Read Alladian TOMLÍKNAM 20 Bible Online

TOMLÍKNAM 20 - Alladian bible

TOMLÍKNAM 20

¹Ebínde iyinrongem, Paul bí luyilsuna kídíem tomdum supala bulum luír poír rongem, bidai bigeyéla Makedoniape ento.

²Bí delok amodelok gípatla ami kídíem luer poer agomem pobo geyéla, méélam yalumdem Grik amolo pííto,

³delo bí poolo angumko duuto. Legade Judai amikídíe bím atímape ipe emla míírí míínyo bomkolok, bí Makedonialok gílat sukupe emla mííto.

⁴Berialo duuna Purrke oo Sopatar, Thesalonika lokke Aristark lang Sekund, Derbe lokke Gai bí Timothi lang, delokke Asia amolok Tukik lang Tropim bulu Paulme gíbosune.

⁵Si amikídí si gígela Troaslo ngolum duuyatoku.

⁶Siiyé líkmanam ettíng adeng ape irongem Philippi lokke ngolu entoku, delokke longo méélamlo Troaslo abíd emte yébosutoku, delo ngolu longe kínítko duuto.

⁷Hopta lokke kerayalum longedelo ngolu ettíng penbosupe emla gídumsuto. Paul bí amikídíem agom poboto, delokrongem bí longe kondem enkupe míídola yoh raajalope agom potíboto.

⁸Ngoluke dumsuko teyong ruumdelo meru mílí ito.

⁹Paul bí agom podan tetela ikolok kirki abelo duuna yaamé Eutuk emnamkone immiyé ito. Bí iptap yédem angum napena teyongke ruum delokke oletla bím sidope gakreptoku.

¹⁰Paul bí oila, yaamé koodem gomto. “Pesomapeka, bí turdung,” emla poto.

¹¹Delokrongem bí teyongke ruumdelo saatoku delokke rotiem penla dotoku. Píange idolope agom pobo geyéla, bí gítoku.

¹²Ami kídíde yaamé koodem ekumlo turdope bom langkula aiyope dunggul kanggul toku.

¹³Ngolu jajilo kerape gígela Assos danpe gíto, delo ngolu Paulme jajilo laalíkpe emla ituai. Bí alelok delo enyé emkolok ngolu bíkke míngkampe dekedem ito.

¹⁴Ngolu Asslo bím ríksu yédem, bím jajilo laalíkla Mitulene danpe ento.

¹⁵Longekon delo ngolu delokke gíla Kio abedelo pííto. Ngolu Samolo píírong longekon delo Miletlo pííto.

¹⁶Asia amolo adolpe yélík madope mííla Paul bí Epheso dem jonnampe gíboope mííto; kapeila, pakla yémílo, Pentekost longelo píídope emla, bí Jirusalemlo lomnampe gíto.

¹⁷Milet lokke, Paul bí Ephesolok mondoli miro kídíem tomdope melíkto.

¹⁸Bulu pííyédem, bí bulum poto: “Ngokke Asia amolo aado longe lokke ila, deddína longem ngo nolukíng yébosuto dem nolu kénsudung.

¹⁹Ngom Judai kídíe sengéépe míírí míínyo tuakom miksie ebín idola lebíng koníla Ruutumme ngo agér gérbito.

²⁰Ngo nolukepe aipena atíem pogot mape pola nolum takam ami kangkolo ekum ekumlo luyilto dem nolu kénsudung.

²¹Míílat sulangkula Shédíkelo aalangkula Ruutum Jisukíng míngke sulangka emla ngo Judai kídí emlang delokke Grik kídídem pokanto.

²²Delokrongem supak, Deena Aid lulíklok, ngokkíng kape iyédí, dem kénsumape Jirusalemlo ngo endak.

²³Taon miyolo Deena Aide patek duupe namemlang yényi yésue ngokkelo kayé emla poto subinamem ngo petom kénsudung.

²⁴Depe epe idagakom Shédíke yanggong tatpona dooyingem hakii binam agér Ruutum Jisuke ngom binam agérem ipíí bila delokke ngokke ipenam agérem iyin bipemílo, ngokke turnamdem ngo ankímang.

²⁵“Ngokke Shédíke yétem gíla pokeng amikídí nolu sékote ngom kaapang kuimayé dem ngo kénsudung.

²⁶Delok legape, ngo nolum silo pokan subidung ngo ami takam iyyilokke deesudung.

²⁷Kapeila ngo Shédíke míínam tabungem pogotmape nolum pokanbito.

²⁸Nolu agísue agísuem ansulangka delokke Deena Aidke nolum kaabom dope emla binam ami kídarem kanggap langka. Shédíke[13] agí iyyilok relen kunam Shédíke mondoli lokke mér kaabom nape yélangka.

²⁹Ngokke gírongem, kaníína sipyange noluke aralo aala mér bénbamem asoope memayé dem ngo kénsudung.

³⁰Noluke araru sulokke ami kídíete luyilsuna kídíem agíkelo langkam supe emla aruem ibulne lenyé.

³¹An gap sulangka, longe yohpe ngo miksie ebín ila nolum takamem dítag angum kokai potíbito dem míípa sulangka.

³²“Supak ngo nolum siisamola moji saanam kídí takam aralo nolum ruutum doge penamem bipena Shédí kelang bíkke ayang gooralo nolum melíkdung.

³³Ngo sékoke arem tadog ege galugemkom kaabue emla míítomang.

³⁴Nolu agísue ngokke alag sulok ngokke dorkarnam kídíem lang ngokke angong kídíke míínam kídarem kaayin iyinsuto emla kényin sudung.

³⁵Ngokke inam atí takamlok, sikepe ankípe agér gérsula ikolok ‘Torík sunam empemílo binamde aiyado’ emnam Ruutum Jisu agíke pobisunam agom kídarem míípang sudakla, ngolu pííramem igulpe aido emnamdem ngo nolum lengkanto.”

³⁶Bíkke depe porongem, Paul bí bulum takam lekope pela bosudola kumto.

³⁷Bulu takam gombosula, mumpup bosula kabbosuto.

³⁸Bulu akonpakpe ankípe aang onamde bulu bíkke mingmuem kaayi mayé emla bíkke ponam agomde. Delokrongem bulu bím gíbosula jajilo yamlíktoku.