Read Alladian 2 KORINTH 12 Bible Online

2 KORINTH 12 - Alladian bible

2 KORINTH 12

¹Ngo bottepe míísu bangkai delokke atíyang paapeko kamang, idokom ngo kaarí kaanyuem delokke lengkan namem Ruutum kelok paadung.

²Ngo Kristokíng yéna amiko tagying kolang dítag appi kerape kedon yalumna teyong amolo yényok dokupe kéndung. De agípak pedí itone, agí mapedí itone ngo kénmang Shédí bí kéndung.

³Delokrongem aropedí itone menam pedí itone ngo kénmang Shédí bí kéndung embomnam amide

⁴yépoko amolo nyoklík dope kéndung. Bí delo agompe pokén gemanam tani nabbéllok pobi lamanam atíeke tatto.

⁵Idokom ngo agíemdan yidsu mayé, ngokke yidsu pekode aréé genam delomin.

⁶Ngo yidsupe míítokom, ngo mideyayé, kapeila ngo aruemmin podune. Idakkom ngo yidsumang, dempenem akone ngom kape kaato tattodí delok kékonlo ngok teyolo bím yidban molímang.

⁷Bottena pakyana irisinyo kaanamlok ngo agíem bottepe míísudope emla, ngom ipusiléé dope emla Soitanke kotokie ngok amílso taang teeruem rulíktung.

⁸Sim leepak bidokupe emla lengum kokai Ruutum me roguem gukítung.

⁹Idakkom bí sikepe pokai, “Ngokke yanggode nokkepe alummang, kapeila ngokke pauarde adír kolomin apíídune.” Delok legape Kristoke pauare ngokkelo duudope ngo ralmang pííram dem ngo ashédola bojéyape bottepe míísudung.

¹⁰Dekepe ila, Kristoke legape, ralmang pííram, gomkéé gommo, atung aréé, taronang, yényi dakso takamlo esaape míídung. Legade edílo ngo ralmang pííram dudí delomin ngo toldune.

¹¹Ngo agíe agísuem midepe mesuto, dekom nolumin ngom depe imotone. Ngom nolu yidpe nampe ituai, kapeila ngo loorí sirí madokom “Tomlíknam miro” kídílokke anyongkote rumkí yamang.

¹²Tomlíknampe kangkeng iyod sangod, irisinyo kídíem noluke gooralo donggap gedola lengkanto.

¹³Ngom murkong igul penam legape nolum ngo tebeg momang. Delokke kékonlo ingkona legalo nolum abíd mondoliem pemílo rumkí yana kísape imotune? Imem tumílo ngom maab toika!

¹⁴Si lengumnape ngo nolukelo aape emla leemodung; delokke ngo nolum tebeg momayé, kapeila ngo noluke atíem matamang, idakkom nolummin matadune. Arope pomílo, ome-ookídíe ane abuem mosaamang, idakkom ane abuemin ome-oo em usaa mosaadune.

¹⁵Depe iname ngo ngokke atí takamem bomsula delokke agísue ashépe nolukepe yépooyé. Ngokke ayange bojédung emlangía noluke ngom ayange asoyéne?

¹⁶Ngo nolum tebeg momang emnamdem nolu arue emdope. Depe idola, midor soyorna ami ngo, nolum yattonía?

¹⁷Ngokke melíknam ami konlok nolum ngo yattonía?

¹⁸Titonme nolukelo ngomin gídope potone delokke ngoluke bíruem bíkke lekope metak sutone. Titon bí nolum yadmangape, bí yatto namía? Ngolu aid atellok agér gérla bedang atelem matamanía?

¹⁹Nolukíng ngolu agísuem posiisuko bedalok podung emla nolu míítí tabu dunía? Kristokíng yédola Shédíke kangkor lokmin ngolu podungane, delokke angong kídía ngoluke inam atí takamde nolum edíí ludíng napemin itone.

²⁰Ngokke aayém ngo nolum ngokke míínampe paamape ipelo emnamde ngokke pesoname. Lumín manmín, nesu posu, akmín lumín, lupu lulum, luyéé luléé, posi porum, lukar mankar delokke apan aran ibosupelo emla ngo pesodung.

²¹Ngokke aayékuem ngokke Shédí bí ngom noluke keralo ansoope míísu moyéku, delokke kerape paab ina amikídí idola deemangem míílat suku mana, mime milo belum agér, isi sirumlo yéna amikídíe míílat aro sukumape ipelo emla ngo pesodung.