Read Alladian 2 KORINTH 4 Bible Online

2 KORINTH 4 - Alladian bible

2 KORINTH 4

¹Delok legape sim agér sim ngolu Shédíke yaasamlok paala ngolu aange elugemang.

²Dekepe ila ngolu mesup sunam delokke annyiinam bedangem megeyéla; ngolu yadnam panamem iyimang delokke Shédíke agom emteng itummang. Dempenem aruem jonnampe lukandola ngolu agísuem Shédíke gooralo yébona amipe mipil keralo lengkan sudung.

³Delokke ngoluke dooying sim donkom tungkom nyokna kídí lega pemino donkom tune.

⁴Tani amosokke uyue Shédíme gesuna Kristoke dooying angunem kaapa madope emla míngke sumana aapí kídíem míímol sumodung.

⁵Kapeila ngolu agísuem pogong subimang, idakla Jisu Kristome Ruutume emlamin pogoodune delokke ngolu Jisuke legape noluke béérange.

⁶Legade, “Kaamolo angune ngunka langka” emna Shédí bí ngoluke aanglo angunem bitung. De angun ralnam kénnam angune.

⁷Idakkom si takamem ikumna pauar si ngolu kelok mang idola Shédí kelok aane emla lengkandope, aid kumsung kídí ngolu, kédenglok pínam kédeng peking kísa.

⁸Ngolum rego mipílok irééto, idakkom inyokmang; ngagoo sudope ito, idokom ingamang;

⁹iréé kosuto, idokom mepak sumang; demlet kosuto, idokom ikamang.

¹⁰Ngoluke amílso Jisume lengkan sudope, ngolu agínpe Jisuke sinamem gegoo sudung.

¹¹Legade bíkke turnamem ngoluke sipena amílso gekan sudope emla turdung adana ngolu agínpe Jisuke legape sipekolo melík sudung.

¹²Dekemílo sinamde ngolukíng agér gérdung, idola turnamde nolukíng agér gérdung.

¹³Sim sikepe attung: “Ngo arope míngke sudung, delok legape ngo podung.” Dekena míngkeng aapí atellok ngolute arope míngke sudung delokke delok legape podung,

¹⁴kapeila ngolu kéndung Ruutum Jisume kiirep kunade ngolumkom Jisuke lekope kiirepyéku delokke bíkke keralo ngolum noluke lekope duubo sumoyéku.

¹⁵Si takamsi noluke paab legapemin, depe emnamde ami kídílo bojé bojépe goobyakna yanggonge Shédíke angun ralnamlo yidgename biilendope inamko.

¹⁶Delok legape ngoluke aange elumang. Ngoluke adín yédue angín yayang iduakom, ngoluke aní yédue loodípe aní yayang idung.

¹⁷Legade ngoluke angun delokke adírname dem takam sépek yana, ngoluke paapenam duuyarna angun ralname píínín yayang idung.

¹⁸Dekepe iname kaasunamlo ngolu kaatísula duumape, kaapa manamlo kaatosula dung. Kapeila ingkuem kaapadudí de duuyar mane, idakkom kaapa manam demino duuyarne.