Read Alladian TOMLÍKNAM 23 Bible Online

TOMLÍKNAM 23 - Alladian bible

TOMLÍKNAM 23

¹Paul bí Sanhedrin kebadem jonnampe kaasudola poto, “Ngokke bírokídía, supaklope ngokke aina aapí takamlok ngokke Shédíkepe ipenam agérem iyinto.”

²Dem talla ríne ruutum Anania bí Paulke ampelo dakna kídídem bíkke nappadem kítkemto emla lulíkto.

³Delo Paul bí bím poto, “Yalundope molnam suppia, Shédí bí nommin demyéne. No ngiitom ayonlok ngom bisar idope duudola no ngom demdope lulíknade, agíe ayonem betsudung!”

⁴Paulkíng daknínna kídíde pokai, “No Shédíke ríne ruutumem lukaa namem peso manía?”

⁵Paul bí poyansuto, “Bíro kídía, bí ríne ruutume emla ngo kénsu tomang; kapeila sikepe attung; ‘Noluke ami kídíke ruutumem atímape lumapeka.’ ”

⁶Delokrongem Paul bí, ayokon amikídíde Sadduki eke abídde Pharisi eke emla kéndola kebadelok gokto, “Bíro kídía, ngo Pharisi komoko, ngo Pharisi ue. Ngo bisar kolo dakdung kapeila ngo sikolokke gerep kunamem míínam sudung.”

⁷Bí dekepe emyéname, Pharisi kelang sadduki aralo akmínsula kebade bekpan suto.

⁸(Sadduki kídíde sikolokke gerep kunam kamang, delokke delo teyong kotoki koteng demangkom aid koteng kamang emdung, idakkom Pharisi kídíde takamde kadung emla manto.)

⁹Dekepe iname delo bottepe ebínto, delokke Pharisi ukil ayokone gerepla akké kéré mínsuto. Bulu pokai, “Ngolu sim ami sim imem kaapamang. Aid komangke teyong kotoki komino bím potune?”

¹⁰Akmín lumín de botte yayang ikolok, sipaying ruutumde Paulme puké puyéla ipelo emla pesola sipaying kídíem tokla buluke dungko ekum delo saabo dokupe lulíkto.

¹¹Yoh kondelo Ruutum bí Paulke ampelo dakdola poto, “Miram langka; Jirusalemlo ngok legape hakii binam kísape, no Rom amolokom ngom hakii biperung aiyé.”

¹²Roh kondem Judai amikídíe kebang irubosula delokke bulu Paulme petma tetengem donam tíínam koteng doyimape yéyé emla agí agísuyé pésuto.

¹³Midum íying appi ngatna kopekai depe ito.

¹⁴Bulu ríne kídí lolang miro kídílo gíla poto, “Ngolu Paulme petma tetengem doyi tíyimayé emla berokpe pésutung.

¹⁵Supak demílo nolu aropak bíkke legangem tatpe emla míídung emla pobomdola noluke keralo Paulme bomadope nolulang kebange Rom sipaying ruutumem rogulangka. Ngolu bíkke so píímang adape bím petpe míídung.”

¹⁶Idakkom edílo Paulke bírme lokke ue dem míírí míínyonam agérdem tattodí, bí sipaying duupomlo gíla Paulme poto.

¹⁷Delokrongem Paul bí sipaying ruutum akonem tomla poto, “Sim yaamé sim lulíkna ruutumlo gíbotoka; bí bím atíko pope namko kadung.”

¹⁸Dekepe iname bí yaamédem lulíkna ruutumdelo gíboto. Delo sipayide poto, “Patek umnam Paul bí sim yaamé koo sim nokkíng aabo dope ngom lulíkdung, kapeila bí nom agom popenameke kadung.”

¹⁹Lulíkna ruutumde yaamédem alaglok gakla bím honín sudola íngkíto, “Nokke ngom popenamde ingkokoda?”

²⁰Yaaméde pokai, “Paulke legangem berokpe tatbeng kupe míídung embom dola Paulme nyampo no kebalo bomadope emla Judai kídíe nom rogudope poru bosutung.

²¹Paulme bulukíng melík mapeka, kapeila midum íying appi ngatna kokai bím tobomdung. Bím petma tetengem bulu doyi tíyimayé emla pésutung. Bulu supak iruu tubong, buluke nom rogunam nokke agom petomem toyala bulu dung.”

²²Lulíkna ruutumde yaamédem melíktoku delokke bím “Nokke ngom pokannam agomdem séko mekom pomapeka” emla pogapto.

²³Delokrongem bí ruutum annyiko tompala bulum ordar bito, “Alelok gína sipaying língko annyi kolang, guré sipaying íying kínít kolang delokke gíníng bomna sipaying língko annyiko Kaisaria danpe endope konang baji yumelo leemo langka.

²⁴Paulme gobornor Phelikkíng aipe píídope guréko mebilangka.”

²⁵Bí sithidem sikepe atlíkto:

²⁶“Klaudio Lusio, Mite migom Gobornor Phelik; Salam:

²⁷“Sim ami sim Judai ami kídíe umla bím peddak bongai, idola ngokke sipayingem aabola ngo bím mosiito, kapeila bí Rom amiko emla ngo kénto.

²⁸Bulu ingko legalok bím akgodudí dem kénpe emla mííla bím ngo Sanhedrin kebalo bomato.

²⁹Ngokke paaname bím akgade buluke ayon legalo kadung, idokom mokadope demangkom pateklo medope emnam agomyang kamang.

³⁰Edílo amisokke teyolo buluke míírí míínyo bomnam agérem ngom pokan bitodí delo ngo bím akna kídíemte nokke keralo buluke bím aknam agom leríngem lengkan sudope lulíkto.”

³¹Dekepe ila sipaying kídíe buluke ponamem Paulme gíbola yume delo Antipatrio lope bím enboto.

³²Longe kondem alelok gína sipaying kídíde buluke sipaying duupomlo gílat toku delokke bulu guré sipayinglo Paulme gílíkdope melíkto.

³³Guré sipayinge Kaisarialo pííyédelo, bulu sithidem gobornor delo bito, delokke Paulme bíkkíng melíkto.

³⁴Gobornorde sithidem poripala Paul bí ingko doolung lokkedí emla íngkíto. Bí Kilikia lokke emnamdem kénla,

³⁵bí poto, “Nom akna kídíe so pííyém ngolu nokke legangem tayyé.” Delokrongem Paulme Herodke roja ekumlo sontori gooralo medope lulíkto.