Read Alladian TOMLÍKNAM 7 Bible Online

TOMLÍKNAM 7 - Alladian bible

TOMLÍKNAM 7

¹Delokrongem ríne ruutumde, “Si agom kídar si aro dunía?” emla ííto.

²Sim Stephan bí poyansuto, “Abu bíro kídía, ngokke agomem tatgap bitola! Ngokke abu Abraham bí Haranlo duumang adape, bíkke Mesopotamialo duudung adape, bíkkíng Shédíke angun ralname aato.

³Shédí bí poto, ‘Nokke doolung emlang nokke erang kídíem megeyéla ngokke nom sullík peko amolo gílentola.’

⁴“Dekepe iname bí Kaldian amongem megeyéla Haranlo duuto. Bíkke abu sirongem, noluke supakke dungko amoso bím Shédí bí melíkto.

⁵Bí Abrahamme so dungge pena bimang. Idakkom Abrahamke oo kamang adape bílang bíkke méélamlo yépena bíkke ome-oo kídíe Shédíke tomlíknam amongem duubomyé emla Shédí bí bím poruu bito.

⁶Shédí bí bím sikepe pobito: ‘Nokke otíng oyine agí amolo yémape mibo amolo mibope duuyé delo bulum abílpe meyé delokke dítag língko appikope iréé kosuyé.

⁷Idakkom buluke abíl bílkeng ami kídíem ngo ingééyéku, delokke méélamlo bulu delok among delokke lenlangkula so amoso ngom kumsuyéku.’

⁸Delokrongem bí Abrahamme dínbíng iyod [4] daapongem bito. Delokrongem Abraham bí Isaakke abupe ila delo Isaakme orongem longe píínyinanalo dínbíng iyodto. Méélamdem Isaak bíte bíkke Jakobme depe ito, delokrongem Jakob bíte bíkke oo noluke buku íying kolang annyidem depe ito.

⁹“Buku kídíde Josephme nela Ijipt amolo abílpe kolíkto. Idakkom Shédí bí bíkkíng duumínla

¹⁰delo bím ankí keno takamlo igulto. Bí Josephme kénnamem bila Ijipt lokke roja Pharaohke mííbape yémoto; depe ila Josephme Ijipt among lokke lang ekum erang ruutumpe Ijipt rojade melíkto.

¹¹Depe iduem Ijipt among takam emlang delokke kanaan amongem díríe aabomla ankí kenue sengéémoto, delo ngoluke abu kídíe dopenam paayimato.

¹²Edílo Jakob bí Ijipt amolo aam kadung emnamem tattodí, delo bí ngoluke abu kídíem delo amodelo kera yalumpe enmoto.

¹³Buluke lennyinape endodelo, Joseph bí agíem bíkke bíro kídí delo pokan subito delokke Pharaoh bí Josephme ekum erangem kénto.

¹⁴Depe irongem, Joseph bí agí abu Jakob melang bíkke erang tabung, íying kínít kolang pilngodem langaang dokupe ami melíkto.

¹⁵Jakob bí Ijiptlo ento, delo bílang ngoluke buku kídíe silíkkai.

¹⁶Buluke simang kídídem Shekemlo bomlangkula delo Abrahamke Shekemlo murkolok Hemorke oo kídílok renam agodelo yuto.

¹⁷“Shédíke Abrahamme pébisunam agomem ipíídí longe píído delo Ijipt lokke amie bojé yangkai.

¹⁸Delokrongem Josephme kénmana roja angu konko, Ijipt lokke ruutumpe ikaku.

¹⁹Bí ngoluke ami kídíem atírumape ila delokke buluke anípe onam ojing kídíem siyépe emla luyulo elpakdope ila bulum irééto.

²⁰Depe idudelo Mosime oto, delokke bí emmumna ko mangkuai.[5] Kapeila bím poolo angum kopekai abue ekumlo aipe usaato.

²¹Edílo bím luyulo mepaktodí, delo Pharaohke omede bím laala agíke oo kísape usaato.

²²Mosime Ijipt kídílokke kénnam takamem poyilto delo bí agom aanglo delokke agérlo sengéé nakuai.

²³“Mosike dítage íying appi pííyédem, bí agíke Israel ami kídíem kangkípe emla mííto.

²⁴Bí buluke akondem Ijipt amikone iréé bomdupe kaato, depe ila bí bím kaarésula Ijipt amidem edo rala petyan sutoku.

²⁵Bíkkíng Shédí bí, ami kídíem mosing dungku emnamem bulu bím kénsuyépe emla bí míísutuai idokom bulu depe míímang.

²⁶Longekon delo Mosi bí momínsuna ami annyikolo aala poto, ‘Ami annyia, nonyi bíro kumsue moko, nonyi kapeila akone akonem tarí iket tope emla idune?’ emla bí bínyim jonbo suyékupe emla poto.

²⁷Idola akon dem atímape iyonade Mosime níípak dola pokai, ‘Séko nom ngoluke teyolo ruutum pelang bisar nape melíktune?

²⁸No melo Ijipt amikonem petnam kísape ngomte petpe míídunía?’

²⁹Mosi bí dem tayyédem, Midian amolo duknyok geto, delo bí mibope duula oo annyikote oto.

³⁰“Dítag íying appiko irongem, Sinai dííte anín lokke moonam kolo, teyong kotoki kone emepe írna pasumkolo Mosime lengkansuto.

