Read Alladian 1 KORINTH 1 Bible Online

1 KORINTH 1 - Alladian bible

1 KORINTH 1

¹Shédíke mínggílok Jisu Kristo kelo tomlíknam amipe ulnam Paul delokke bíro Sosthenes,

²Korinthlo duuna Shédíke mondoli kelo, depe emnamde Jisu Kristo kíng deesuna delokke deedokupe emla tomnam kídílo, lekope buluke Ruutum emlang ngoluke Ruutum Jisu Kristome kumna mipílo;

³Ngoluke Abu Shédí delokke Ruutum Jisu Kristoke yanggong elang yéponame nolukíng duumín gedak langka.

⁴Shédíke yanggongem Jisu Kristoke amínlok nolum binam legape ngo Shédíme agínpe yidgedung.

⁵Legade noluke lupo manmo delokke kénnam panam bedang takamem bíkke lokmin nolum mirem motone

⁶kapeila ngoluke Kristoke legangem lukan subiname nolukíng edíípe dungkai.

⁷Delok legape lengkan kupenam Ruutum Jisu Kristome nolu erappe toyala duuname nolu aid amanlo píírammang.

⁸Ngoluke Ruutum Jisu Kristoke longelo nolum lupe géépenam kamadope, bí yéyinlope nolum edíímoyé.

⁹Nolum bíkke, Oo, ngoluke Ruutum Jisu Kristo kelo ajuupe yéyépe emla tomna Shédí bí aronako.

¹⁰Bírokídía ngoluke Ruutum Jisu Kristoke amínlok ngo nolum rogudung, depe emnamde noluke aralo angu arang imape, delokke noluke mííyi míísang aapíe míídu atellok lekobosula nolu takame tolík bosupe aido.

¹¹Ngokke bíro kídía, Kloyéke ekum eranglok ngom lubinampe noluke aradelo akmín sudung.

¹²De legade si: Nolu akone poyé, “Paul bí ngokke kangge supekue,” akone luyé, “Ngo Apollome mííbayadung,” akone emyé, “Ngo Kepha[1] kepe yéyé” delokke akone “Ngo Kristo memin matadune” emdung.

¹³Kristome pékpan pékran suto namía? Paulme nolu kepe krosslo pansaatonía? Nolu Paulke amín logía[2] baptis isutone?

¹⁴Krispo delokke Gaio bínyike kékonlo ngo séko mekom baptis imang legape ngo airupe míísudoku;

¹⁵dekepe ila sékote ngokke amínlok baptis laato emlamang.

¹⁶Arue, ngo Stephanke ekum erang emkom baptis ituai; delokke kékonlo ngo baptis inamyang kénsumang.

¹⁷Legade Kristo bí ngom baptis iyépe emla melík mangai, idakkom dooying tatponem pobodope emlamin de tani kénnam agom lokmang, depe imílo Kristoke krosslokke pauarem asammoyé.

¹⁸Legade kross agomde nyokdakna kepe gompage, turkupena ngolu kepe de Shédíke ralname.

¹⁹Legangem sikepe attung; “Ngo kénna kídílokke kénnamem nyokmoyé, delokke ségu kana kídílokke séguem asammoyé.”

²⁰Ingkolo kénna tanie? Ingkolo atjiibone? Ingkolo so longeso pokor poor bolane? Tani among sokke kénnamem Shédí bí mide dope ruumanía?

²¹Legade Shédíke kénnamem tani among kénnam sulok bím kénpímang iname, arope míína kídílo turdo kupe emla pogoo binam tani amosokke gompak agom memin Shédíme míípo motungkune.

²²Judai kídíe irisinyo iyod matadung, delokke Grik kídíe kénnamem mabomdung,

²³idokom ngoludan krosslo pansaanam Kristo memin pogoodune. De Judai kídí kepe yényimone delokke angu amikídí kepe gompage,

²⁴depe idokom Judai dakkom Grik dakkom tomnam kídí kepe Kristo bí Shédíke ralnam elang kénname.

²⁵Legade idung, Shédíke midede tani kénnam empenem pakyana kénname, delokke Shédíke pííramde tani tolnam empenem pakyana ralname.

²⁶Bíro kídía, nolum tomduem kape itodí dem míngíí sutola. Adín kénnamlok emmílo nolu takam kénna mangai; attungkone amín kabo mangai; alumkone milo aro mangai.

²⁷Idakkom kénnem annying sudo kupe emla Shédí bí tani amolokke mepaknam atíkídíem ullentung; ralnem annying sudo kupe Shédí bí tani amosokke ralmanem ullentung;

²⁸Shédí bí tani amo sokke kanemteng kamadope, kamang nemteng kadope emla tani gíída sokke mepaknam delokke rumkí yalumna atí kídíem ultung.

²⁹Depe emnamde sékote bíkke keralo bottepe míngkím sumadope inamko.

³⁰Kape, bíkke lokmin nolu Kristo Jisukelo duune, depe emnamde, ngolukepe yéjii pekope, deepek supekope delokke dorpít supe kope ruunam Kristokíng ila Shédí bí noluke takam turkeng lerínge.

³¹Delok legape sim sikepe atla metung, “Bottepe míísu penem Ruutumkelo botte motoka.”