Read Alladian 1 KORINTH 15 Bible Online

1 KORINTH 15 - Alladian bible

1 KORINTH 15

¹Supak bíro kídía, noluke edíírupe míída sukeng ngokke nolum pobila delo nolute torík sunam tatpona dooyingem ngo popang kupe míídung.

²Nolukíng ngokke kíbi tonam Shédíke dooyingem edíírupe nolu jumgap dumílo sok dooying sok nolu turyéku. Demamílo, noluke míngkenge are kamang.

³Legade ngo ingkuem paatodí delok míngge yalum penamem nolukíng bilíkto,[25] de Dooying kitab pokampe Kristo bí ngoluke paab legapemin sigekane.

⁴Delo bím yutuai, méélam dem Dooying kitab podulok longum nanem bím kiireptoku;

⁵kera yalumpe bí Pitorme[26] lengkan toku, delokrongem luyilsuna íying kolang annyi dem lengkan sutoku.

⁶Delok legape, bí midum língko pilnguemteng bojé yangko lengkan sudo atelem lengkan sutoku, ayokone ipnyok kaabong idokom buluke alume supak pete duudung.

⁷Méélamdem bí Jemsme delokrongem tomlíknam takamlo lengkansuto.

⁸Delokke méélam yalumpe bí obayimape onam kísana ngomteng lengkansuto.

⁹Kapeila ngo tomlíknam kídí lokke rumkí yalum amiko delokke tomlíknam amipete ibaa manako, kapeila ngo Shédíke mondoliem irééto.

¹⁰Idakkom Shédíke ayang kolok ngo supakpe ngope idung, delokke bíkke yanggonge ngom agér bimape imang Ma, ngo bulum takam empenem gérduk yato, depe dokom de ngomang, idakkom ngokkíng duumín gena Shédíke yanggong emin.

¹¹Demílo ngo dokom, bulukom, si ngoluke pogoo binamde, delokke noluke arue emla míngkuname.

¹²Idakkom Kristo bí sikolokke gereptoku emla pogoo tumílo noluke ayokone sinamlokke gerep kunam kamang emla kapeila podune?

¹³Sinam lokke gerep kunam kamamílo, Kristo mekom kiirep kumang.

¹⁴Delokke Kristome kiirep kumamílo, ngoluke poge namde are kamang delokke noluke míngkengete dekepe iyé.

¹⁵Dem pakyape ngolu Shédíke mena hakii pemin ibodune, kapeila ngolu Shédíke legangem bí Kristome kiireptoku emlamin poying gootone; idakkom bí Kristome arope kiirep kumamílo, sina kídíem kiirep kumang.

¹⁶Legade, sina kídíem kiirep kumamílo, Kristo mekom kiirep kumang.

¹⁷Delokke Kristome kiirep mamílo, noluke míngke sunamde asamdung; nolu supakkom noluke paablo duudung ada namino.

¹⁸Demílo Kristokíng ipmín gena kídí ekom asamdung.

¹⁹Kristokíng ngoluke míínam subom namde yérum atel sokkemílo, dekemílo ngolu takam amiem penem gérmang yalumna amipe idung.

²⁰Idakkom aropakpe luyém Kristome sinamlokke kiireptoku, sina kídí lokke bí obíng yalumpe idung.

²¹Legade, siname ami atellok aato, dekepe sikolokke gerep kuname ami atellok aato.

²²Kapeila Adamkíng takame sito, dekepe Kristokíng takame turyéku.

²³Idakkom mipilem agí agí yédulok turmodokupe; Kristo bí obíng yalumpe ila, delokrongem bíkke aadíkulo bíkkíng yémín gena kídare darepyéku.

²⁴Delokrongem yébolanana ralnam delokke pauar takamem nyokyin mopala dem yétadem bí Abu Shédí kelo melík yékuem yéyin longe pííyé.

²⁵Legade, bíkke mirukídíem bíkke ale rumkílo mekuma tetengem bí solaipooyé.

²⁶Méélam yalumpe nyokmo kupenam mirude simonade.

²⁷Kapeila bí “Tabungem bíkke ale rumkílo meto.” Supak edílo “Tabungem” emdudí bíkke rumkílo melíkna Shédí agíem lutak sumang, de berok sudung.

²⁸Idola edílo takam atíem Kristoke rumkílo meyékudí, delo bíkke rumkílo melíkna Shédíke rumkílo Oode agíe doosuyéku delokke Shédí bí takamem solaiboyéku.

²⁹Supak, gerep kunam kamamílo, sinakídí legape baptis inamkídí si kape iyékun? Sinakídí sim kiirep kumang amílo tani kídíem buluke legape kapeila baptis ikane?

³⁰Delokke ngolu sukepe luyém kapeila ngolu agísue gonta mipílo nyokpena kísa iyar sukane?

