Read Alladian TOMLÍKNAM 8 Bible Online

TOMLÍKNAM 8 - Alladian bible

TOMLÍKNAM 8

¹Delok longe delokke ila botterupe Jirusalem mondoliem irééto, delokke Judia lolang Samarilo, tomlíknam kídí kékon takame byakpansuto.

²Míngkesuna amieke Stephanme yuto delokke bíkke teyolo ankí kenue séngéépe ito.

³Idakkom Saul bí mondoliem nyokmodope emla koole miyolo gígoola, mimedak milodak sodumsula pateklo líkto.

⁴Pitpansuna kídíde buluke gítílo dooyingem poying gooto.

⁵Samari lokke taonlo Philip bí gíto delokke Kristoke legangem delo pogooto.

⁶Ami kídíde Philipke irisinyo iyod sangodem tayyé kaayédelo, bíkke ponamem aipe tatgapto.

⁷Deddína amilok deemana aid kídíe ngerpík langaala lentoku, delokke pittempe kina delokke lebya lakbyana amiem bojéko ipítoku.

⁸Dekepe ila delo taon delo ashérunge ito.

⁹Depe iduem, Simon emnam amiko delo taon delo jadu montrong ila Samari ami kídíem irisinyo kísape míímo dungai. Bí agísue bottena amikope míngkím sudungai,

¹⁰delokke ami takame, bottedak amédak bím pesope míídola, “Si ami simino teyong lokke botteruna pauare” emdungai.

¹¹Sok jadu montrong sok deddína longem ami kídíem irisinyope míímo kolok bulu bíkke agomem taddungai.

¹²Idakkom Philip bí Shédíke yétalokke tatpona dooyingem pobila ikolok bulu Philipke agomem arope talla, Jisu Kristoke amínlok mime milope baptis laasuto.

¹³Simon bí agíe arope míngkesula baptis isuto. Delokke bí bottena irisinyo iyodem kaala, rego mipílo Philipkíng gímín geto.

¹⁴Jirusalemlo duuna tomlíknam kídíde Samari doolunglo Shédíke agomem torík sunamem tayyédem, bulu Pitor melang Joanme bulukíng melíkto.

¹⁵Bulu pííla, ami kídíde Deena Aidem paayépe emla bulu kumbito.

¹⁶Kapeila Deena Aide bulukíng sékokíte aamang ada bulu Ruutum Jisuke amín petomlok baptis isutungai.

¹⁷Delokrongem Pitorlang Joan bí bulukíng alage pipodola kumlíkto, delo ami kídíde Deena Aidem paato.

¹⁸Simon bí tomlíknam kídíke alag leepo kolok Aidem binamem kaayédelo, bí bulum murkong bidola poto,

¹⁹“Ngokke alag leeponam miyonge Deena Aidem paadope ngomte dem ralnamdem bilangka.”

²⁰Pitor bí poyansuto, “Nokke murkode nokkíng nyoksu langka. Kapeila Shédíke amanem no murkolok relayé emla mííto!

²¹So agérso nokke tarong kamang, kapeila nokke aangde Shédíke keralo aimang.

²²Dem atímana aapídem maab dokupe míílat sulangkula Ruutumme kumlangka. Demílomin nokke dekena belumna aapídem maab biyékune.

²³Legadem ngo kaaname no nenam ponam mílípe ila paab gumpírlo dung.”

²⁴Delo Simon bí poyansuto, “Noluke ponam kídarde ngokkíng kamadope, Ruutum kíng kumbi langka.”

²⁵Bulu hakii bila Ruutumke agomem pokan bigoo rongem, Pitorlang Joan bínyi dooyingem deddína Samari doolung kídarlo pogoo langaala Jirusalempe entoku.

²⁶Depe iduem Ruutumke teyong kotokikone Philip me pokai, “Jirusalem lokke Gajalo gína mooruk bedang lok gína sokkodan bedalok enkala.”

²⁷Dekepe iname bí gílenkai delokke bíkke bedalo endungem bí Ethiopia Rani lokke bottena murkong ruutumpe ina Ethiopia[7] mumbalko kaaríksuto. Si ami si Jirusalemlo kumsu kape emla gíto,

²⁸delokke bíkke ekumlo endakkuem guré gaari kolok Kaaluna miri Isaiahke Kitabem pori langaala endakku.

²⁹Aide Philipme, “Elo guré gaari elo gíkala duumín getolangka” emla lulíkto.

³⁰Delo Philip bí guré gaari delo dugaala tatname amidem kaaluna miri Isaiahke Kitabem poridupe tatto. “Nokke pori namdem no tatkén dunía?” emla Philip bí íngkíto.

³¹Amide pokai, “Ami akone ngom pobeng bimadem kape kísa ngo tatkén yéne?” Dekepe iname bí Philipme guré gaaridelo bím duubo sudope bím tomnínsuto.

³²Kitab delo bíkke paanam agomde sikepe kadungai: “Petlík penam mér kísape delokke amíd ngíbínna keralo dengepe dakna mérbeno kísa bím gíboto, dekepe iname bíkke nappange kosatmang.

³³Bím iréé kolok bíkke paapenam jonna bedangem itumto. Séko bíkke opínem pokén biyéne? Kapeila bíkke turnamem tani amosokke laatoku.”

³⁴Mumbalde Philipme íngkíto, “Ngom ayasula pobitola, séko kaaluna miride, bí agísua demangkom akonkua?”

³⁵Delo Philip bí delok agom atnampak delok polangala Jisuke legang tatpona dooyingem bím pobito.

³⁶Bínyi bedadelo enbo sudungem asi eke kaapato delo mumbalde pokai, “Kaatola sina asie ngo baptis ila sumayénía?”[8]

³⁸Delo bí gaaridem lutum pooto. Delokrongem Philiplang mumbalde bínyi asidelo oila Philip bí amidem baptis ito.

³⁹Bulu asi delok lenyé kudem, Ruutumke Aide menang asak Philipme laanyok bomkaku, delokke mumbalde bím kaapang yikumang, idokom ashéng langaala entoku.

⁴⁰Depe idokom Philip bí Ajotalo lentoku delokke bíkke kaisarialo píímang tetengem dooyingem taon takamlo pogoo langaala ento.