Read Alladian TOMLÍKNAM 9 Bible Online

TOMLÍKNAM 9 - Alladian bible

TOMLÍKNAM 9

¹Depe idungem, Saul bí Ruutumkelo luyilsuna kídíem sengéépe míírí míínyo bomkai. Bí ríne ruutumlo gíla

²mimedak milodak bedalo paanam takamem umla bulum Jirusalem pateklo líkdope Damaskalo duuna kumkeng ekumlo sithi atlíkdope koto.

³Bí Damaskalo píínín yéname, menang asak teyong telok angun asirko bím nguntít bomkai.

⁴Bí amolo oletto delo sikepe agomko bím podope tatto, “Saul, Saul, kapeila no ngom iréédune?”

⁵“Ruutume no sékoda?” emla Saul bí íngkíto. “Ngo nokke iréé bomnam Jisu moko” emla bím poyansuto.

⁶“Supak darepla taon elo gíkala, delo nokke ipenamem pobiyé,” emto.

⁷Saulkíng enmín gena ami kídíde agom poyi mape dakto; bulu agomem tatto idola ami kaapamang.

⁸Saul bí amodelok dareptoku, idakkom bíkke amige pongka sukupe iname bí atí kaapa yimang. Dekepe iname bulu Damaskalo bím alaglok gaklíkto.

⁹Longum kokai bí mingmala, atíkote doyi tííyimato.

¹⁰Damaskalo Anania emnam luyilsuna amiko dungai. Ruutum bí bím immalo “Anania!” emla gokto. “E, Ruutum” emla bí poyansuto.

¹¹Ruutum bí bím poto, “Judake ekumlo jonnampe gíkala delo Tarsa lokke Saul emnam amidem mata langka, kapeila bí kumdung.

¹²Immalo Saul bí Anania emnam amiko kaato delokke amide bíkke teyolo alage leetanla bíkke amigem migdar motoku.”

¹³Anania bí poyansuto, “Ruutume, ngo sok ami sokke legangem delokke Jirusalemlo duuna nokke ami kídíem bíkke iréénam takamem taddung.

¹⁴Delokke bí ríne kídílok agomem paala nokke amínem míndasuna takamem umpe emla so aadung.”

¹⁵Idola Ruutum bí Anania me poto, “Gíkala! Si ami si ngokke amínem mipak kídílo delokke buluke rojakídí kerang lolang Israel amikídílo pogoodope ngokke ullen namko.

¹⁶Bí ngokke amín legape edítko aréé gepe aidodí dem ngo bím lengkanyé.”

¹⁷Delokrongem Anania bí ekum delo gíla aralo aato. Bíkke alage Saulke teyolo leeda sudola bí poto, “Bíro Saul nokke so endagem bedalo nokkíng lengkan suna Ruutum Jisu bí no migdar dokupe delokke Deena Aidlok bíísét dope kumbidope ngom melíktung.”

¹⁸Menang asak bíkke amiglok engo tarku kísaneke oletla bí kaapatoku. Bí darepla baptis isuto,

¹⁹delokke dotké anyongko dorongem, bí ekertoku. Saul bí Damaskalo luyilsuna kídíem yébosula oolko yéto.

²⁰Menang asak bí Jisu bímin Shédíke Ue emla kumkeng ekum kídílo ngiitom gooto.

²¹Bím tatna takamde irisinyope mííla pobosuto, “Si ami si Jirusalemlo Jisuke amínem kumsuna kídíem iréé sinyola igoona ami demangía? Delokke bulum yééla ríne kídílo aabo dokupe so aamanía?”

²²Depe idokom Saul bí pakyape pauar kala Jisu bímin Kristo[9] emla porman bila Damaskalo duuna Judai ami kídíem agom pogepeko kaimadope ito.

²³Oolko doorongem Judai ami kídíe bím petpe emla míírí míínyo bomkai.

²⁴Idokom Saul bí buluke míírí míínyo namem kénsuto. Longe yohpe bulu taon luyab kídílo bím petpe emla totíbomto.

²⁵Idakkom bíkkíng yémín gena kídíe yuem bím kiirolo líkpala kirkilok leyyi líktoku.

²⁶Bíkke Jirusalemlo aadodem bí luyilsuna kídí delo leko bosupe emla ikíto, idakkom bulu takam bím luyilsuna arokoya aro mangkoya emla pesoto.

²⁷Idola Barnaba bí Saulme langaala tomlíknam kídídelo aaboto. Saul bí bíkke bedalo endungem kape kísa Ruutumme kaatodí delokke Ruutum bí bím agom potodí delokke kape kísa peso yimape bí Damaskalo Jisuke amínlok ngiitom pobitodí dem Barnaba bí bulum pokan bito.

²⁸Dekepe iname Saul bí bulukíng yébosuto, Jirusalemlo dupoope duula Ruutumke amínem mirampe poboto.

²⁹Bí Grik agom pona Judai kídíem pobosula delokke akkísula ito, delo bulu bím petpe emla ralbomto.

³⁰Bíro kídíde dem kényédem, bím Kaisarialo melíkla delokke Tarsalo menyok líkto.

³¹Delokrongem Judia, Galil delokke Samari among takamlo mondoli kídíe dengepe yéto. Delo edíí mola, delokke Deena Aidlok aapí miramem paala, de bojé yayang ila Ruutumme pesola yéto.

³²Pitor bí doolunglo gígooname, Lidialo duuna Shédíke ami kídíemte kaape emla gíto.

³³Delo bí Ainia emnam amiko paato, bí dítag píínyi kokai pittempe kila bisonalo keddungai.

³⁴Pitor bí bím poto, “Ainia, Jisu Kristo bí nom ipí dungku. Gerepla nokke ketpuem mesiitola.” Menang asak Ainia bí darepto.

³⁵Lidia lolang Sharonlo duuna takame bím kaala Ruutumkíng míngkesuto.

³⁶Tabitha (Dorka emlangkom attung) emnam luyilsuna, agínpe aina agérem gérla delokke opan kídíem igulnako Joppalo dungai.

³⁷Depe idudelo bí kila sikai, delokke bíkke simadem írbínla teyong yangke ruumlo meto

³⁸Lidiade joppalokke anínlo kadungai dekepe iname luyilsuna kídíde Pitor bí Lidialo dung emnamdem tayyédem, midum annyiko bíkkíng melíkla bím “Ayasula menape aabi poyika!” emla roguto.

³⁹Pitor bí bulukíng gíbosuto, delo bí pííyédem bím teyongke ruumdelo gílíkto. Meyéng takamde simang ampedelo duudula bím Dorkaske sumbinam ege galugem lengkanla kapla rííla ito.

⁴⁰Pitor bí bulum takam ruum delokke melentoku; delokrongem bí lebíng koníla kumto. Mime simadelo ngéénín dola bí poto, “Tabitha, gereptola.” Simade amige migdar lenkaku, delokke Pitorme kaasu dola bí duurepto.

⁴¹Pitor bí bím alaglok gakrepla dakrep moto. Delokrongem Pitor bí míngkesuna kídíem, delokke meyéng kídídem gokla bulukíng bím turdokupe mebito.

⁴²Sim Joppalokke ami kídíde kén yinto, delo amie bojéko Ruutumkíng míngkesuto.

⁴³Pitor bí oolgamko Joppalo samra agér gérna Simonkíng duubosuto.