkesuna kídí legape airupe igulna amipe ikai.

²⁸Kapeila bí Jisumin Kristode emnamdem Dooying kitablok porman bila Judai ami kídíem séngéépe akkísuto.