Read Alladian 2 KORINTH 7 Bible Online

2 KORINTH 7 - Alladian bible

2 KORINTH 7

¹Ngolu sim pébi sunamem paadunade, ayanam angong kídía, amíl emlang aidem belum mona takamem megeyéla, Shédíme pesodola aro deenamlok ngolu deesu langkuju.

²Noluke aangem ngolum bisutoka; ngolu séko meteng imem bosumang, ngolu séko meteng inyokmang, ngolu séko meteng ipu silummang.

³Ngo sim nolum lukaape lumang; ngo sim kerape podung, depe emnamde ngolu nolukíng turdokom lekope, sidokom lekope emnam aapíde nolu kelokom dung emla podung.

⁴Nolukíng ngo airupe mííte sudung; airupe mííyum sudung, airupe míídíísudung; ilate ngoluke adír asong takamlo ngokke ashénge ngatdung.

⁵Legade ngoluke Makedonialo aaduemte ngoluke amíl sim apéé momape idakla luyulo díínam moname delokke aralo pesue idope ngoluke yéko mipílo irééto.

⁶Idakkom mínggíp sunem míípo mokuna Shédí bí ngolum Titonke angkolok míípo motoku,

⁷delokke bíkke aanam petom lokmang idakla noluke bím míípodope inam lokkom ngolum míípo motoku. Bí noluke ngom míítí bomnamem, noluke eerípe bursu namem noluke ngom erappe ankínamem tatla ngokke ashénge kerang kempemílo shéduk yadope, ngolum lukan botoku.

⁸Ngokke sithilok nolum duuk motuakom, ngo dem míínyimang. Ngo míínyi tuakom ngo kaaname ngokke sithie noluke aapíem take motuakom, de takede ool doomang

⁹depe ilate supak ngo ashédungku, de nolum duuk moko lokmang, idakla noluke duuge nolum míílat sumotoku. Legade Shédíke míngkampe noluke buulínge ito delokke depe iname ngoluke inamde nolum atímadope emla imang.

¹⁰Aro bursude turpeko bedalo aadokupe míílat sumodungku, delokke míínyi míísonam kamoyimang, idakkom adínlok bursude sikolo gímodung.

¹¹Kaatoka Shédí bí noluke bursu kolok ingkuem bitun: si edítko nolum erap modune! Sikepe kangkiname! Sikepe ansuname, sikepe imemnem ingéé líname! Takam agomlo nolu sokke legalo imem kamape dengepe duune emla lengkan sudung.

¹²Depe ila ngo nolum attuakom, de imemna ami petom legape demangkom imemna opéé petom legape imang idakla dempenem Shédíke keralo edítko nolu ngolum míída sutuan, dem nolu agí agísue kaasu ladokupe emlamin itone.

¹³Si takam si ngolum ermodung. Ngoluk agí ernam teyolokom, edítko Titon bí ashéton, dem tatla ngolu mííyumsuto, kapeila bíkke aangem nolum takam iigape míísu moto.

¹⁴Noluke legangem ngo bíkkíng yidgesudo delokke nolu ngom annyi momang. Idakkom ngoluke ponam takamde arodung, depe iname Titonke keralo ngoluke nolum yidgenam delogei aruem gakdung.

¹⁵Nolu miríína mílí ila bím pesuem dan gedola yamrík namem bíkke popang bodokuem bíkke nolum iigape míísunam aapíde botte yadungku.

¹⁶Ngo ashédola podung, ngo nolum apíípe míídíísudung.