Read Alladian 1 KORINTH 16 Bible Online

1 KORINTH 16 - Alladian bible

1 KORINTH 16

¹Supak Shédíke ami kídí legape daan ulnam agome: Galatia mondoli kídílo ngo ingkuem ilangka emla ngiitom todí dekepe itoka.

²Hopta mipílokke kerayalum longedelo, nolu agí paanam poisar akorlok kaala murkong anyongko leepek sulangka, delo ngokke aayém uldum sutínam kamadope dem mekum langka.

³Delo, edílo ngo pííyédí nolu ulpala noluke daanem Jirusalemlo bomadope melíknam ami kídílo ngo kangkén sithiko bilíkyé.

⁴Kaaname ngote gíbape iyémílo bulu ngom enbosulayé,

⁵Makedonialok ngokke gírongem, ngo nolukíng aayéku kapeila ngo Makedonia raadalok gíyé.

⁶Nolum duubo sudomílo, demangkom dígínemte duubomílo emla míngkídung, demílo nolu ngom ngokke enko gíkolo igulyé,

⁷Ngo nolum supak gíyarpee dakla kangang kanmang; Ruutum bí melík yémílo, ngo nolum anyongoko duubo dakbosupe míídung.

⁸Idokom Pentekost imang adape Ephesolo ngo yépoope míídung;

⁹kapeila bottena agér ipeko eyabem ngom siyya bitung, delokke delo ngom akne kekom bojéko kadung.

¹⁰Timothi aayémílo, nolukelo duudungem bí peso annying kapelo dem kanggap langka, kapeila ngok kísape, bí Ruutumke agérem gérgedak.

¹¹Demílo sékote bím lupak sumapeka. Bí ngokkíng aipe píílat dokupe bím kampope melík langkuka. Bíro kídíem bí lekope aalat bosu yékupe emla ngo míínam sudung.

¹²Supak ngoluke bíro Apolloke legange: Ngo bím nolukíng bíro kídíem gíbosula gílarungka emtuai. Bí supak gílíru mape ikai, idokom gíbaape iyém bí gíyé mangalo.

¹³Agíem ansu ayar langka; miramna tanipe ilangka; edíí langka.

¹⁴Iduu sitok takamem ayanglok ibo sulangka.

¹⁵Stephanke ekum erangde Akaia lokke kera yalumpe Kristan igene, dem nolu kénsudung, delokke bulu míngkesuna kídíke agérlo mínggap bomkai. Bíro kídía ngo nolum rogudung,

¹⁶sikepe ruutumpe yébona kídílo delokke akon dokom bulum gérgul igul bosunalo yémín gelangka.

¹⁷Stephana, Portunatu delokke Akaiku bulu pííyédem ngo ashénge ito, kapeila bulu noluke duuma duem duuyanto.

¹⁸Legade bulu ngokke aang emlang noluke aangem esang moto. Sikena amide kangkén pename.

¹⁹Asia amolokke mondoli kídíe nolum salamem bidung. Akulas lang Priska[28] Ruutumke amínlok nolum salam bidung, delokke dekepe buluke ekumlo dumsuna mondoli ete salam bidung.

²⁰So duuna bíro takame nolum salam bidung. Akone akonem deenampe kaarík tarígem erbo sulangka.

²¹Paul ngo, ngokke agírung alaglok sim salam sim atdung.

²²Séko Ruutumme ayamadí bí gérmang daklangka. E, Ruutume aatoboi![29]

²³Ruutum Jisuke yanggonge nolukíng duumín langka.

²⁴Ngokke Jisu Kristoke ayange nolu takamkíng duudak langka. Amen.[30]