Read Alladian TOMLÍKNAM 26 Bible Online

TOMLÍKNAM 26 - Alladian bible

TOMLÍKNAM 26

¹Delokrongem Agrippa bí Paulme “No agíe agíke legangem posulado” emla poto. Dekepe iname Paul bí agí alage belelíkla agíe agíke legang takamem podee sulento.

²“Agrippa Roja, Judai kídíke ngom aknam legang takamem ngo podee sudope silo nokke keralo ngo agíe daknam sim ngo airupe míídung.

³Delokke ngokke dekepe mínggade kapeila no Judai kídíke yébom dakbom sunam ayonem delokke lupéé luré bosu namem aipakpe kéndung. Delok legape, ngo ngokke agomem eetetpe tatgap biyépe emla nom rogudung.

⁴“Judai takame ngokke yéga-daggangem ngokke ojing lokkekai ngokke doolung lolang, delokke Jirusalemlo ngokke siisang gíísang namem kéndung.

⁵Bulu ngom kerango pekai kéndung delokke hakii biladung, bulu todomílo, ngoluke dormo agit ayonlok pomílo, ngo Pharisi kísape duuto.

⁶Delokke supak Shédíke ngoluke abu kídílo, pébisunam míínam sunam legapemin ngo silo bisarlo dakdune.

⁷Simin ngoluke opín íying kolang annyi lokke buluke longe yohpe Shédíme kumtí kolok apíídope kaape emla míínamem pébisuname. Roje, sok míínam sunamsok legapemin Judai kídíe ngom akdune.

⁸Shédí bí sinem kiirep doku emnamdem nolu akon akone kapeila arope míímane.

⁹“Najareth lokke Jisuke amínem aknam atí takamem ngo ipe emla ngo agíete míítuai.

¹⁰Delokke deke pakpemin ngo Jirusalemlo itone. Ríne kídí lokke agomlok Shédíke ami kídíem bojéko ngo pateklo líkto, delokke bulum petduem ngote dem tolíkmínto.

¹¹Bojérungko ngo kumkeng ekum konlokke kumkeng ekum konlo bulum ingéékape emla gíto, delokke ngo buluke míngkengem memo dokupe emla ralto. Ngo buluke teyolo marlíla iname bulum iréékape emla ngo mibo doolung kídar lote gígooto.

¹²“Sikepe gígong kolo, rínekídí lulíklok ralnamem paala ngo Damaska lote gíto.

¹³Longe raadangem, Roje, ngokke bedalo endungem, ngomlang ngokke angong kídíem nguntítna, doonyiemte asir yana angunko teyong telok laddope ngo kaato.

¹⁴Ngolu takam amolo oletto, delo Hibru agomlok sikepe agom ponako ngo tatto, ‘Saul, Saul, no ngom kapeila iréé dune? Aal goorue atolokke boyigem tukut sukunam kísape, no agíe agíem kítsudung!’ ”

¹⁵Delokrongem ngo “Ruutume, no séko?” emla íngkíto. Ruutum bí poyansukai, “Nokke iréé bomnam Jisumoko ngo.

¹⁶Supak gerepla dakrep sutola. Ngom igul napelang nokke ngom kaanam tatnam emlang delokke ngokke nom lengkan penamem hakii bidope ngo nom melíkpe emla ngo nokkíng lengkan suto.

¹⁷Ngo nom nokke agí amikídí lokkelang Mipak kídí lokke mosiiyé. Ngo nom melíkdung

¹⁸no buluke amigem darmola delokke bulum kaamolokke angunlo, delokke Soitan pauarlokke Shédíkíng laalíkla, buluke míngkelok paab kídíem maab kosula, Shédíke mojisanam gooralo yédokupe langaang langkuka.”

¹⁹“Demílo, Agrippa roje, ngo teyong telokke lengkannam atíem tatmape imang.

²⁰Kera yalumpe Damaskalo duuna kídílo, delokrongem Jirusalemlo duuna delokke Judialo duuna takamlo delokke Mipak kídílo, bulu míílat sukupe aido delokke agí agí míílat sukunamem agí agí agérlok porman bipe aido emla ngo poyilgooto.

²¹Delok legapemino Judai kídíe ngom kumkeng ekumlo umla ngom petdope emla ikítone.

²²Idola siloke longe sope Shédíke igulem ngo paadung delokke dekepe iname ngo so amédak bottedak takamem akampe hakii bidung. Kaaluna miri kídí kelang Mosike depe iyé emla pobinam kékonlo ngo anguyang pomang.

²³Bulu Kristo bí adír geyé delokke kerayalumpe sikolokke gerep kunape iyé, bí agí ami lolang Mipak kídílo angunem pokan gooyé!” embitung.

²⁴Sim Paulke podee sunam agomsim Phesto bí lutumto. Bí ukkai, “Paul no nokke aapí dungkollo duuyimang! Nokke bottepe kénnamde nom tummodung.”

²⁵Paul bí poyansuto, “Mite migom Phesto, ngo tummang. Ngo ingkuem podudí si arue delokke pobang suname.

²⁶Roje sim takam sim kényin sudung, delokke ngo bím poe sumape pobiladung. Si takam si bíkke kénmang tatmanam kamang emla ngo míídung, kapeila sim kéényung konlo inyok sumang.

²⁷Agrippa Roje, no kaaluna miri kídíem arope míídudí? No kéndupe emla ngo míídung.”

²⁸Delokrongem Agrippa bí Paulme pokai, “So moodí anyongo so ngom Kristanpe idope ponom layé emla no míídunía?”

²⁹Paul bí poyansuto, “Anyongo lai ool kolai nom petommang idakkom ngokke agomem tatna takam si patek duunam kékonlo ngokke kísape iduamang emla ngo Shédíkíng kumdung.”

³⁰Roja delang bíkkíng duuna gobornor delang, Bernik lang delokke bulum duubosuna kídíde darepkai.

³¹Bulu ruumdem gínyo langkula mipile luposudola pokai, “Si ami si sige nyogge penam demangkom patek duupenam atí imangai.”

³²Agrippa bí Phesto me poto, “Si ami si Kaisarkíng rogu mangamílo, melen kupe namkuai.”