Read Alladian 2 KORINTH 10 Bible Online

2 KORINTH 10 - Alladian bible

2 KORINTH 10

¹Kristoke remag loklang remellok ngo, nolum kaayém “Pesogena” delokke mooteng yékuem “Miramna” Paul ngo nolum rogudung.

²Ngo kumdung, ngolu tani gíída sokke yédulok yédung emla míínam ami ayokonlo ngokke aayém ngokke míngkampe ngo miram gemape iyépe.

³Kapeila tani amoso ngolu duudokom ngolu tani moomemke mimag ikampe mimak imang.

⁴Ngoluke mimak inana sérasi tani gíída sokke mimak séramang. Dempenem, buluk yapguem bénpak nana teyong pauare kadung.

⁵Ngolu lukí pokí sunamem mepak sudung, delokke takam agom kídíem langkum sugeyéla Kristome beleng genape ngolu idung.

⁶Delokrongem noluke edíípe míída suname apíírongem, míngke sumanam agérem ngolu ingéékupe emla raldung.

⁷Nolu atíem teyong petomlok kaadung.[6] Akone ngo Kristoke emla berokrupe míídumílo bíkke kísape ngolumkom Kristoke emla, dekepe bíkom ngolum mííbipe aido.

⁸Kapeila ingkuem nolum olet momape delokke dempenem singon monana ralnamem Ruutum bí ngolum bitudí dem ngo yidsudokom annying penam kamang.

⁹Ngok sithie nolum lurít yépe emla ngo míímang.

¹⁰Legade ayokone emdung, “Bíkke sithi kídíde sépekrudo delokke berokrudo, idakkom bí agíde edíípe kaamanamko delokke bíkke agome sanpenam kamang.”

¹¹Dekena ami kídíem ngokke duumangem sithipe atnam dela agí duusu duem ponamde akame dem tatkén sumotoka.

¹²Ngolu lungu ingusupe demangkom agísuem yidsuna kídílo ngolum agísuem luyii poying sulamang. Edílo bulu agísuem agísue popee suyédí, bulu kénmane.

¹³Depe iduakom ngolu yidsu suríem yidbong sulamang, idakkom Shédíke ngolum binam nolukíte píídope binam loorí lomin ngoluke yidsu dekom kayéne.

¹⁴Nolu delo aradelo doosudo iname, Kristoke tatpona ngiitomem bomla nolukíng ngoluke aado delo ngolu dem poboola poban mangai.

¹⁵Akonke agér inam emteng[7] ngolu yidbanla yidmang. Ngoluke mííbomnamde, noluke míngkenge siiyang siiyang iname, ngoluke noluke gooralo inam agérde bojépe gooyayé,

¹⁶delomin ngolu ngiitomem noluke dungko kékon lokom pogoo layéne. Kapeila angukon ami amolo agér gértonam dem ngolu yidsu gekanmang.

¹⁷Idakkom “Séko yidsu dudí bím Ruutumkelo yidsu motoka.”

¹⁸Legade idung, agíke yidsu kolok bím arue emmang idakla Ruutumke yidnam ami demin depe empename.