Read Alladian TOMLÍKNAM 28 Bible Online

TOMLÍKNAM 28 - Alladian bible

TOMLÍKNAM 28

¹Ngoluke gísing gekuko moopíde ngolu kangkén kuname siyéng gooralo duuna Melita emnam moopí amonge.

²Among delokke ami kídíe ngolum apekrupe ayangem lengkanto. Bulu emeko parla ngolum takam toriksuto kapeila depe iduem pedonge ola ansinge idokuai.

³Paul bí tasuk taruklok atítko uudumsuto delokke, bí dem emelo uulík name, eme pamkilok tabíko yillenla bíkke lakpongem kelgo bomto.

⁴Among delokke ami kídíde bíkke alaglo tabí kelgo bomnamem kaala, bulu pobosuto, “Si ami si berokpe ami petna kuape kapeila bí asilok byapí suge tungkuai, Ruune bím gérmang motung.”

⁵Idakkom Paul bí tabídem emelo píkdan líkto delokke bím atíyang imang.

⁶Ami kídíde bíkke amíle bííyé demangkom bí menang asak oletla siyé emla míítuai, idola oolko doorongem kaaname bíkkíng atíyang kamang, iname buluke aapíe angupe gedo langkula bí shédí komin emla manbosuto.

⁷Delok amo delokke anínlo moopí amo delokke ruutum Pobioke aríkko dungai. Bí ngolum agí ekumlo tomla delo longum kokai ngolum ashéng angampe duumoto.

⁸Bíkke abude ramnam kila delokke rayu bídla bisonalo ketto. Paul bí bím kaape emla gíato delokke, kumgeyéla agí alage bíkke teyolo leetan líkla bím ipítoku.

⁹De dekepe iyédem, amo delokke kina ramna abíd kídíete aala ipí kosutoku.

¹⁰Bulu ngolum mínggela amanem bito, delokke ngolu gíkupe iyédem, ngoluke míínam kídíem bulu ngolum bilíktoku.

¹¹Poolo angum méélamlo amodelo dígíne aala ikolok ngolu siyénglo jajilo aatoku. De Aleksandriake kuutílo Kastor delokke Polluks emnam gyappum suna murti kana jajiko.

¹²Ngolu Surakoslo doola delo longumko duuto.

¹³Delokke ngolu gílen langaala Regiolo pííto. Longekon delo sokko asare mutto, delokke longkon delo ngolu Potioli lo pííto.

¹⁴Delo bulukíng hoptako duubo sudope tomna bírueke ayoko paato. Dekepe iname ngolu Romlo pííto.

¹⁵Delo duuna bíro kídíe ngolu aadung emnamem tatla Appio bojar lokke Mibo ekum Angum emkolope ngolum kaaríksupe gíto. Sok ami kídí sokke akorem kaala Paul bí Shédíme yidgeto delokke mííyumsuto.

¹⁶Ngolu Romlo pííname, Paulme sontori gooralo bí agíe duusudope meto.

¹⁷Longum méélamlo bí Judai ruutum kídíem tomdum suto. Buluke dumsuduem, Paul bí bulum poto; “Ngokke bíro kídía, ngoluke ami kídíem ikí sumalate demangkom ngoluke buku neku niyomem ipéé sumalate ngom Jirusalemlo umla Rom ami kídílo melíktung.

¹⁸Bulu ngom kangkí tatkí geyéla melenkupe míítuai, kapeila ngokke sige nyogge penam imem bottena atí imang.

¹⁹Idakkom Judai kídíe dem tomape iyédem, ngom Kaisarkíng rogu rudope imoto depe idokom ngo ngokke ami kídíem gusor ipe emla mííla imang namoko.

²⁰Sok legapemin ngo nolum kaariksula nolum pobo sudope emla kotone. Si Israel kídíke míínam sunam legalok moko sok íkolisok yéétune.”

²¹Bulu poyansukai, “Ngolu Judialok nokke legang sithi atí paamang, delokke delok aana bíro kídíde sékote pobina kamang demangkom nom atímang emla lugena kamang.

²²Idakkom ngolu nokke míngkorem tallídung, kapeila rego mipílok amie nokke yéko opéé sokke mirupe podung emla ngolu kéndung.”

²³Bulu Paulme longeko kaarík sukupe emla iruuto, delokke bojéyape bíkke dungko delo amie aato. Rohlokke ila yumelope bí pomík poruem pobila, Shédíke yéta legangem bulum pobila delokke Mosike Ayon lokke lang delokke kaaluna miri kídí agomlokke poyon sula Jisuke legangem bulu arue emla míídope ralbomto.

²⁴Ayokone bíkke agomlok arue emla míngkaku, idakkom abíde arope míítomang.

²⁵Bulu agí aralo popéé bosula luyin poyin nape sim agom sim Paulme popala gíkaku: “Kaaluna miri Isaiah kelok nokke buku nekuem Deena Aidlok ponade airunako.

²⁶Kapeila bí poto: ‘So amikídí so gíla polangka, nolu tattí abuuyé idakkom edílokom tatkén mayé; Nolu kaatíyé idola edílokom mínggap mayé.

²⁷Kapeila sok ami kídí sok aange tolkai; Bulu agí nyorunglok tayyimang, delokke bulu agí amigem mingma moto. Demang amílo bulu agí amiglok kaayai, agí nyorunglok tayyai, agí aapí ainalok kénla delokke mííba langkula delokke ngo bulum ipí yékuai.’ ”

²⁸“Delok legape Shédíke turnam bedangem Mipak kídílo melíkto, delokke bulu tayyé dem nolu kényépe emla ngo míídung!”[18] emla Paul bí poto.

³⁰Kapeila tagnyi dem Paul bí agí bara ekumlo duula bím kangaana takamem aipe kaaríksuto.

³¹Mirampe delokke atí mínge sumape bí Shédíke yétem poboto delokke Ruutum Jisu Kristoke legangem poyilto.