Read Alladian ROM 11 Bible Online

ROM 11 - Alladian bible

ROM 11

¹Ngo tatkídung, demílo Shédí bí agí amiem topak sutonía? Topak sumang! Ngo agíe Israel amisue, Benjaminke opínlok lenna, Abrahamke otínge.

²Shédí bí bíkke kerapekai toruu sunam amiem topak sumang. Elijahke legangem popangko agomlo Dooying kitabe kape kísa bí Shédíme Israel mirupe rogutudí dem sikepe ponamem nolu kénmanía?

³“Ruutume, bulu nokke kotoki kídíem petla delokke nom kumsu pekuem bénpak bito; ngo petom supak so dung, delokke bulu ngom petpe emla raltídung.”

⁴Delo Shédí bí, bím kape kísa poyan sutone? “Ngokkesupe ngo éjar kínítko Baalkíng tolík sumana amieke mesutung,” emto.

⁵Dekepe siro meyumkom yanggolok ullennam orekko kasudung.

⁶Delokrongem yanggolok idumílo, demílo si agérlok kamang; si agérlok katuamílo, yanggode yanggope iyimayai.[14]

⁷Demílo kape? Ingkuem Israele mínggapla matatodí dem bulu paamato, idola ullennam kídíe dem paato. Abídde aapí angkam geto.

⁸Dem sikepe attung: “So longe sope bulu amig gedokom kaapa madope nyorung gedokom tatpa madope Shédí bí mide aidem bulum bito.”

⁹Delokrongem Dabid bí podung: “Buluke doman tímande língkitlok gakkepe, bene siitupe delokke anngéé sukepe idak langka.

¹⁰Buluke amig kídarde kaapa madope ruak daklangka, delokke buluke lamkude agínpe tunggír ayar daklangka.”

¹¹Ngo lekoda tatkí dungku, bulu mosii layi madope olet kanía? Depe imang! Demepenem, buluke imemsuko lokmin turnam bedange Mipak kídílo pííla Israel kídíe akdope idungkune.

¹²Idakkom buluke imemde tani gíídang sokke ayang igullo mirem legape idung. Demílo Judai kídíe apíípe idum sumílo edítko botte yana ayang igule duuyane!

¹³Mipak kídí nolukíng ngo supak podung. Ngo Mipak kídílo tomlíknam amipe idulate dem ngo ngokke agérem edíírupe míísudung.

¹⁴Ngokke opín kídí emkom ngo akdope ila delokke ayokonem itur layéku emla míídung.

¹⁵Legade bulum mepak rongem taniem Shédíke mirupe imoyimape bíkke angoope imo tungku. Demílo bulum torík sumílo kape iyékun? De sina kídílokke turkepía iyéne!

¹⁶Kerangke roti alopdem Shédíkíng bidumílo, demílo roti tabu dekom bíkke; delokke esing appír dem Shédíme bitumílo, aag kídar dekom bíkke.

¹⁷Aríkpe inam olib esing kídíe békdumílo moonam lokke olib esingem delo líkdum sudung. Mipak kídí nolu dekena moonam lokke olib esing kísape, delokke nolu supak Judai kídíke edíína aid yékor tarongem paamíndung.

¹⁸Dem esing aag kídar dem yidkím subom mapeka. Nolu depe idumílo sim míngkí sulangka. Nolu appír dem umbom mang, idakkom appír emin nolum umbomdune.

¹⁹Idola nolu sikepe poyé, “Arue idakkom aag kídare ngom laalíkpe emlamin béggedune.”

²⁰Dem tolíkdung. Idakkom buluke míngke sumang kolokmin béggekane, delokke noludan míngkelo dung. Míngkímsupe míímape pesope míílangka.

²¹Kapeila Shédí bí bíkke pínam esing aag kísana Judai kídíem mesammang demílo, nolum bí mesamyé emla míídunía?

²²Delok legape Shédíke ayangemlang kaníngem, oletkuna kídí teyolo kaní namem, ngolu kaasudung, idola so ayang so nolu duuyar mílo bíkke nolum ayang namem paayé. Demamílo nolumkom mepakyéku.

²³Delokke bulu míngke sumape yétí mamílo bulumkom laalíkyé, kapeila Shédí bí bulum langaang ladungku.

²⁴Moonam olib esing aage békpakla, delokke moonam esipe iyimape ina Mipak kídí nolu aríkpe inam olib esinglo idum sudungku. Judai kídíde aríkpe ibomnam olib esing kísane; delokke sim békpakna esing aag kídar sim agí esinglo idum sukunamde Shédíkepe ipoyaname.

²⁵Ngokke bíro kídía, ngokke nolum kénmolínam, arang agom aroko kadung, kapeila si nolum kénnamrupe míísu namem mepak moyéku. De idung Israel kídíke aapí edade duuyar mayé, idakkom Mipak kídíe apíípe Shédíkelo aayindo longe petomlo duuríyé.

²⁶Dekepe Israel takame turyin yéku. Dem Dooying kitabe sikepe podung: “Mopít kupenade Jayonlok aayé; bí Shédíme míípang manem Jakob kelok langgéyé.

²⁷Delokrongem ngo buluke paabem laapak yékuem, bulukíng ngokke daapong ibosuname simino.”[15]

²⁸Judai kídíde Tatpona Dooyingem lupak sukolok, Mipak kídíde nolukepe bulu Shédíke mirue. Idakkom Shédíke ullen kolok, buluke abu kídíke legalok bulu Shédíke angong kídíe.

²⁹Kapeila Shédí bí bíkke ullennam delokke lubéé líknam kídí teyolo angukonpe aapí gekumang.

³⁰Longeko Shédíke agomem tatmana kídí nolu, supak Judai kídíke agom tatmang kolok yaasamem paatung.

³¹Dekepe supak noluke yaasamem pangkolok, Judai kídíe Shédíke yaasamem supak paadokupe, bulu supak Shédíke agomem tatmadung.

³²Kapeila Shédí bí ami takamem yaasam dokupe emla, bí bulum takamem agom tatgemape imoto.

³³Shédíke miremde edítko bottene! Bíkke gyanelang delokke kénnamde edítko eerídun! Bíkke míísangem séko poyin biyéne? Séko bíkke bedangem kénladun?

³⁴Dooying kitabe sikepe podung: “Séko Ruutumke aapíem kénton? Demangkom séko bíme pogulna amipe yéton?

³⁵Shédí bí doryan sudokupe séko bím atíko bikíton”

³⁶Kapeila bíkke lokmin, bíkke agí lokmin delokke bíkkímin atí takame kadune. Bíkkíng angun ralname agínpe duuyar daklangka! Amen.