Read Alladian 1 KORINTH 8 Bible Online

1 KORINTH 8 - Alladian bible

1 KORINTH 8

¹Supak mimanglo demangkom ipaklo donam tíínam binam legange: Ngolu takam ankén kangkén[8] sunana kénname kasudung emla ngolu kénsudung. Kénname adum ale imodo idakla ayange siirep modo.

²Séko tanie agíe atíem kéndung emla míídudí bí bíkke kénpenamem kénmang.

³Idakkom séko tanie Shédíme ayadudí bím Shédíkom kéndung.

⁴Delo si ipaklo donam tíínam legange: Ipak runggu demangkom mimangde tani gíídaso turna atímang idola turnade Shédí atel mino.

⁵Legade taleng lolang amoso Shédíke rumkíng amie delokke améyana ruutume kadung,

⁶depe idokom ngolukepe anguyang kamang idola Abu Shédíe atelko bíkkelok takame lento delokke bíkke legape ngolu duudung; delokke delo abídyang kamang idakkom Ruutum Jisu Kristo petom, bíkkelok atí takame lento delokke bíkkelok ngolu turdung.

⁷Idakkom sim takame kénbo sumang. Ayokon amie mimangem demangkom ipaklo kumnamem adí amo arope mííla aropakpe ipak uyulo biname emla dodung; depe ila buluke aapíde mííne míngola dem deema modung.

⁸Idakkom donamlok ngolum Shédíkelo anín moyayé emmang; ngolu domamílo loorí mayayé emnammang, dotokom looríyayé emmang.

⁹Depe idokom noluke mínge sumape inam agérde, pííramna kídí kepe tube supeko atípe ipelo, dem ansu kénsu langka.

¹⁰Kapeila mííne míngona aapí genade, kénsuna ami nom ipak ipomlo tíído dodope kaamílo, ipak demangkom mimanglo kumlíknam donamem bím donom manía?

¹¹Dekemílo Kristoke sige binam aapí edíímana bíro sim nokke kénnamlok kénnyokdung.

¹²No dekepe nokke bíro kídíe ipatsula paab ila delokke buluke edíímana aapíem ibuu sumílo, no Kristoke miru pemin idune.

¹³Delokke legape, ngo ingkuem dodudí de ngokke bíruem paablo olík modumílo, ngo bím depe imo madope, edílokom ngo adín doyimayé.