Read Alladian 2 KORINTH 2 Bible Online

2 KORINTH 2 - Alladian bible

2 KORINTH 2

¹Dekepe ila ngo míídung lekoda ngo nolukíng gílangkula nolum adír molímang.

²Legade ngo nolum buulíng momílo, ngom sékoyang ashéng bosu penako kadun? Ngokke buumo namdía?

³Edílo ngo aayékudí, ngom ashéng monade ngom buulíng momadope emla sim ngo attung. Nolu takame ngokke ashéngem séébo suyékupe emla nolum ngokke míídíí sunamko kadung.

⁴Kapeila ngokke duuk ankí aapílok delokke miksie ebín idola, nolum buulímope emla imape ngokke eerína ayangem nolum lengkan sudola ngo sim attung.

⁵Akonem ibuu tumílo, nolum takam ibuunam kísape, ngom ibuumang, agom konpe luyém deddí pekai poban sumangkom aiyé.

⁶Dekena amide kebange leko irít tomílo bíkkepe aisukabong.

⁷Supak nolu bím maab langkula ngiitom langka, demamílo bí buubo supelo.

⁸Delok legape bím ayang yanggíngem yaabo sulang kuka emla nolum ngo rogudung.

⁹Nolu ikaa darkangem edíípe tokang sududí delokke takamem igela yédudí dem kangkí kénkí nape emlamin nolukíng sim attune.

¹⁰Nolu akonem maab bimílo, ngokom bím maab biyé. Delokke delo maab bipenamko kala ngo maab bitokom noluke legape Kristoke keralomin itone,

¹¹depe inamde Soitane ngolum yatman madope iname. Kapeila bíkke séguem ngolukom kénmape duumang.

¹²Edílo Troas amolo Kristoke Tatpona dooyingem pogongkape emla gítodí delo kaaname Ruutum bí ngom eyabem siyya bituai;

¹³Ngo supakkom míípoma teteng, kapeila ngo ngokke bíro Titonme delo paamato. Dekepe ila ngo bulu kelok bidai langgeyéla delokke Makedonialo gíto.

¹⁴Idakkom ngolum Kristoke ikumna opéélo gígebona delokke ngolukelok rego mipílo bíkke nampona kénnam aríem goojé mona Shédíme yidge daklangka.

¹⁵Nyokna kídí lolang turkuna kídí aralo ngolumin goobyakna Kristoke Shédíkíng biman sukunam nampona atí kísape idune.

¹⁶Akonlo ngoludan simopena aríe; akon kepedan turmopena nampone. Séko dekena agérem ruutum bomdun?

¹⁷Ami alume inam kísape Shédíke tatpona ngiitomem ngo pesi koret kísa mumpe imang. Dem megeyéla Kristokíng Shédíke keralo Shédí kelok melíknam ami kísape ngolu arolok jonnam pemin podune.