Read Alladian TOMLÍKNAM 22 Bible Online

TOMLÍKNAM 22 - Alladian bible

TOMLÍKNAM 22

¹“Abu bíro kídía, ngokke podee sunamem tatgap langka.”

²Edílo bím Hibru agompe podope tattodí, delo bulu dengepe duuto. Delo Paul bí polento,

³“Ngo Judai amiko, ngom Kilikia lokke Tarsa doolulo oname idola so taon so siisa nako. Gamalielke gooralo ngom ngoluke abu kídí ayon gooralo apíípe terníng bisa namko delokke siro meyum noluke akon kísape Shédíme mínggap nako.

⁴Sikena bedalok gína kídíem petla mola mime dakkom milo dakkom bulum pateklo líkla ngo bulum iréé sinyoto,

⁵dem ríne ruutum elang kebang amikídíe hakii bisu ladung. Ngo Damaskalo duuna buluke bíro kídílo buluke atnam kakodem bomla delo gíla dem ami kídídem laala Jirusalem pateklo ingéé dokupe emla gíto.

⁶“Longe raadangem ngokke Damaskalo píínín yédem, menang asak asire ina angunko teyong telok ngom nguntít bomkai.

⁷Ngo amolo oletto delo ‘Saul! Saul! No kapeila ngom iréédune?’ emla ponam agomko ngo tatto.

⁸‘Ruutume séko no?’ emla ngo íngkíto. ‘Ngo nokke iréé bomnam, Najareth lokke Jisu moko,’ emla bí poyansukai.

⁹Ngokke enbosunam ajon kídíe angunem kaato, idola ngokkíng agom pona delokke agomem bulu tatkén mato.

¹⁰‘Ruutume, ngo kape iyékun?’ emla ngo íngkíto. Ruutum bí poto, ‘Gereptola delokke Damaskalo gílangka nokke ipenam takamem delo nom pobiyé.’

¹¹Ngokke angong kídíe ngom alaglok Damaskalo gaklíkto, kapeila angun asire ngom mingma moto.

¹²“Anania emnam amiko ngom kaape emla aato. Bí ayon ngiitomem mínggap nakuai delokke delo duuna Judai takamke airupe mínggenam amikuai.

¹³Bí ngokke ampelo dakdola poto, ‘Bíro Saul, nokke amige kaalangkuka!’ Delokrongem delopak ngo bím kaapatoku.

¹⁴Delokrongem bí pokai, ‘Ngoluke abu kídíke Shédí bí nolum bíkke míísangem kéndope delokke Deena Amidem kaadope delokke bíkke agomem taddope ulto.

¹⁵Nok kaanam tatnam takamem ami kídí keralo lukan biyé.

¹⁶Demílo nolu ingkoko toyala dune? Gerepla, baptis laala delokke bíkke amínem gokla noluke paabem arbín kosu tolangku.’

¹⁷“Ngokke Jirusalemlo gílat langkula kumkeng ekumlo kumdungem ngo kaarí kaanyoko kaato

¹⁸delo Ruutum bí ngom ‘Menape!’ emla poto. ‘Jirusalem lokke gígéé langkuka, kapeila bulu nokke ngokke legape hakii bisunamem torík sumayé,’ emla poto.

¹⁹Ngo poyansuto, ‘Ruutume ngo kumkeng ekumlok nom míngkesuna kídíem laala demla pateklo líkpe emla gíto dem si ami kídí si kéndung.

²⁰Delokke nokke legape yilíng bídgela hakii bina Stephanme peddagem, ngo delo ngokke míínamem tolíkla bím petna kídílokke ege galugem kaabomla dakto.’

²¹Delokrongem Ruutum bí ngom poto, ‘Gílangka; ngo nom Mipak kídí amolo mootelo melíkyé.’ ”

²²Milude sim agom sim podo sope Paulke agomem tatto. Delokrongem bulu ukla pokai, “Bím amosokke nyokmotoi! Bí turla laab kamang!”

²³Bulu ukdula agí agí galugem pítsula, pemugem, taleng danpe píkbín suduem,

²⁴sipaying ruutumde sipaying duupomlo Paulme bomdokupe lulíkto. Ami kídíe ingko legalok sikepe bíkke mirupe ukdune dem legadem kéndope bím demngéé pala íngkí bengkí dope lulíkto.

²⁵Bulu bím dempe emla yéédungem, Paul bí delo dakna sipaying ruutumdem poto, “Imem kamapete Rom amiem demnamde nolukepe demba dunía?”

²⁶Sipaying ruutumde dem tayyédem, bí lulíkna ruutumdelo gíla dem pokan bito. “No ingkoko ipe emla idune? Si ami si Rom ami komino” emla bí luto.

²⁷Lulíkna ruutumde Paulkíng aala íngkíto, “Ngom pobitola, no arope Rom amikua?” “E, ngo Rom amie” emla bí poyansuto.

²⁸Delokrongem lulíkna ruutumde pokai, “Ngom Rom amipe imopenam legape deddína abalem bila paato.” “Idakkom okor lokke ngo Rom amie” emla Paul bí poyansuto.

²⁹Bím íngkí bengkípe emla ina kídíde menang asak metoku. Lulíkna ruutumde Paulme, Rom membor konem íkolilok yéénam si imem komai emla agísue kénsutoku.

³⁰Longe kondem, lulíkna ruutumde kape ilai Paulme Judai kídíe ajéng luket dune emnam aropak legadem malenpe emla míngkolok, bí Paulme melen palangkula rínekídí emlang kebang tabungem gokdumsuto. Delokrongem bí Paulme laala buluke keralo dakmoto.