Read Alladian TOMLÍKNAM 24 Bible Online

TOMLÍKNAM 24 - Alladian bible

TOMLÍKNAM 24

¹Longo méélamlo ríne ruutum Anania bí miro kídí ekelang Tertullo emnam ukilko Kaisarialo oibosula gobornor keralo Paulme akgang leríngem lengkanto.

²Paulme bomarongem Tertullo bí Phelikkíng bím gusor moto: “Ngolu deddína longem nokke gooralo aipe duuto, delokke nokke míípe míngor bokolok so amoso ainam legape isi simo agérem aidope iboto.

³Rego mipílo delokke yénam mipílo, mite migoma, ngolu sim airunamko emla kéndung.

⁴Idakkom no tayyéme emla míímape, no ayasula anyongko tatbiyépe emla ngo rogudung.

⁵Ngolu sim ami sim tani amoso Judai dungkína takamlo amiem pokung lukulíkla yényi yéso monakope gakdung. Bímin Najareni opéé lokke lerínge

⁶delokke kumkeng ekum emteng bulmope ine; dekepe ila ngolu bím umto.[14]

⁸No agísue bím kéníng kímílo ngoluke bím gusor monam bím akgang aro leríngem kénsuyé.”

⁹Judai kídíde si agom kídí si aropage emla pomín gela agbosuto.

¹⁰Gobornorde Paulme ruulík yédem, Paul bí poyansuto: “Deddína dítagem no so amoso bisarna amipe duuto dem ngo kéndung; dekepe iname ngo ashépe podee subiyé.

¹¹No menape míípang suladoku, íying kolang annyi longe kerape ngo kumsukape emla Jirusalemlo gíto.

¹²Ngom akna kídíekom kumkeng ekumlo ngom séko meteng lukísunam paamang, demangkom kumkeng ekumlo mibam kídíem pokung luku líknam paamang demangkom ingkona taon lokom paamang.

¹³Delokke bulu ngom akgang leríngem nom porman bilamang.

¹⁴Nok keralo sim ngo arope toge sudung. Ngo buluke mename emnam bedang delokke amipe ila ngoluke buku Shédíme kumsuna, delok teyolo Mosike ngiitom lolang miri kídíke kitablo atnam takam emte míngkesune,

¹⁵delokke méélampe deena deemang takame gerepyéku emla, sokke ami kídí sokke míínam sunam kísape ngokom Shédíkíng míínam sudung.

¹⁶Dekepe ila ngo agínpe ngokke mííduem Shédí kílang tani keralo berok modung.

¹⁷“Deddína dítagem yényok geyéla, ngo ngokke amikídí legape abaleke laala delokke Shédíkíng aman bikupe emla Jirusalemlo aatoku.

¹⁸Ngokke depe ipala pídéé sunam ayonem iyin rongemmin bulu ngom kumkeng ekumlo kaatone. Ngokkíng ami alunge yémín gemang, ngo ebín kakolote yékímang.

¹⁹Idola nokke keralo so dungkupena delokke atíko kadumílo ngom aknam leríngem bomana Asialokke Judai amieke yétuai.

²⁰Demangkom so duuna amikídi; si ngokke kebang gooralo dakdungem ingkona imemko bulu ngokkíng paatodí dem pobipe aido.

²¹Agom atelko ngo buluke keralo dakdola bottepe gokla poto: ‘Si sikolokke gerep kunam legang pemino ngo silo nokke keralo bisar kosudune.’ ”

²²Delokrongem Phelik bí bedang legangem aipe kényinla potíídem mepoto. Bí pokai, “Edílo lulíkna ruutum Lusio bí pííyédí delo ngo nokke legangem luyin bipe.”

²³Bí sipaying ruutumdem Paulme sontori kaabomdope lulíkto idokom anyongko bík mínggípe yémola bíkke angong kídíem bíkke míínam kídíem bím biladope tolíkto.

²⁴Longo longkéko doorongem Phelík bí Judai mime, bíkke méng Drusillame aabola aatoku. Bí Paulme tomdope melíkto delokke bí Kristo Jisume míngkesuna legangem pobonam Paulke agomem bí tatgapto.

²⁵Paul bí yéjinam, hakjémnam delokke angkupena bisar legangem pobonamem, Phelik bí pesue idola pokai, “Supakke legape de aikabong! No gíladoku. Ngo tombape iyémílo nom tomyéku.”

²⁶Dekepe iduem Paul bí bím aman bisuyé emla bí míínam sutuai, dekepe ila bí leko leko Paulme tomdope melíkla delokke bím lupo sudungai.

²⁷Tagnyie gíborongem, Phelikke ayanpe Porkio duuto, idakkom Phelik bí Judai kídíke yidnamem paape emla Paulme pateklo mela gítoku.