Read Alladian TOMLÍKNAM 21 Bible Online

TOMLÍKNAM 21 - Alladian bible

TOMLÍKNAM 21

¹Aang oname ila gípan surongkuem, ngolu jajilo aala jonnampe Kos amolo yudato. Longekon delo Rodeslo gíla Pataralo gíto.

²Ngolu Phonekia em gíboola gína jajiko paala, delo rengaala gíto.

³Kuprio em kaasudola sokko danlok gíla ngolu Siriape ento. Tur delo jajide ekurangem laalen kolok ngolu moopílo oito.

⁴Luyilsuna kídíem paala ngolu delo bulukíng longe kínítko duuto. Aidke pauarlok bulu Paulme Jirusalemlo enmadope lutumto.

⁵Idola ngoluke endíe pííyédelo, ngolu gílenla entípe ento. Luyilsuna takam elang buluke méng ome-oo kídíe ngolum lekope taon delokke gíbo sutoku, delo ngolu asi robelo lebíng koníla kumbosuto.

⁶Mipilem bidai ibo sugeyéla, ngolu jajidelo aatoku delokke bulu ekumpe enkaku.

⁷Ngolu Tur delokke yullen langkula Phonekialo oito, delo bíro kídíem ashéng lupuem pobosula bulukíng longeko duubosuto.

⁸Longe kondem gílen langkula, ngolu Kaisarialo pííla delo kínít lokke akon, prosarok Philipke ekumlo duuto.

⁹Bíkke milo kamang adana polu poorna ome appiko kadungai.

¹⁰Ngoluke delo oolko duurongem Agabo emnam kaaluna miriko Judia lokke pííto.

¹¹Ngolukíng aala, bí Paulke uugem laala, agí alagemlang alem yéésu nadola pokai, “Deena Aide podung, ‘Sike pemoko Jirusalem lokke Judai amikídíe sok uug sokke atuem yééla bím Mipak kídílo melíkyéne.’ ”

¹²Ngolu dem tayyédelo, ngolu lang ami kídíe Paulme Jirusalemlo gímapeka emla roguto.

¹³Delokrongem Paul bí poyansuto, “Nolu kapeila kapla rííla ngokke aangem pudune? Ngo umnam petommang idakkom Ruutum Jisuke amín legape Jirusalemlo sipenamem ngo pesomang.”

¹⁴Bím lutum kírampe irongem, bíkke míídupe gímodola “Ruutumke míínampe ika langka,” emlíkto.

¹⁵Depe irongem ngolu leemola Jirusalemlo ento.

¹⁶Kaisarialokke luyilsuna ayokone ngolukíng lekope enbosula ngolum Manasonke ekumlo enabola, delo ngolu dooto. Bí Kupriolokke amiko delokke kerang pekai luyilsuna amikonko.

¹⁷Edílo Jirusalemlo píítodí, delo bíro kídíe ngolum iigape yamríkto.

¹⁸Longekon delo Paul lang delokke ngolu abíde Jemsme kangaape gíto, delo mirokídí takame duuto.

¹⁹Paul bí bulum ashéng lupuem poríksuto delokke bíkke agér gérkolok Shédí bí kape kísa Mipak kídí gooralo agér itodí dem apíípe pokansuto.

²⁰Bulu dem talla, Shédíme yidgeto. Delokrongem bulu Paulme poto, “Bíro no kaasudung, deddína éjar éjar Judai kídíe edítko míngke sukane, idola bulu takam ayonem matídung.

²¹No Mipak kídí gooralo duuna Judai takamem, Mosike ngiitom lokke angu dokupe luyilbola, bulu buluke ome-oo kídíem dínbíng iyod sumo madope demangkom ngoluke yéruk dakruk ayonlo yémadope pobodung emla bulukíng agome píídung.

²²Ngolu kape iyékun? No aadung emnamdem bulu berokpe taddung,

²³dekepe iname ngoluke ponampe itoka. Pésuna ami appiko ngolukíng yémín gedung.

²⁴Sim ami kídí sim laala buluke pídéé agérlo ibosula buluke dumídem ngísudope buluke koros em kaabo sutoka. Demílomin takame si nom lugenam kídar si menam eke, no agísue ayonem míngge igela yédung emla kényéne.

²⁵Mipak kídí kepedan, ngolu bulukíng, buluke murtilo donam binamem nyodope, iyyiem domadope paksulnam simon adínem domape nyodope delokke abír ajon inamem medope emla ngoluke míínamem ngolu sithipe atto.”

²⁶Longekon delo Paul bí ami kídíem aabola bí agíe buluke pídéé sukolo pídéé sumínto. Delokrongem bí kumkeng ekumlo gíla buluke takam legape mér sobén palík rongem edít longe kodí nyopene emla pokanboto.

²⁷Longe kínít nanade gíyin pakpe idodelo, Asialo duuna Judai amieke ayoko Paulme kumkeng ekumlo kaato. Bulu ami tabudem pokuu líkla bím umla,

²⁸ukkai, “Israel lokke ami kídía, ngolum igultoi! Si ami simin rego mipílo ngoluke amikídí, ngoluke ayon delokke so amosokke mirupe poyilgoone. Delokke teyolo, bí Grik ami kídíem kumkeng ekumlo bomala sim deena amosim deemang modung.”

²⁹(Bulu kerape taon delokke Ephesia ami Trophim bí Paulme yébosuto delokke delo Paul bí bím kumkeng ekumlo aaboto emla mííto.)

³⁰Taon delokke ami tabunge belengkai, delo ami kídíe rego mipílok dukdum suto. Paulme umla, bulu bím kumkeng ekum delokke holen bomlangkula eyabem menang asak kokkapto.

³¹Buluke bím mokape emla idungem, Jirusalem taon lokke ami tabunge ebínpe ibosudung emla kobore Rom sipaying ruutumlo pííto.

³²Bí bíkke ami ekelang sipayingeke gíbola ami mibam gooradelo dugaato. Edílo ebín bínna kídíe sipaying ruutum demlang sipaying kídíem kaatodí delo bulu Paulme demgo yimang.

³³Sipaying ruutumde aala bím umla delokke íkolilok alag annyiem yéédope lulíkto. Delo bí íngkíto, bí sékodí delokke ingkokodí iton?

³⁴Miludelo ayokone angu konpe, ayokone rego konpe ukto, delo sipaying ruutumde, pupéé ruréé mankolok aropak legangem tatmape ila, bí Paulme sipaying duupom delo boma dokupe lulíkto.

³⁵Paul bí ebaadelo pííyédem, milude botterupe markolok sipaying kídíe bím joobomto.

³⁶Méélamlo gímín gena mibamde “Bím petpakto!” emla uktíkai.

³⁷Sipaying kídíde Paulme sipaying duupom delo bomku pakpe idodelo, bí sipaying ruutumdem “Ngo nom agomko polayédí?” emla tatkísuto. “No Grik agompe podunía?

³⁸No ami jarpiko gíbola mooruk amolo kerape ebín ilenbona Ijipt ami mangía?” emla bí Paulme tatkíto.

³⁹Paul bí poyansukai, “Ngo Kilikia lokke Tarsalo duuna Judai amiko, moomem taon lokke memborpee mangko. Ngom ami kídí so agom pobisumoi.”

⁴⁰Sipaying ruutumke tolík kolok, Paul bí baadum delo dakdola mibamdem asoope emla ruuto. Bulu asoope iyédem, bí bulum Hibru agompe poto.