Read Alladian ROM 1 Bible Online

ROM 1 - Alladian bible

ROM 1

¹Kristo Jisuke béérang, tomlíknam amipe idope delokke Shédíke tatpona dooyingem pobidope tomlennam Paul kelok sim attung.

²Deena Dooying Kitablo atnam kísape, Shédí bí kerango pekai kaaluna miri nappalok tatpona dooyingem pébisutung.

³De bíkke Oo, ngoluke Ruutum Jisu Kristoke legange bí Dabidke adololok lenne;

⁴bím teyongke deenam ayonlok pomílo sikolokke kiirep langkula botteruna ralnamlok Shédíke Oope idope lengkanto; de ngoluke Ruutum Jisu Kristo bí.

⁵Bíkkelok delokke bíkke amín legape ngolu yanggong emlang míngkenglok lenna mipak kídíem tomlennam agérem gérla tomlíknam amipe idope ngolu paatung.

⁶Delokke nolukom Jisu Kristo kepe yédope tomlennam kídí aralokke ayokone.

⁷Shédíke ayanam delokke agíke oope tomlennam Romlo duuna takam kídílo salame. Ngoluke Abu Shédí kelang Ruutum Jisu Kristo kelok yanggong elang yéponame nolukíng duudaklangka.

⁸Kerayalumpe, nolu takamke legape Jisu Kristo kelok ngokke Shédíme yidgedung, kapeila noluke míngkengem tani among tabuso tayyinkai.

⁹Bíkke Oo legang tatpona dooyingem pogong kolok ngokke aapí-ainange kumnam Shédí bí ngokke ponamde arodudí delokke hakiisue. Ngo nolum míípo sudung emnamdem Shédí bí

¹⁰ngokke kumrum mipíem kéndung. Méélamyalumpe supak nolukíng aadope Shédíke míísalok ngom bedangem iloo bidope ngo kéndung.

¹¹Nolu ralgedope ngo nolum aid amanem bidope emla ngo nolum kaalínge idung.

¹²Depe ngokke míínamde nolulang ngo mipil míngkelok luír poír bosudope mííname.

¹³Ngokke bírokídía, nolum ngo kangaape emla ngo deddíko míítuai idola agínpe atíko ngom depe imomape itíto. Ngokke Mipak kídí abídlok inam kísape, ngo noluke goorang lokkom ali gatkupe míítuai.

¹⁴Ngo Grik amikídí lolang Grikmang kídílo, kénna loteng delokke kénmana loteng pope runampe idung.

¹⁵Depe ilamin dooyingem Romlo duuna kídí nolukíte ngo polínge idune.

¹⁶Ngo ngiitom tatpona legape annyi sumang kapeila míngkesuna miyong lokke kerape Judialokke delokrongem Mipak lokke turnam legape Shédíke pauar lokmin kadune.

¹⁷Legape tatpona ngiitomde edítko Shédí bí ami kídíem bíkkíng yéjii modungkudí dem lengkandung; keralokke ila yéyinlope míngkeng lokmin kadune. Dooying kitabe pobitung, “Míngkelok Shédíkíng yéjingkuna amide turyé.”

¹⁸Agí mirul agérlok aruem tujémna mirul amikídí delokke Shédí kamana ami takamlo teyong telok Shédíke marlíngem lengkantung.

¹⁹Kapeila Shédíke legangem kénpe namde kénpodung legade Shédí Bí agíe bulum dem kéndope ibitung.

²⁰Shédíke among talengem pílendak delokke ila, bím kaapang manam akor, bíkke turyarna pauar emlang bíkke teyong akorem, berokrupe ikanto; bulu Shédíke pínam atíem kénto. Dekepe iname dem amikídí dem maab berokmayé!

²¹Kapeila bulu Shédíme kéntuakom, bím Shédíe emla erkí petemang demangkom bím yidge petemang, idola buluke mííyi míísade kaaba mangkai delokke buluke mide aangde kaamokai.

²²Bulu milo arope míísu tuakom, midekíai

²³delokke Shédíme erkí penamem tani, kebung pettang, simon sili, tabí tayo mimang monamlo erkílatto.

²⁴Delok legape Shédí bí bulum akone akon amílem bulmodope belum bekampe aapí gela bulum abír ajon ikolo melíkto.

²⁵Bulu Shédíke aruem menamlok líkpé sudung, delokke pínem kumpe namem pínam atíkídíem kumlatdung. Pílennade agínpe yidge pename. Amen.

²⁶Sikepe ikolok, Shédí bí bulum annying runam agí agérlo mepaklíkto. Buluke mimete buluke ketbo doobo sunamem kampona bedangem megeyéla ibaa manam bedalok ila imemdung.

²⁷Dekepe miluete kampona bedalok mimem ketbo supenamem megeyéla akone akonem kaabo mínsudung. Milo eelene annyirunam agérem ibo sukolok buluke teyolo agí agísue imem ajéngem gesudung.

²⁸Sokke teyolote, bulu Shédíke gyanem bomgappe emla míímang kolok ipenamem megeyéla bí bulum ipemanam agérem idope atímana aapí aanglo melíkto.

²⁹Bulu atímana mirul aapí, eduk edak, kaabo tatbo delokke rotbín ibín aapí mílípe ikai. Bulu nenam ponam, níkka moka, monam díínam, yadnam panam delokke kangki tatki mílípe idung. Bulu luge pogena,

³⁰loobakna, Shédíme kangkina, míngki kangkina, kenyékna delokke yidsuna kídíe; bulu atímana bedangem malenne; bulu agí ane abu agom tatmane;

³¹bulu kéníng pale mane, míngke sumane; aapí gemane, ayang kamane.

³²Bulu sikepe ina kídíde nyokpena kídíe emla yéjiinam agomem Shédíke pobinamem kéndungakom, bulu sikena atí kídíem iyarnam petommang, sikepe agér ina kídí emkom tolíkdung.