³¹Ngokke bíro kídía, loodíke ngo nyokdung! Ngokke nolum mííyum subomnam, ngoluke yéduuso ngoluke Ruutum Jisukíng leko bosunam legape ngom sikepe lumotung.

³²Ngokke monkír kídíem Ephesolo momín sutonam kísape delo duuna tani kídíem tani míídu peelok rolmín géémín sutomílo ngo ingko laabko paadon? Sina kídíem kiirep kumamílo: “Kaju ngolu dongum tíngum sulaju, kapeila nyampo ngolu sidak.”

³³Yadko sumapeka: “Aimana yéjone aina séguem inyokdo.”

³⁴Nokke yéjiinam yékollo yésu tolangku, delokke paab imem kumapeka: Kapeila ayokone Shédíke legang atí kénmang. Sim nolum ngo annyi suyépe emla podung.

³⁵Idakkom ayokone sikepe íngkí yépe, “Sina kídíem kape kísa kiirep dokune? Ingkona amílpe idola bulu lendokune?”

³⁶No mide komai! No ingkuem lelík dudí dekepe amobelo yaalíkmang tetedem de turla sangkumang,

³⁷no turkupena amílem lemang, idakla aam amípee komino, demangkom atíkon komin.

³⁸Idakkom Shédí bí bíkke mííbang sunam amílkomin amídem bidune delokke orek orek amíem orek orekpe amílem bidung.

³⁹Takam adíne akam sumang. Tanike angu sudung, simon silike angu sudung, pettangke angusudung delokke ei engoke angu sudung.

⁴⁰Taleng telokke atí kídí ekom kangu sudung delokke amo sokke orek sudung; idakla liplop emla ina taleng telokke atíkídie orek konpe ina atí kídíde angu sudung.

⁴¹Doonyi si akonpe liplop emla ina akone, poolode akone delokke takar kídí si akone; delokke takar eelen eteng liplop emla ikolo angu eelendung.

⁴²Dekerupe sina kídí lokke gerep yékuemkom iyé. Lenam amílde nyokkupene; sangku penade turpene.

⁴³Sim yaalík yépe emla sidung delokke turyépe emla mosaadung. Sinamde ralmanako, gerep kunade turyar penako.

⁴⁴Lenamde emmumna amíle, sangkunade aid amíle. Tani amílko kadumílo, aid amíl kokom kadung.

⁴⁵Depe ila sim sikepe atbitung, “Tanike obí yalum Adam bí turla yénakuai,” yéyin lokke Adam bí turnam bina aidkope ikai.

⁴⁶Aid amíle keramape, idakla pílen ballennam amíle keradung, delokke méélampe aidde.

⁴⁷Kerayalum tanide deemul lokke, annyi nana tanide teyong telokke.

⁴⁸Tani sim kédenglok pínampe ila; among sokke tani abíd kídí ekom dekepe ikai; delokke tanikope teyong telok toknape ila, dekepe telokke ami kídíete idung.

⁴⁹Delokke kape kísa ngolu tanie tani amílem gedudí, dekepe ngolukom[27] teyong telok tokna ami amílem gesuyé.

⁵⁰Ngo berokrupe lukan bidung bíro kídía, adín elang iyyie teyong amongem yége lamayé; nyokkupena dekom nyokku pemanadem duuyon suge lamayé.

⁵¹Tatgaptola, ngo nolum tatkí manam atíko pobiso. Ngolu sila doomayé, ngolu takame angupe iyé kunamino

⁵²Yéyin tapungem mutyém, amig kemír atellok, yaari angun atellok angu konpe iyéku. Legade, bikul tapungem mutyém, sina kídíem siyi madope kiirep yéku, delokke ngolu anguyéku.

⁵³Kapeila si nyokpenasi nyokyi pemanam, delokke si sipenasi siyi pemanam egem pítgerupe aido.

⁵⁴Edílo nyokpena si nyokpe manem, sipenasi siyi pemana egem pít geyédí delo sikepe agom atnam si aroyé: “Simo nyokmonem ikumne ménnyokto.”

⁵⁵“E, simo nyokmone, ingkolo nokke ikumname? E, simo nyokmone, ingkolo nokke asum aare?”

⁵⁶Simo nyok monade paabe, delokke paabke pauarde ayone.

⁵⁷Idakkom Shédí bí yidge penam rungko! Bí ngoluke Ruutum Jisu Kristo kelok ikum nanem bidung.

⁵⁸Delok legape, bíro kídía, edíípe ralbom sulangka. Ingkuemte sotko sumapeka. Agínpe agísuem Ruutumke agérlo bisu langka, kapeila, noluke Ruutum kíng ankípe gérnamde emmum mayé dem nolu kénsudung.