Read Alladian ROM 6 Bible Online

ROM 6 - Alladian bible

ROM 6

¹Demílo ngolu kape empe? Yanggonge bojédope ngolu paab itíla duuyénía?

²Depe imaruyé! Ngolu paablo sito, kape kísa ngolu so duuyé tetene?

³Demangkom Kristo Jisukíng baptis isuna ngolu takam bíkke sikolo bíkke lekope baptis ito dem kénsu manía?

⁴Delok legape Kristome sikolokke Abuke angun ralnamlok kiirep kunam kísape, ngolute anípe turla yédokupe, ngoluke baptis laasu dungem bíkkíng yutaksula bíkke sinam tarongem paabosuto.

⁵Ngolu bíkke sikolo sibo sutumílo bíkke gerep kuko lokom ngolu berokpe bíkkíng gerep bosuyéku.

⁶Legade paab amílem nyokmo langkula, ngolu paab abílpe iyimadope emla ngoluke aku amílem Kristo kíng krosslo pansaato dem ngolu kéndung.

⁷Kapeila séko amie sidudí, bím paablokke apít modungku.

⁸Ngolu supak Kristokíng sitomílo, bíkkíng ngolu duuyéku emla ngolu arope míídung.

⁹Kapeila ngolu kénsudung Kristome sikolokke kiirep tokunade, bí lekoda sikumayé; siname bím ruutum bomyimang.

¹⁰Bíkke sinamde, bí paablo takam kepe letellok sigeto; idakkom bíkke turnamde, bí Shédíkelo turla duudungku.

¹¹Dekepe ngolu agí agísue, paab legangem mííyém sina kísa, idakkom Kristo Jisukelo duubosupe emla míísu langka.

¹²Delok legape atímana míísangem igedope nokke nyokpena amíllo paabem duubom momapeka.

¹³Atímana agér inadope noluke amíl olem melu sumapeka, idakkom, sinam lokke turkolo laasing kunam amikídí kísape nolu agí agísue Shédíkíng amanpe bisulangka.

¹⁴Kapeila paabe nolum ruutum bommayé, legade nolu ayon gooralo duumang, idola ayang gooralomin duudune.

¹⁵Demílo, kape? Ngolu ayon gooralo duumape ayang gooralo duudung emla paab ipía? Demang!

¹⁶Nolu agísue akonlo abílpe ibipe emla tolík sumílo yéjii pekolo gílíkna agér dokom, demangkom sinamlo gílíkna paab dokom nolu noluke tolík subinam ami delokke abílrunge dem nolu kénsu manía?

¹⁷Idakkom Shédíme koyit sudung, kapeila nolu paab abílpe ituakom, luyillok paanam aruem nolu apíípe igedung.

¹⁸Nolum paablokke mílípe melentoku delokke nolu deenamlokke abílpe ikai.

¹⁹Ngo sim tani agomlok podung kapeila noluke aapíe giimangada. Longeko nolu deemang aamo delokke atímana agér ipe emla atímana míídolo agí tabusuem abílpe melíksuto. Dekepe nolu agí agísue tabupe supak deenam legape yéjii namlokke abílpe melík superung aido.

²⁰Nolu paablokke abílpe idungem, nolu yéjiinam lokke mooteto.

²¹Noluke supakke annyi sunam noluke depe yébom tonam atí kídí delok ingko paapekko nolu paatone? De atí kídíde nyokmone!

²²Idakkom supak nolum paablokke melen tungku delokke Shédíke abíl kídípe ikai, noluke pangku namde deenamlo gílíkdung, delokke are turyar name.

²³Kapeila paab arede siname, idakkom Shédíke amande ngoluke Ruutum Kristo Jisukelo[4] turyarname.