Read Alladian 2 KORINTH 11 Bible Online

2 KORINTH 11 - Alladian bible

2 KORINTH 11

¹Ngo mide dungkom ngokke mide namem nolu tatjon suyépe emla ngo míínam sudung; arope nolu dekepe idubong.

²Ngo nolum nedung idokom Shédí kelok nedung, kapeila ngo deena mimum konem milo atelkolo binam kísape nolum ngo milo atel Kristokelo bipe emla pébi sudung.

³Idakkom tabíe budii rula Ibme yadnam kísape noluke deenampe Kristokíng kumnamem delokke erap aapíem kape pakmala gínyok bopelo emnamde ngokke pesoname.

⁴Legade ayokone aala ngoluke pogoo bosunam Jisume emmape Jisukonko pogoo dumílo, demangkom nolu noluke paatonam aidem emmape nolu angukon aidko paadumílo, demangkom nolu noluke torík sunam tatpona dooyingem emmape angukon dooyingko paadumílo nolu nompoope nomko sudung.

⁵Idakkom ngokom dekena mitíkon bottena “Tomlíknam mirokídí” dem anyong kokom rumkí yamang emla ngo míídung.

⁶Ngo agom lukolo tumi lonmo madokom ngokom kénnamlo píírammang. Takam bedalo ngolu sim berok bidung.

⁷Ngo Shédíke Ngiitom tatponem nolukíng pobito emla ngo are komang. Nolum boromope emla ngo agíe lebíng koníng geto. De ngokkepe imem dunía?

⁸Ngokke nolukíng agér gérdungem angukon mondolie ngom uto. Arope pomílo nolum igul napemin angukon mondoli konkem ngo pinnyok bitone.

⁹Delokrongem ngoluke nolukíng yédula pííram séémo duemte, séko mekom ngo tebeg momang, kapeila Makidonialok aana bíro kídíe ngokke pííram séémuem kaabi ibito. Ngo agísue nolum tebeg molímang emla meto delokke dekepe iyaryé.

¹⁰Ngokkelo duuna Kristoke arolok ngo pébisudung, Akaia amolo sékokom ngokke mííte sunamsim itum lamayé.

¹¹Kapeila? De ngo nolum ayamang emlangía? Ngo ayadudí Shédí bí kénsudung!

¹²Abíd “Tomlíknam miro” kídíe botte tekeng kamadope delokke bulukom ngoluke inam atelem idung emkeng kamadope, ngokke supakke ibomnam sim ngo iyarbomyé.

¹³Kapeila sikena ami kídíe yégebona mirue, yadnamlok agér gérbona kídíe, Kristoke agérem yégebona kísape idola mirupe inakídíe.

¹⁴Dem kapei emla míípenam kamang, kapeila Soitane agíete teyongke angunbona amipe irudung.

¹⁵Dekepe iname bíkke béérange yéjiina amipe irunamde irisinyue emla míípenam kamang. Buluke nyokku nanade buluke agérsulok lensuyé.

¹⁶Ngo lekoteng pobeng dungku; Ngom sékoteng mideko emla míímem bosumapeka. Delokke mííyé miloteng ngo bottepe míísu penam kamadope ngom miderupe torík sutoka.

¹⁷Ngo ingkuem supak podudí Ruutumke lulíklok pomang; sikena bottepe míísu namem ngo aropakpe midepe míísula podung.

¹⁸Tani among míngkampe bosie bottepe míísu dunade, ngokom bottepe míísupe.

¹⁹Nolu kénnape idolate mide amínem gelí dunía!

²⁰Arolok luyém nolum abílpe demangkom inomna demangkom míílona demangkom língkitlok gakna demangkom mingmolok pina kídílo nolu yébo sudung.

²¹Ngok annying kode dekedelo ngolu bojérupe ralmato emla toge sudung. Amie bottepe míísuduem, ngokom bottepe míísu ladung, ngo dem mide agompe posudung.

²²Bulu Hibru kídíedí? Ngokom dekene. Bulu Israel kídíedí? Demílo ngokom dekene. Bulu Abrahamke otíng oyin emílo ngokom dekene.

²³Kristoke béérangedí bulu? Ngom tumna kísape taddupe idakkom bulum pemílo aiyana béérange! Ngo mirííyape agérem gérto, pateklo deddíko duurum duurum duuto, demngéé kosuto, delokke sita simang ito kudandan imoto.

²⁴Lemngo kokai Judai amikídíe íying angum kolang konang tetepe ngom demnamem paato.

²⁵Lengumko ngom arem boyiklok demto, leko elínglok geto, lengumko siyéng raadalo jajie kupgeto, yoh kolang longeko siyéng raadalo duuto.

²⁶Ngo dengepe edílokom duumang. Leko leko bedu bedalo sibu meyu katapakto, dokait alaglo díkdari paato; ngokke agí ami kídíe díkdari bito; mibo gooralo, taon bottena amolo, doolulo siyéng asilo; delokke miru angong kídílok díkdari paato.

²⁷Yoh rubungem ipyi mapete agér gértíla yéto; ansingko amolo mílípe yémoto.

²⁸Delok takam kékon lokom ngo takam mondoli legape egedem ankípe geboto.

²⁹Séko ralmadudí ngokom ralmape mííbo sudung, edílo akonem paab imodudí, ngo duuk aréé míndung.

³⁰Ngo bottepe míísu dumílo ngokke ralmangem lengkan bina atílomin bottepe míísudune.

³¹Agínpe yidyar penam Ruutum Jisu Kristoke Abu delokke Shédímin ngokke aro menam agomem kéndune.

³²Damaskalo duuna Areta rojake gobornorde ngom umpe emla Damaska Taonem sipayingem gargoomoto.

³³Idakkom ngom suppi kirki robengkíng sopur aralo rumkíbelo meboo líkname ngo bíkke lokke dukpu getoku.