Read Alladian TOMLÍKNAM 27 Bible Online

TOMLÍKNAM 27 - Alladian bible

TOMLÍKNAM 27

¹Edílo ngolu Itali danpe enpe emla luyin bosutodí, delo Paul melang delokke pateklo duuna ayokonem Roja ruutumlokke sipaying ruutum Juliokíng melíkto.

²Adramutio lokke ngolu Asiape gípena Jajikolo rengala gíto. Aristark emnam, Thesalonikalo duuna Makedonia amiko ngolum gíbosuto.

³Longekon delo ngolu Sidonlo pííto, delo Julio bí Paulme ayala, bíkke angong kídílo gíla bíkke atí-sirí míínamem biladope melíkto.

⁴Delokke siyénglo yuda langkula ngolu asare mutkaa sukolok asarem gísi gepe Kuprio danpe gíto.

⁵Kilikia delokke Pamphilia lokke ampelok gíboola siyéng raadalok yutpatla Lukia lokke Muralo oito.

⁶Delo sipaying ruutumde Aleksandrialok Jajiko Itali danpe endakpe kaala ngolum delo aaboto.

⁷Ngolu delok asoope endan tetela longe bojéko samlíkto delokke Nidus lo píípe díkdari paato. Asare ngolum ngoluke gítíílok gímomape iyédem, ngolu Salmona doolungem dungkasula duuna Krete doolung ayirlok ento.

⁸Ngolu sibelok dadape gíla Lasia taon ampelo duuna Kampona Pígo emnam amongkolo pííto.

⁹Delo ngolu adol líkla, delokke gípeko deteng peso penampe ikai kapeila depe idudelo domape nyodíe gíyin page. Depe ila Paul bí bulum sikepe luto,

¹⁰“Amikídía, ngokke kangkore asi bedasi sibu meyu kala delo jajilokke ekurang kídí ekekom kupla ngolu agíete nyoktak sukandung.”

¹¹Idola sipaying ruutume, Paulke ponamem tatmape igeyéla jaji daibor delokkelang jaji ato delokke ponampe ito.

¹²De pígode dígínlo dongkan mape ikolok, alumyange Phoiniklo pííla dígínlo delo dodope mííla ngolu enyarpe aido emla pokai. De pígode anggo sokko danpelang anggo línggíng danpe mingmue gekasuna Kretelo dungai.

¹³Sokko danlok asare remelpe mutsang yédem, bulu buluke míínampe ibidak emla míítuai; dekepe ila bulu longgorem langon langkula Krete ayirlok ento.

¹⁴Oolkote doomape, “Línggíng sanggo” emnam gumnam asare moopí delok yabaato.

¹⁵Jaji delo gumname aala asarlo gílang yimape ito; dekepe ila ngolu asar loorí delok mela asar muttípe gíto.

¹⁶Ngolu Kauda[15] emnam moopí ayirkolok gíname, dadape jajidelo rínlíknam etkudem mosiito.

¹⁷Ami kídíe mosiirongem sotkyalok gakyonsula rínpum suto. Surtis lokke pígo delo ganpelo emla bulu pesola jaji pak nana dem taalíkla jajidem asar muddulok melíkto.

¹⁸Ngolu gumkolok akén ayén yimape iname longeko delo ami kídíe ekurangem yoblento.

¹⁹Longum nanadelo jaji delokke ekurangem buluke agí alaglok yobyin lento.

²⁰Delo doonyiemte delokke takaremte kaapa yimang iyédem gumnamde mírtíkai, ngolu turnamem míídíí suyimato.

²¹Ami kídíe oolko donam tíínam doyimape enyédem, Paul bí dakrepla buluke keralo poto, “Ami kídía Kretelok gímapeka emla ngokke poyil namem tattuamílo nolu agíe sikena luksonem delokke nyoknamem paamayai.

²²Idakkom supakkom ngo nolum miram langka emdung, kapeila nolu atelkote nyokmayé; jaji petomsi nyokyé.

²³Meyum ngom kaabomna delokke ngokke kumnam teyong kotoki kone ngokke ampelo dakdola poto,

²⁴‘Paul peso mapeka. No Kaisarke keralo bisar kosurupe aiyé; delokke Shédí bí nokkíng gíbosuna takam lokke turnamem ayala, mosiiyé.’

²⁵Dekepe iname ami kídía, nolu aapíe botte langka, kapeila bíkke ngom ponam kísape iyérung emla ngo Shédíme míngke sudung.

²⁶Demang amílo ngolu moopílo ganla duuyai.”

²⁷Íying kolang appi nana yoh delo yoh raajangem daibor kídíde moopílo píídung emla mííduem, ngolu Aria[16] siyéngem gíboo dungada.

²⁸Bulu asi eerídem kangkí toname de mitar íying appikope eeríe ido. Anyongko gírongem bulu kíkí kuname aside mitar íying angum kope eeríe ido.

²⁹Ngolu líírelo tupké supelo emla pesola, bulu longgorem méélam danlo yoplík pala dooreng longe legape kumto.

³⁰Siyéng delokke duknyokpe emla míídola, daibor kídíe jaji keradan delo longgorem melíkla irudola etkudem meruuto,

³¹Delokrongem Paul bí sipaying ruutum demlang sipaying kídíem poto, “Si amikídí si jajiso duumamílo nolu turmayé.”

³²Dekepe ila sipaying kídíde etkung aména dem rínnana aandem gatkín líkla etkudem metelpe melíkto.

³³Píange karmang adape Paul bí bulum takam dotké dopodope poto. Bí poto, “Gíkana looying kolang loopidelo nolu dodí tíídírung kaimape ila doma tíímape gíla nolu atíkote dotomang.

³⁴Supak ngo nolum dotké anyongoko doporu langka emdung. Nolu turla duupe aidung. Nolu sékote agí dumít miyyong kote nyokmayé.”

³⁵Dekepe pogeyéla bí roti ayoko laala bulu takamke keralo Shédíme yidgeto. Delokrongem bí dem penla doto.

³⁶Bulu takam edíípe kaayiisuto delokke agí agíe dotké anyongoko doto.

³⁷Takamem idumsula ngolu midum língko annyi kolang íying kínít kolang akkékope [17] jajidelo kato.

³⁸Buluke míínampe dorodem, bulu gehuem jajie etsa yadope emla asilo yoplíkto.

³⁹Longe píange pííyédem, bulu amodem kangkén yimang, idola siyénge moopí danpe engkén aana pooyingko kaala jaji dem pakla yémílo delo eetet kolo ganlík dope ralkíto.

⁴⁰Longgorem taala bulu rebadem jumbomna aanem taalíkto. Delokrongem asare egelok mutjon dope emla egem jaji kuudum delo donlíkto delo ngolu moopí danpe ento.

⁴¹Idakkom jajide tubesula ganlíkto, kuudumde jonnamrupe tupsula beleng yimang, delo kungkong dande situmlo benmíkkai.

⁴²Sipaying kídíde, patek ami kídíde byalen langkula duknyok kupelo emla bulum petpe emla míírusuto.

⁴³Idakkom sipaying ruutumde Paulme mosiila buluke míírung sunamem imopemang emla mííto. Bí byajina kídíem kerape byalenla moopílo len gedope lulíkto.

⁴⁴Abíde jaji arabelo dírtuna siiteng kodada bomla byalendope poto. Dekepe mipile moopílo aipe lento.