Read Alladian 2 KORINTH 13 Bible Online

2 KORINTH 13 - Alladian bible

2 KORINTH 13

¹So lengumnape nolum kaapat kape emla aadak. “Akpe géépe namko kayémílo, midum annyi demangkom angumko hakiie kaperung aido.”

²Ngokke nolukíng lennyinape duudo delo nolum ponoo subitobong. Ngokke duuyi masimte supak ngo potem dungku. Ngokke enlat yékuem kerape paab ina ami kídíem demangkom abídemkom séko mekom ngo mesammayé:

³Kapeila nolu Kristo bí ngokkíng duula agomem podung emnamdem porman matadung. Bí nolukelo yébo suduem ralmape imang, pauarem pakyape lengkan dunamino.

⁴Kapeila aropakpe luyém, bím ralmang kolokmin pansaatone, depe ilate bí Shédíke pauarlok turdung. Deke kísape ngolute bíkkíng ralmadung, idokom Shédíke pauarlok nolum iguldope emla bíkkíng duudung.

⁵Nolu míngkelo duududí dem agísue míngíng sukítoka. Ikaa darkaalo nolu ikum kosu mamílo, nolukíng Kristo Jisu bí duudung dem nolu kénsu manía?

⁶Delokke ngolu ikang darkaalo ikum kosu tomang emnamdem nolu mapa suyépe emla ngo míísudung.

⁷Supak nolu imem ikumayé emla ngo Shédíkíng kumdung. De ngolu ikaa darkangem tokang suto emnamde amie kaayépe emtímang idakla ngolu tokang sulamanakope iduakom nolu aina agérem géryépe emla míídung.

⁸Legade ngolu aruem ipéé sulamang, idakkom aro kootír legapemin idune.

⁹Ngolu edílo ralma pííram dudí delo ngolu ashédung idakkom noludan tolne; delokke ngoluke kumnamde arolok yéyépe emnam komin.

¹⁰Dekepe ilamin donggen dola sikesim ngo atdune, depe emnamde ngokke aayékuem nolum apan aran imomape idola nolum mosaa nana Ruutumke ngom binam ralnamem ngokke inakolok ngom géélat kumadope iname.

¹¹Méélam yalumpe bíro kídía, aipe duulangka. Aruem apíípe paapenam legape míírung bomlangka, ngokke roguem kén gap sulangka, aapí atelpe ilangka, míípo bosula yélangka. Delokke ayana Shédí delokke mííponame nolukíng duulangka.

¹²Akone akonem salam bibosula kaarík tarík sulangka.

¹³Míngkesuna takame buluke salamem bidung.

¹⁴Ruutum Jisu Kristoke yanggong elang, Shédíke ayange, delokke Deena Aidlokke leko bosuname nolukíng takamlo duumín daklangka.