Read Alladian 2 KORINTH 6 Bible Online

2 KORINTH 6 - Alladian bible

2 KORINTH 6

¹Shédíke agérem gérbo sunape idola, nolum ngo podung, Shédíke yanggongem emmumpe laasam mapeka.

²Kapeila bí sikepe pobidung: “Torík sudo longem ngo nolum tatbito delokke turdíku longem ngo nolum igulto.” Ngo nolum podung, supakmin Shédíke torík sudíe, supakmin turdíku longe.

³Ngoluke agérem ibul madope ngolu akonke bedangem itummang.

⁴Dempenem Shédíke abílpe ngolu agísuem takam bedalo meyu sulíkdung;

⁵demkolo, pateklo delokke ebínkolo; ingéésuko agérlo, yuem ipyi mangkolo, delokke tíílíng kenokolo, donggap gedung;

⁶demamílo, tatkén namlo, jémgekolo delokke ayangkolo, Deena Aid delokke aro ayanglo melík sudung;

⁷aro agom pokolo delokke Shédíke pauarlo; lakbík lolang lakkélo yéjii nana tamtem bomdola

⁸angun ralnamlok delokke míngge manamlok, atímana ripode delokke aina pokunge; aro namíai idakla irunampe míngko suto;

⁹kénnamíai kénmanam kísape; sidungai, idola ngolu turdung; demkosuto idokom petmang;

¹⁰ankí kenue yagodung; opane, idolate mirem sudung; atí kamang, ilate takamem kasudung.

¹¹Korinthlo duuna ami kídía ngolu nolum popéé sumape podung, delokke ngoluke aange nolum jon ge bidung.

¹²Ngolu nolum iiga bosumape imang idakkom nolumin ngolum ayang penam emteng mepak sudune.

¹³Ngokke ome-oo kídíem ngo mííposula podung noluke aange bodong langka.

¹⁴Arope míngke sumana kídílo nolu gyabbo sumapeka. Kapeila yéjiinam delang delokke yémem namde ingkona gyapgíngko kadun? Demangkom ingkona lekonam atíko angunelang kaamue kabo sudune?

¹⁵Kristo bí Belialkíng[4] ingkona gyapgíngko kadun? Arope míngke sunade arope míngke sumana delo ingko gyapgíngko kabo sudune?

¹⁶Shédíke ekume uyu kumkedelo ingkona gyapgíngko kadune? Ngolumin turna Shédíke kumkeng ekume. Kapeila Shédí bí poto, “Ngo bulukíng duumín gela, bulukíng yémín geyé, delokke ngo buluke Shédípe ipe delo bulu ngokke amipe iyépe.”

¹⁷Delok legape, “Bulukelokke lenlangkula delokke angu langkula deemana atíem ukkí mapeka,

¹⁸delomin ngo nolum torík suyéne,” emla Ruutum bí podung. “Ngo nolu takamke Abupe ipe delokke nolu ngokke ome-oope iyé emla tolna ralna Ruutum bí podung.”