Read Alladian ROM 15 Bible Online

ROM 15 - Alladian bible

ROM 15

¹Míngkelo edíína ngolu bomram siimona kídílokke egedem gedum sula igulpe aido. Ngolu petom agíe ashépe míírísula duupe aimang.

²Ngolu mipile agí kumríem gerepmola, bíkke ainam legape agér gérla aipe míngke supe aido.

³Kapeila Kristo bí agí ainam legape míímang. Dem megeyéla Dooying kitablo “Nolum lukaanam agome ngokkíng píngkai,” emla atkampe ito.

⁴Legade yémgap loklang Dooying kitab lokke luír poír kolok ngolu míínam sunamem paadope emla kerape atnam takam dem ngolum luyil poyilnape attung.

⁵Ngoluke Kristo Jisuke méélamlo gídungem yémgap namemlang ernamem bidak langka.

⁶Delomin aang atel delokke nappang atellok Ruutum Jisu Kristoke abu, Shédíme yidgeyéne.

⁷Dekemílo, Kristo bí Shédíme yidgedope emla torík sunam kísape, akone akonem torík sulangka.

⁸Kapeila ngo nolum podung, abukídílo Shédíke pébi suname edíídope emla Kristo bí Shédíke aruem dunggedola Judai kídíke béérape ito.

⁹Depe emnamde Mipak kídíe bíkke yaasam legape Shédíme yidgedope itung, dem Dooying kitablo attung: “Delok legape ngo nolum Mipak kídí gooralo yidgeyé; ngo noluke amínem miripe rínggeyé.”

¹⁰Lekoda bí podung: “Mipak kídía, Shédíke ami kídíem ashéng bosulangka.”

¹¹Lekoda sikepe podung: “Takam Mipak kídía, Ruutumme yidge langka, delokke bím miripe ríngge langka, nolu takam amikídíe.”

¹²Delokrongem lekoda Isaiah bí podung kukéng: “Jesseke otíngko lenyé, bí Mipak kídíem ruutum bomyé: Mipak kídíe bíkkíng míínamsuyé.”

¹³Míínam sukeng lerínge Shédí bí, Noluke bím míída sukolok nolu Deena Aidke ralnamlok noluke míínam suname siisang ayardope, deddína ashéng emlang yéponamem nolukíng bí bíísét modak langka.

¹⁴Ngokke bíro kídía, nolukelo apíípe ainame duudung, kénname apíísudung delokke akone akonem luyil sudung emla ngo berokpe míísudung.

¹⁵Idakkom so sithiso ngo nolum popa tonam agom legangko ngo miramrupe atdung, kapeila Shédí bí ngom yanggongem bitung.

¹⁶De yanggode ngom Kristo Jisuke béérape ila Mipak kídíke legape agér gérdope bitung. Mipak kídíe Shédíke torík supenam sobope ila Deena Aidlok bíkkíng deenampe yédokupe emla ngo miri kísape Shédíke Tatpona dooyingem pogoola agér gérdung.

¹⁷Delok legape Kristokíng ngokke Shédíkepe agér inamem ngo bottepe míísudung.

¹⁸Mipak kídíe Shédíke agomem taddope emla Kristo bí ngokkelok ingkuem ipíítodí dem legapetom demmin ngo pesomape poyéne. Bí sim agom loklang, agérlok,

¹⁹Deena Aidke pauarlok inam iyod sangodlok ibito. Dekepe iname Jirusalem lokke Illuriko bedang enko tabulo ngo Kristoke legang Dooying Tatpona agomem pokan gooto.

²⁰Ngo amikonke díílíknam teyolo moten saamadope emla Kristome kénmang adako amolo dooyingem pobinamde ngokke agínpe mííyar subomname.

²¹Dempenem sikepe Dooying kitabe ponam kísape idung: “Legangem pokan bimanam kídíe bím kaapayé, delokke bím tatmang adana kídíe bím kényé.”

²²Dekepe ikolok nolukíng ngom leko leko aalamape imodung.

²³Idakkom supak so amoso ngokke agér ipenam kayimang delokke ngo nolum deddína dítag kerapekai kaaríksupe emla míngkolok,

²⁴ngokke Spainlo gíyém nolum ngo kaape míídung. Bedalo endakla nolum kangaala anyongko nolum duubo sugeyéla ngom bedang enpekolo nolu gígul bosuyépe emla míídung.

²⁵Depe idokom supak, ngo Jirusalemlo Shédíke amikídíem igulkape emla enpong dakku.

²⁶Kapeila Makedonia kelang Akaiake mondoli kídíe Jirusalemlo duuna Shédíke amikídí aralokke opan kídíem anyongko iguldope luyin bosutung.

²⁷De buluke míísalok itung; idola dekepe ikolok bulu ami kídíem igulrupe aikai. Legade Mipak kídíe Judai kídíke aid agam tarongem paabo sutumílo, bulu Judai kídíem buluke ayang igullok paanam aku séranglok igulyansu kuperung aido.

²⁸Dekepe ila ngokke sim agér sim iyinla delokke bulu sokke ayém pangkai emla ngokke berok rongem, ngo Spainlo gíla nolum bedalo endakla kangaayé.

²⁹Ngokke nolukíng aayém, ngo Kristoke ayang igulem apíípe anggeyé emla ngo kénsudung.

³⁰Bíro kídía, ngoluke Ruutum Jisu Kristo keloklang Aidke ayanglok Shédíkíng ngokke legape kumgulla ngokke adírem dírbo sudope emla nolum ngo podung.

³¹Judialo míngke sumana kídílokke ngom mopít dope delokke ngokke Jirusalemlo agér gérnamem Shédíke amikídíe torík sudope kumbika.

³²Delokke dekepe ikolok Shédíke míínamlok ngo ashépe nolukelo pííla nolum írga bosuyé.

³³Shédíke yéponame nolukíng takamlo duudak langka. Amen.