Read Alladian 2 KORINTH 3 Bible Online

2 KORINTH 3 - Alladian bible

2 KORINTH 3

¹Ngolu agísuem lekoda yidsu dungkunía? Demangkom ayokon ami kísape nolukíng mangkom nolukelok atlík ilík duamang emla míídunía?

²Nolu agísue ngoluke sithie, ngoluke aanglo atnam, mipilke kénname delokke poriname.

³Nolu Kristoke sithie, yébo dakbo namlokke rijale, siyayinglok atmape turna Shédíke Aidlok atname, lííbyanglo atmape tani aang líídulo atbiname, dem nolu kénsudung.

⁴Ngo sim podung kapeila ngolu Kristo kelok ila Shédíkelo míídíí sunamko kadung, idakkom ngoluke ila nanade Shédíkelok aane.

⁵Shédíke tolnam binam kékonlokke ngolu tolnam kadung emsu lamang;

⁶Ayonlok emmape Aidlok bí ngolum daapong anílokke yébo dakbonape iladope ruutung; kapeila ayonde petdung, Aide turmodung.

⁷Ayonem lííbyang teyolo kaabeng sudope attungai; delokke Shédíke angun ralname sim atdudelo aato. Mosike mingmo asire nyok nampe ido kulate Israel amikídí kepe si asir si séngééto, iname bulu buluke amige bíkkíng jonnampe kaasu lamato,

⁸demílo Aidlok yébo dakbo kunamdía pakyape ralnam angun bina angunpe imayéne?

⁹Taniem loobak mokuna agérete ralnam angun kadumílo, yéjii namem langaabona angun ralnamde edítko pakyadun!

¹⁰Kapeila kerangke angun ralname pakyana angunem luyii suyém supak angun ralnam kayimang.

¹¹Delokke nyokka kunade ralnam angun katomílo, duuyarpena ralnam angun si edítko botte yadun!

¹²Delok legape ngolu sikena mííbom name kadunade, ngolu miramdung.

¹³Asire nyoklang kula Israel ami kídíe kaapa yimadope emla gasor donkap suna Mosi kísape ngolu imang.

¹⁴Idakkom Israel ami kídíe aapí angkam geneke, kapeila silo melope aku daapongem poriyém donkap sunana gasorde duuduteteng. Sim langgé mato, kapeila Kristo kelokmin dem langgé dungkune.

¹⁵Silo melope Mosike legangem poriyém, buluke aangem gasore donkap tetedung.

¹⁶Idakkom séko edílo Ruutumkelo dakba dungkudí, gasorde nyokdungku.

¹⁷Ruutum bímin supak Aidde, delokke ingkolo Ruutumke Aidde duududí delo sadín kasudung.

¹⁸Delokrongem ngolu, mingmuem gasor donkap sumana kídíe Ruutumke angun ralnamem dungge sudung;[3] delokke de angun ralnamde, duuyar pena pakyana angun ralnamde bím gesukuna, Ruutumkelok aana Aidde.