³¹Bí dem kaayédem, irisinyo kísape mííto. Bí ayirdelo kaape emla gínín name, bí Ruutumke agomem sikepe tatto,

³²‘Ngomino nokke abu kídíke Shédíe, Abrahamke, Isaakke delokke Jakobke Shédíe.’ Mosi bí pesuem dan gosu geto delokke kaasu lamape ito.

³³Delokrongem Ruutum bí bím pokai; ‘Nokke leyugem yukbín sutola; nokke dakko amosi deena amonge.

³⁴Ngom arope Ijiptlo ngokke ami kídíem iréé namem kaasuto. Ngo buluke sigínem tatsuto delokke ngo bulum mopít kakupe emla aadung. Supak aatola, ngo nom Ijiptlo melat líkyéku.’

³⁵“Si Mosi simino buluke, ‘Séko nom, ruutum pelang bisar nape melíktune’ emla lupak suname. Ami kídí delokke teyolo ruutum bodope delokke moonam pasumlo lengkansuna teyong kotokilok Shédí bí agíe mopít dokupe bím melíkto.

³⁶Bí Ijipt lolang Líína siyénglo irisinyo iyod sangodem ila delokke mooruk amolok tagying appikope ami kídíem gílen botoku.

³⁷Si Mosi simino Shédíke ‘Noluke amikídí aralok ngok kísana kaaluna miriko melíkyé’ emla Israel ami kídíem pobinamde.

³⁸Bí ngoluke abukídíem mooruklo yébola delokke Sinai Díítelo bím agom pona teyong kotokiem yébosune; delokke bímino ngolukíng meyon sudope Shédíke turna agomem paane.

³⁹“Idakkom ngoluke abu kídíe bím tatbimato. Bím tatbimape igeyéla, bulu bím lupaksula Ijiptlo buluke aange dungkaku.

⁴⁰Bulu Aaronme poto, ‘Ngoluke kerangem gígedope ngoluke legape shédí kísanako pílangka. Ngolum Ijiptlok gílen bokuna ami Mosi simdan kape ikadí ngolu kénmang!’

⁴¹Depe ila bulu gooru oo mimangko píla, delo ato siro paklíkla buluke písunam delok legape doman doto.

⁴²Idakkom Shédí bí ngengkur dolangkula taleng telokke takar kídíem kumsudope bulum mebito. Si kaaluna mirikídí atnam kitablo sikepe kadung: ‘E, Israel opína, mooruk amolo íying appi dítag kope nolu ngom atí atí petlík bila aman bitonía?

⁴³Nolu Molekke dungkuem lang delokke noluke kumsupe emla písunam Rephanke mimang emmin joobomtone. Delok legape ngo nolum Babilon kékonlo menyokyé.’

⁴⁴“Ngoluke abu kídíe, Shédíke duumín geko kémp monamko mooruk amolo kato. Sim Shédíke lulíklok, Mosike kaanampe moto.

⁴⁵Notko dem paala, Joshuake gooralo ngoluke abukídíe buluke kangkolo Shédíke monpak bikunam angu opín amolo aadodem bulu dem bomato. Si Dabidke longelope delo amodelo duuto.

⁴⁶Dabid bí Shédíke kaabape yéla delo Jakobke kumsunam Shédíke dungkengko modope Shédíkíng koto.[6]

⁴⁷Idokom Solomon min bíkke legape ekum mobinade.

⁴⁸“Depe idokom teyong yalum Shédí bí tani monam ekum kídílo duumang. Sim kaaluna miri kídíe sikepe podung.

⁴⁹“ ‘Taleng te ngokke umkéyé, delokke amosi ngokke ale tukenge. Ingkona ekumko nolu ngokke legape mobiyéne? Ruutum bí podung. Delokke Ingkoloda ngokke duuno supekue?’

⁵⁰Si takam ngokke alaglok pínam mangía?

⁵¹“Nolu aapí lolang nyorunglo dínbíng iyod sumana aapí angkam gena ami kídía; nolu abu kídí kísa pakpe idung. Nolu agínpe Deena Aidem itum suyardung!

⁵²Noluke abu kídíke iréé kímanam kaaluna miriko kato langa? Deena ami sokke aapenam legangem poto subina kídíem bulu petto. Delokke supak nolu míírí míínyola bím mokato.

⁵³Nolumin teyong kotoki kídílok melíknam ngiitomem torík sugeyéla dem igemana kídíe.”

⁵⁴Kebang ami kídíde dem tayyédem, bulu marlínge meyope ibomsukai.

⁵⁵Idakkom Stephan bí, Deena Aidlok bíísétla, teyong amope kaadu suname, Shédíke angun ralnam emlang, delokke Jisume Shédíke lakbíklo dakdope kaato.

⁵⁶Bí pokai, “Kaatola, Teyong amonge siyyala delo Tanike Uem Shédíke lakbíklo dakdope ngo kaadung.”

⁵⁷Delo bulu agí nyorungem pokap sudola agíípe ulo gokla bíkkíng dukdum suato.

⁵⁸Bulu bím taon delokke solen bomla elílok bím gegong bomkai. Hakii kídíde buluke ege galugem Saul emnam yaamé koo delokke ale keralo medumsuto.

⁵⁹Bulu bím elíng gedungem, Stephan bí “Ruutum Jisu, ngokke aidem laalangka,” emla kumto.

⁶⁰Delokrongem bí lebíng konídola “Ruutume sim paab sim bulukíng edo sanket mapeka” emla ulogokto. Dekepe ulo goklangala bí sikai.