Read Alladian TOMLÍKNAM 2 Bible Online

TOMLÍKNAM 2 - Alladian bible

TOMLÍKNAM 2

¹Pentekost longe píídodelo, bulu takam dungko atello atelkope dumsuto.

²Menang asak gumnam kísana adutko teyong telok tokla buluke dungko ekumdelo bíísét bomkai.

³Bulu ayokone eme lenna kísape, mejére poklenla bulukíng mipil miyolo aalíkdope kaato.

⁴Bulum takam Deena Aide bííbomto delo bulum angu angu agomlok [1] Deena Aide pomokai.

⁵Depe idodelo taleng kutku sokke opín opínlok Shédíme pesona Judai amieke Jirusalemlo duudungai.

⁶Bulu dem adudem tayyédelo, mibamko ernamrupe aadum subomto, kapeila mipil miyode bulum agí agí agomlok agom podope tatto.

⁷Irisinyope míídola bulu poto, “Si ami takam agom pona kídísi Galil lokke ami mangekía?

⁸Demílo ngolu mipile bulum agí agí agomlok kape ilai pobo sudope taddune?

⁹Parthia, Mede delokke Elamei kídíe; Mesopotamia, Judai, Kapadokia, Ponto delokke Asialokke ami kídíe,

¹⁰Phrugia delokke Pamphilia, Ijipt delokke Kureni anínlokke Libia okékon ami kídíe; Romlok aana kídíe

¹¹(Judai amiekom delokke Judai dormolok langaanam dokom); Krete amidak delokke Arab amidak ngolu bulum ngoluke agomlok Shédíke iyod sangod kídarem pokandope taddung!”

¹²Mínga sudola delokke irisinyope míídola “Sikepe inamsi ingkuedi?” emla bulu pobosukai.

¹³Ayo konedan bulum lungil lusoola pokai, “Bulu apong tíngír sudunape.”

¹⁴Delokrongem Pitor bí midum íying kolang atel delo lekope dakrepla bottepe miludelo pokai, “Judai repe sinying delokke Jirusalemlo duuna takam ajon kídía, ngo sim legasim pobiso; ngokke ponamem aipe tatgap langka.

¹⁵Si ami kídí si noluke míngkampe tíngír suma namoko. Si roh konang baji dunga danamino!

¹⁶Sok legape Kaaluna miri Joel bí sikepe potung:

¹⁷“Shédí bí podung, ‘Yéyindí longelo ngo ngokke Aidem takam amilo purlíkyé. Noluke oo kídíe lang delokke ome kídíe porí ponyuem poyé. Noluke yaamé kídíe kaalu kangoryé, noluke mijing kídíe immang maayé.

¹⁸Ngokke béérang kídílo mimedak delokke milodak delo longe kídar delo ngokke Aidem purlíkyé, delo bulu polu pooryé.

¹⁹Ngo teyong telo atí atí irisinyuem delokke rumkílo atí atí iyodem lengkanyé. Delo iyyie, eme, delokke míkkíe sengééyé.

²⁰Doonyie ruage iyé delokke poolue iyyi kísa yalíyé. Ruutumke bottena angun runa longelokke píímang adape depe iyé.

²¹Delo Ruutumke amínem míngkesuna miyode turyé.’ ”

²²“Israel ami kídía, sim tatgap tola; Najareth lokke Jisu bí Shédíke bíkkelok irisinyo iyodlok bíkke ralnamem nolukíng lengkannam amikuai, dem nolu agíe kénsudung.

²³Sim ami sim Shédíke míídulok noluk alaglo melíkto delokke nolu bím atímana ami igullok krosslo kililok pítlíkla simoto.

²⁴Idakkom Shédí bí bím sikolokke kiirep langkula sinamlokke bím mopít toku, kapeila sinamde bím tumla melatomang.

²⁵Dabid bí bíkke legangem sikepe pobitung; ‘Ngo Ruutumme ngokke keralo agínpe kaato. Kapeila bí ngokke lakbíklo dung, ngom ngenla mayé.

²⁶Delok legape ngokke ainasi ashédung delokke ngokke amíl site míínam sukolo duuyé.

²⁷Kapeila no ngom agolo mepak mayé, no ngokke Deena amiemkom agolo yaadope kaamo mayé.

²⁸No ngom nokke keralo ashéngem bíísét moyé.’

²⁹“Bíro kídía, ngo nolum berokpe pobi ladung abu buku Dabid bí sikai delokke yuto, delokke bíkke agode siyum sirope si dung.

³⁰Idakkom bí kaaluna mirikuai delokke bíkke otíng oyinem bíkke roja palengem dungge moyé emla Shédíke iyérung emla pébi sunamem bí kénsuto.

³¹Kerang lokkem kaasutola, bí Kristoke[2] gerep kupenamem pola, bím agolo mepak mayé, bíkke amíl emkom yaadope kaamayé emla bí pobito.

³²Shédí bí Jisume turdokupe itoku, delokke ngolu takam dem aro menamem hakii bine.

³³Shédíke lakbíklo duula, Abue Deena Aidem bipe emla pébi sunamem bí paala delokke nolu supak kaasu tatsu dope atíem bitung.

³⁴Legade Dabid bí teyong telo sangku mangai, delokke idolate bí sikepe pobitung; “ ‘Ruutum bí ngokke Ruutumme poto; Ngokke lakbíklo duulangka,

³⁵noluke miru kídíem noluke ale rumkílo ngokke mekuma tetengem.’

³⁶“Delok legape, noluke pansaanam Jisume, Shédí bí Ruutum pelang delokke Kristope imoto; sim Israel amikídí takame kénsupe aido.”

³⁷Ami kídíe sim tayyédem, bulu sengéépe aang ola delo Pitor melang delokke tomlíknam abídem pokai, “Bíro kídía, ngolu kape imílo aiyén?”

³⁸Pitor bí poyansukai, “Noluke paab kídarem maab dokupe, Kristoke amínlok, nolu mipile míílat sulangkula baptis isu langka. Delo nolu Deena Aidke amanem paayé.

³⁹Shédíke pébi sunamde nolu kepelang noluke ome-oo kepe delokke mootelo duuna takam kepe Shédíke tomlen penam ami takam kepemin kadune.”

⁴⁰Abíd abíd agomekete bojéko bí bulum pobeng bito; delokke “Nolu agísue sikena atímana ami kídí sokke anton sulangka” emla bí bulum poto subito.

⁴¹Bíkke agomem toríksuna kídíe baptis isuto delokke delo longe delo jarumkope buluke angonge aatemkai.

⁴²Bulu agí agíe, lekí leko bosula, ettíngem penla dobo tííbosula delokke kumbo joobosula tomlíknam kídíke ngiitomlo yéto.

⁴³Tomlíknam kídílok deddína irisinyuem lang iyodem lengkanla ami tabungem peso moyinto.

⁴⁴Míngkesuna takame lekope atí takamem atelkope medum suto.

⁴⁵Buluke ekurang atí siríem kola bulu mipilem mipil pííram akorlok bito.

⁴⁶Loodíke bulu kumkeng ekumlo gídum bosu ayarto.

⁴⁷Shédíme yidge bosula delokke ami takame kaabape yéto. Delokke ruutum bí loodí mipíem ipít kunam ami kídíem bulukelo lekope laatem líkto.