Read Alladian ROM 7 Bible Online

ROM 7 - Alladian bible

ROM 7

¹Bírokídía nolu kénmanía? Kapeila ngo ayon kénna amikídílo podung, ayonde tanike teyolo bíkke turdung petom emmin ruutum bomdune.

²Kapeila luyii sunamlok pomílo, ayonlokke milo kana mimede bíkke milue turdung tetengem bí milodelo duuperung aido, idola milode simílo, bí ayonlokke milo kayimang.

³Idola, bí agí milue duudungem milo konkolo gímílo bím abír ine emdo. Idakkom bíkke milode simílo, bí delok ayon delokke apít dugku, delo bí milo konko kado kukom bím abír inako emmayé.

⁴Bíro kídía, nolukom Kristoke amíllok ayon lokke sito delokke ngoluke Shédíke yétalo agér gérladope supak ngolu sikolokke kiirep tokunam bíkke amipe idung.

⁵Kapeila ngolum paab ségue duubomto,[5] ayonlok lenna paab aapíe ngolukelok sinam ayém éédope emla ngoluke amíllo agér gérto.

⁶Idakkom supak, ngolu Ayonlokke apít dungku, kapeila ngolum longeko pateklo tumna kídíkepe ngolu sito. Ngo kakotlo atnam ayonke aku niyomlo yéyimang, idakkom Aidke aní bedalo yédungku.

⁷Demílo ngolu kape empe? Ayonde paabía? Paabmang! Arope poyém ayonlok mangamílo paabe ingkuedí dem ngo kénmayai. Kapeila ayone, “Ami atíem kaabo mapeka” emmang amílo paabe ingkuedí dem kénmayai.

⁸Idakkom ayon ngiitom agomem tatla paabe ngokkíng angu angu kaabo tatbonam aapíem gemoto. Kapeila ayon kékondelo paabe nyokla dung.

⁹Longeko ngo ayon kékonlo turla duutuai; idola ayon ngiitome lenname, paabe turkai delokke ngo sito.

¹⁰Turnamem bomadope emla inam ayon ngiitomde ngokke legape sinamem laalíksuto.

¹¹Legade paabe agí yékolem paala, delokke ayon ngiitom agomlok paabe yadla ngom petto.

¹²Dekemílo ayon agíde deene, arone delokke aine.

¹³Demílo aina atíde ngokkepe sinakua? Demang! Idakkom paabem paabe emla kangkén nadope aina atílok sinamem lenmoto. Dekepe ila ayon ngiitomlok pakyape pesorunam atíkope paabem lengkantung.

¹⁴Ngolu kéndung ayonde aidlok yéname, idakkom ngo nyokku pene, paablo abílpe kolíknam taniko.

¹⁵Ngo ingkuem idudí ngo kénsumang. Kapeila ngo ingkuem ipe míídungadí dem ngo imang, igeyéla ngokke ipenamem ngo megeyéla ipe manamem ngo ilatdung.

¹⁶Delokrongem ngokke ipe míínamem ngo idung amílo, ngo ayonde aine emla tolíkdungai.

¹⁷Dekepe, dem atídem inade ngope iyimang, idakkom ngokkíng duuna paab emino dem idune.

¹⁸Ngokke paabna amíl[6] so ngokkíng aina atíe duumang emla ngo kénsudung. Legade aina atíem ngo ilíídungai, idola ngo dem ilamang.

¹⁹Kapeila ngokke inam atísi ngokke ipe míínam aina atímang; dem ngokke ipemanam atímana atíem ngo itídung.

²⁰Supak ngokke ipe manamem ngo idumílo, dem inade ngope iyimang, idakkom ngokkíng duuna paabemin dem ibodune.

²¹Dekepe iname si ayon si sikepe agér gérdung: ngo aina atíko ipe emla míímílo, atímane delopak ngokkíng yémíndung.

²²Legade ngokke aapí aralo, Shédíke ayonlo ngo ashédung;

²³idakkom ngo kaaname ayon angu konko ngokke amíl so agér idung, ngok aapí so tolíknam ayonem momín suneke kadung. De ngom paab ayonlok pateklo tumla medung.

²⁴Ngo edítpe duuk nakoi! Sékoi sok ngom aimana amíl sokke ngom mosing yékune!

²⁵Ngoluke Ruutum Jisu Kristo kelok sim ipítkuna Shédíme yidge daklangka! Demílo, ngo agísue ngokke aapílo, Shédíke ayonlo abílpe duusudung, idakkom paab amíl si paab ayonlo abílpe dung.