Read Alladian 1 KORINTH 10 Bible Online

1 KORINTH 10 - Alladian bible

1 KORINTH 10

¹Bíro kídía kapeila ngoluke buku neku takame doomug rumkílo yétuai, delokke bulu takam siyéng raadalok kootoku.

²Bulu takame Mosikelo doomug lolang siyénglo baptis isuto,

³Bulu takame aid dotké atelem dobosuto;

⁴delokke aid asi sirung atelem tííbosuto; kapeila bulukelo yébosuna aid líírenglok bulu asi tííto, delokke de lííreng de Kristuai.

⁵Depe ilate Shédí bí bulum bojéko aipe mííma name kato; dekepe ila buluke simange mooruk amolo doopan dooran sukai.

⁶Supak sikesi ngolu kepe ansupenam agomko emla buluke itonam kísape atímape ngoluke aange míímem pelo emla kaayii supekue.[10]

⁷Buluke ayokone itonam kísape mimang kumsula yémapeka; delokke legangem sikepe attung; “Amikídíe dobo tííbo supe emla dungkai, méélam dem mirimope emla gerepkai.”

⁸Buluke ayokone inam kísape ngolu mime milo belum agér ibosukolo yépe aimang delokke dekepe ikolok buluke aralo longe atello jarying annyi kolang jarum amie sipakkai

⁹Buluke ayokone itonam kísape, Ruutumme aang ikaala tabíem paka kosunam kísape ipe aimang.

¹⁰Delokke buluke ayokone potonam kísape luge pogela petyana kotokiem petkosula imapeka.

¹¹Sikesi bulukelok kaayii sukepe idope itung delokke ngoluke kangkén sukepe atbitung, sikesim apíí modíe píídakbong.

¹²Depe ila nolu edíípe dakdumílo, nolu olet kupelo emla ansulangka!

¹³Tani takamem ikaa darkaana kékon delo ingkuekom nom ikaa penayang kamang. Delokke Shédí bí arone. Noluke dongge lamanam ikaa darkang bí kamomayé. Idakkom edílo bulum ikaayédí noluk daksi gepekuem bí mebiyé.

¹⁴Demílo ngokke ayanam angong kídía, mimang kumsu namlokke mooteng langkuka.

¹⁵Ngo kénsu pena tanilo podung; ngo ingkuem podudí dem míngkí sutoka.

¹⁶Lubéé líknam batide Kristoke iyyi tarongem paamín genape emla ngoluke yidge dola ima namkua? Delokke ngoluke penkénam ettíde Kristoke adín tarongem paabo sunam manía?

¹⁷Kapeila lub rotide atelko, ngolu midum sorume, amíl atele, kapeila ngolu lub roti atelem dobo sudung.

¹⁸Israel amiem míngkítoka. Ipaklo petlíknam atíem dona kídíde uyu ipak ikolo lekobosu manía?

¹⁹Dekemílo ingkoko ngo podune? Uyu ipak sunadía atíde kadun, demangkom mimang día atíde?

²⁰Depemang, esing elíng kumsuna angu amikídíde ingkuem petbi dudí dem Shédí kepe mííla imang, banji banmang uyu kepemin ibidune, delokke ngo nolum banji banmang uyulo leko bosuyépe emla míímang.

²¹Nolu Ruutumke bati lolang banji banmang batilo atelkope tíílamang; no Ruutumke dopom lolang banji banmang dopomlo tarong kabo sulamayé.

²²Ngolu Ruutumme iyak lídunía? Ngolu bím ralya dunía?

²³“Takamde ibaaname” dekom takamde ayi yiyinmang; “Takamde ibaaname” idakkom tabude siirep mope namang.

²⁴Mipile agí ainam petom legape míímape, idakkom abíd ami ainam legape mííbosupe aido.

²⁵Adín bojarlo kogoonamem atí agom kamape dotoka,

²⁶kapeila “Amosi delokke atii takamsi Ruutumke.”

²⁷Kristome míngkeng sumanako nolum dobo tííbo sudope gogyémílo delokke nolu gílíídung iyémílo, atí mííne míngomape nolum ingkuem doyépe emla bitudí dotoka.

²⁸Idakkom akone nom, “Si uyu ipaklo biname” emyémílo, demílo dem domapeka, nom pobina ami delokke míídulok delokke bíkke mííbín míngkan[11] legape, dem domapeka

²⁹depe emnamde nokke aapíem lubimang, akonke aapí legapemin ngo pobidune. “Legade akon aapíe kapeila ngokke yédu tarongem lutum itumyéne?

³⁰Ngo yidge sudakla donamem dobosumílo kapeila ngokke Shédíme yidgenam dotkédem, ngom done emla lukaa yéne?”

³¹Dekemílo nolu dodokom, tíídokom no ingkuem idudí; dem takamdem Shédíme yidge nape ilangka.

³²Séko mekom aang iket mapeka, Judai amikídí dokom, Grik amikídí dokom, Shédíke mondoli dokom

³³ngokke mipilem legang mipílo mííbodope emla ralbomnam kísa ibo sulangka. Legade ngo ngokke agí ajok ainam legape matamang idakla takame turdokupe emla, amikídí ainam legape podung.