Read Alladian 2 KORINTH 1 Bible Online

2 KORINTH 1 - Alladian bible

2 KORINTH 1

¹Shédíke míísalok Kristo Jisukelo tomlíknam amipe ulnam, Paul, delokke ngoluke bíro Timothi, Korinthlo duuna Shédíke mondoli kelo, Akaialo duuna arope míngkesuna ami tabung,

²Ngoluke Abu Shédí delokke Ruutum Jisu Kristoke yanggong elang, yéponame nolukíng duumín daklangka.

³Igul takamke lenko angko delokke ayang kaapasuna Shédí, ngoluke Ruutum Jisu Kristoke Abu Shédíme yidgelaju.

⁴Ngolu agísue Shédí kelok edíng paanamlok ngolute adírla duuna kídíem edíí bodokupe emla bí ngolum ngoluke adírko takamlo edíí bodung.

⁵Kapeila ngolu edítko Kristokelo arééyém réémín gedudí dekenako Kristo kelok ngolu edíng emte paadung.

⁶Ngolu aréé dumílo, de ngoluke edíípenam legapelang turpenam legapemin; ngolum edíí monade, nolu kepete edínge; kapeila ingkuem ngolu aréé bomsududí demmin ngolukom jémduk gedola aréé bomsudune.

⁷Delokrongem ngolu nolu kepe mííbom namsi berokdung, nolu ngoluke arééyém réébo sukampe ngoluke edíngko lokom nolu edíímínyé emla ngolu kéndung.

⁸Bíro kídía, Asialo ngoluke aréé rénggenam adírem ngolu nolum lukan sumape duulamang; kapeila jémtung gemanam ngolum iréé sinyuem iname ngolu turyé emlangkom míísu mangai.

⁹Arope ngolu petko sudak emla míído bongai; idakkom de ngolum agísuem míída sumape sinemte kiirepkuna Shédíkelo míída suyépe emla inamko.

¹⁰Bí ngolum nyokta pakduem mosiitoku; delokke bí ngolum mosing yéku; bíkkíng ngoluke mííbom namem melík suto mílomin ngolum bí mosing bomyar yéne;

¹¹de idung nolu ngolum kumnamlok iguldung. Demílomin deddína ami kumnamem tatbila ngolum yanggongem binam legape bosi amie ngoluke[1] adumpe yidge biyéne.

¹²Supak si ngoluke mííyum sunana legange: Ngoluke aapíe sikepe lengkandung, tani among sim solai namemlang, apekrupe ngoluke nolum sonsu yonsu namem ngolum Shédí kelok aana deenam loklang, jégaplok ito. Ngolu sim tani among kénnamlok imape idakla Shédíke yanggong akor lokmin itone.

¹³Kapeila ngolu noluke pori kénmanam demangkom tatkén manam atmang. Delokke ngo míínam sunamko kadung,

¹⁴nolu ngolum anyongko kénka nade, Ruutum Jisuke aadíku longelo nolu ngolum yidgela delokke ngolute nolum yidgedope delo nolu ngolum apíípe kényé.

¹⁵Kapeila nolu lennyinape gérdope ngo nolukíng aaperung emla mínggap tuai.

¹⁶Makedonialo endagem nolum kaapatpe míítuai delokke nolu ngom Judia bedalo gílíkdope ngo Makedonia lokke nolukíng angkén kupe míítuai.

¹⁷Ngokke sikepe mííruu namsim ngo imanpía itone?

¹⁸Shédí bí aronako, ngoluke nolum agom bitonamde depemang emsém nam agomlok imang.

¹⁹Legade, noluke aralo ngolulang, Silbana[2] delokke Timothike pogoo bitonam Shédíke Oo Jisu Kristo bí “Depe” delokke “Demang” emsém mape bíkkíng toyar sulíknam demino agomde.

²⁰Kapeila, deddíko Shédíke pébisuname idungakom tabude Kristo kelo arolíkkai. Delokke depe ilamin Shédíke angun ralnamlo ngolu bíkke amínlok “Amen” emdune.

²¹Supak Shédímin ngolum lang nolum Kristokíng mínggap monade. Bí ngolum tosaktung,

²²bí ngolum ruutumnana iyodem bitung, delokke bí ngolum angku penamem kénsuyépe emla bíkke Aidem ngoluke aanglo meruu bitung.

²³Ngo Shédíme hakiipe mesudola podung, legade ngokke Korinthlo aanamde nolum mesam dope emlamin itone.

²⁴Noluke míngkede ngoluke míngkorlok nolu ilangka emtímang, idakkom noluke ashéng sénggenam legape ngolu nolum agér gérbo sudung, kapeila noluke míngkelok nolu edíí sudung.