Read Alladian 1 KORINTH 13 Bible Online

1 KORINTH 13 - Alladian bible

1 KORINTH 13

¹Ngo tani delokke teyong kotoki gomkorlok[17] tatporupe rííyi rííyola potokom ayang kamamílo, ngo muuyar peena ekung kísa demangkom rímyar peena taalé kísa.

²Ngo polupoor bona amanem paaduakom takamem kénnamem kénla delokke kénpí manam arang atíem kéndokom delokke dííte beleng gedope ngokke míngkenge katuakom ayang kamamílo, ngo atísin mang.

³Ngokke bomnam tabungem opan kídíem asampe bisula delokke agísuem emelo[18] melíksula itokom ayang kamamílo ngokke atí are kamang.

⁴Ayangde doosam gene, remel aapíe. Ayangde nemang, adum ale imang, yidsumang.

⁵Ayangde kaníímang, mikitmang, marpomang, imemem santí kumang.

⁶Ayangde atímanamlo erbommang idakkom arolo ashé bosudung.

⁷Si agínpe mosii sudung, agínpe míída sudung, agínpe míínam sudung, agínpe élgap bomdung.

⁸Ayangde edílote nyokmane. Idakkom ingkolo polupoor bone duududí, bulu nyokyéku; ingkolo angu agom pona kídíe duududí bulu napkap yéku, ingkolo kénname kadudí dekom nyokyéku.

⁹Legade ngoluke kénnamsi apíímang,

¹⁰idakkom edílo aropak apíínade pííyédí apíí manade nyokyéku.

¹¹Ngokke koope idungem, ngo koo kísape poto, ngo koope míísuto, ngo koo akorpe ito, edílo ngo siibeng kadí delo koo akorem mepak sutoku.

¹²Supak ngolu kaadung idakkom kaameng kaayéngdung, delokrongem ngoluke agí mingmue ngeerík sudola kaasuyé. Supak ngo anyongko kéndung; delokrongem ngomteng purape kénnam kísape ngo apíípe kényé.

¹³Delokke supak si angum si dungkai; míngkeng, míínamsunam, delokke ayang. Idakkom sokke botte yalumnade ayangde.