Read Alladian 1 KORINTH 7 Bible Online

1 KORINTH 7 - Alladian bible

1 KORINTH 7

¹Supak noluke atkan sutonam legange si: Milue méng bommanamde aiyadungai.

²Idakkom delo belum bekam agére bojéko kabo sudung iname, milo mipíe agíe méng kasupe aido.

³Miluekom agí méngem delokke dekepe méngekom agí miluem, milo méng ayonem apíí bosupe aido.

⁴Méng amílde bíkke petom sumang idakla agí milo kepete idung. Dekepakpe milo delokke amílde bíkke petom sumang, idakkom agí méng kepete idung.

⁵Kumnam moodíkolo aipe agíem bilík suladope, kerape tolíkbosula moodí anyong legape yépan supoonam kékonlo, mime-milo míínamem topak bosumapeka. Delokke hakjém gela malok Soitane ikang darkang madope aadum sutokuka.

⁶Ngo sim ordarpe lumape; depe ibaado emla poyonpe podung.

⁷Takam amie ngok kísape iyin duamang emla ngo míídungai. Depe iduakom mipile angu angu elenpe, Shédí kelok agí agí amanem paayin sudung.

⁸Supak milo bommana delokke meyéng kídílo ngo sim podung: Ngokke kísape bulukom milo méng kamape duunamde aiyaduai.

⁹Idakkom bulu agísue hakjém gela mamílo, milo méng kabosupe aido, kapeila jémgap gela pemamílo, milo méng kabo sunamde aiyado.

¹⁰Milo méng kana kídílo ngo sim Ruutumke ponam sim pogap líkdung; ménge miluem mepak mapeka.

¹¹Bí mepak yémílokom, milo kakurupe aimang demangke milodem gyabbo sukupe aido. Delokke miluekom méngem mepakrupe aimang.

¹²Abíd amikídí kepe, Ruutummang, ngomino podune; bíro konke ménge arope míngke sumanako idumílo idola milolo duumínpe emla bí míídumílo, milode bím mepak sumapeka.

¹³Delokke mimekonke milue arope míngke sumanako idumílo idola bí méng delo lekope duubosupe míídumílo, bí dem milodem mepak kumapeka.

¹⁴Legade, arope míngke sumana milode bíkke míngkesuna méng delok deesu dungku, delokke arope míngke sumana mimedete arope míngkesuna milodelok deesu dungku. Demang amílo noluke ome-oode deemayai, idakkom dekepe iname, bulu deene.

¹⁵Idakkom arope míngke sumanade mege yékumílo, bím depe isu motoka. Arope míngkesuna milo demangkom mimede dekepe idodelo agí míngkorpe ilado; Shédí bí ngolum míípo bosula yéyépe emlamin tomtune.

¹⁶Méng no, nokke miluem kape kísa mosii yékune dem kénsu donía?

¹⁷Depe idokom, Ruutum bí sékome kape aman tarongem ortudí, delokke kape iduem Shédí bí tomtudí, dekepakpe mipile yélangka. Simin ngokke mondoli takamlo luyil goonam ayone.

¹⁸Milo akone Shédíkelo yédokuem dínbíílo iyod kosu tobodí? Bí dínbíílo iyod manampe ipe aimang. Milo akone Shédíkelo yédokuem dínbíílo iyod sumang nakodí? Bí dínbíílo iyod kosu yimadokom aiyé.

¹⁹Dínbíng iyod dekom atí kamang delokke dínbíng iyod madekom atí kamang. Shédíke ngiitomem bomgap igap sunademin aropak sanpename.

²⁰Shédíke bím tomdo pakdelo kapepak yétuadí depe mipile duusupe aido.

²¹Nom abílpe idungem tomtonía? De atí kamang, idola no mílí kupeko bedangem mata langka.

²²Legade abílpe iduem Ruutumke tomnamde Ruutumke dorpít kunam amie; deke kísape sékom ruutumsupe yédungem tomtudí bí Kristoke abíle

²³Nolu are rulok renampe ikai; ami kídíke abílpe imapeka.

²⁴Bíro kídía, mipile Shédíme toge sunampe, bím Shédíke tomlíkko yékollo yésupe aido.

²⁵Supak anílpe yénam legange: Ruutum kelok ngokke ngiitomyang kamang, deke dokom, Ruutumke yaasamlok ngiitom líknam kísape ngokke ngiitom sikom mínggap pename.

²⁶Siyum siroke ebín legalok ngokke míngkíname, nolu kape duududí dekepe duusunamde nolukepe aiyado.

²⁷No milo demangkom méng kanakua? Demílo mepak kupe emla míímapeka. No aníl nakua? Demílo mime mata mapeka.

²⁸Idola no mime laadokom laanyotmang, delokke mimede milo kadokom kamemmang. Idakla milo méng kana kídíde yédung anyoso adír asonge iyé, delokke nolum ngo sokke mosiipe míídung.

²⁹Bíro kídía moodíe, píídakbong. Supak kelokke méng kana kídíe kamana kísa yépe aido;

³⁰ankína kídíe ankímana kísa; ashéna kídíe ashéng mana kísa; atí renakídíe, ekurangem bulu bompe mana kísa;

³¹séko bulu tani among serangem bomdudí anyong kote yékí kíyik bommana kísa ikai. Legade yébomdunam tani amosi nyokdakbong.

³²Nolu míídír sumape yéduamang emla ngo míídung. Méng kamana milode Ruutumke legangem kape pak Ruutumme mííyum sumodudí dem ankídung.

³³Idakkom méng bomne tani gíída sokke legangem, kape kísa bíkke mimem mííyum sumododí dem ankídung

³⁴delokke dekepe bíkke erap bomnamde akédung. Milo kamana mime demangkom mimumde Ruutumke legangem ankídung. Bíkke amíl aide apíípe Ruutumkíng mííyik sunamde bíkke míídonge. Milo kana mime dedan tani amosokke legangem kape kísa bíkke miluem mííyum sumo kandodí dem ankídung.

³⁵Ngo sim noluke ainam legape, nolum iképpe imape idakkom Ruutumkíng kumname akémape nolu yéjiinam bedalok yédope emla podung.

³⁶Amikone agíke mííbosunam mimum konem bíkke yékí yérung bosuduem kaabo mííbodope yénying motumílo delokke bí luyang kanyimape méépe laaperung emla antí bomdumílo, bíkke míngkampe annyidem bommín sumo toka delok paab kamang.

³⁷Idakkom séko ami agomlok imape idakla agí mínggí rulok legangem míngíísula mimum dem méépe laapemang emla aapílo mííyin sutodí de amidekom ijiidung.

³⁸Dekepe iname mimum dem laana dekom laajido, idakla séko mimumdem laama todí de ijii yado.[7]

³⁹Edílope milue duuyédí méng dekom duubosuyé. Milue gérmangko kamílo, sékom bí mííba bosuyédí delo yéladoku, idola Ruutumkelo míngke sunape ipe aido.

⁴⁰Idakkom dempenem ngokke mííname anílpe yésukuna mimede ashéyape yéyé delokke ngokom Shédíke Aidem paadung emla míísudung.