Read Alladian 2 KORINTH 9 Bible Online

2 KORINTH 9 - Alladian bible

2 KORINTH 9

¹Judialo Shédíke ami kídí legape igul melíknam legangem ngo nolum attí bima dokom aiyé.

²Legade, ngo noluke igulkolo erbom namem kéndung, delokke ngo nolum Makedonialo duuna ami kídíem yidsudung. Ngo “Akaialokke bíro kídíe mennying kelokke ila igulpe emla mííyin sudung” emla poto. Nolu ergename bulum alumkonem uttoku.

³Supak ngoluke nolum sok legape yidnamde agom asar petompe imadope emla mííru suyépe emla míídung.

⁴Kapeila Makedonia lokke ngokkíng akone píímílo delokke nolum míírung irung madope anmílo, ngolu nolum atíyang lumape ngolukíng míídíí sunamem ngolu annyii supelo.

⁵Dekepe ila kerape nolukíng ento gítosula delokke noluke dokang amanem bipe emla pébi sunamem iyin kaayin bodope emla ngo bíro kídíem pogíírupe políkdung. Demílomin de akone míngkidola binampe imape, bidarla binampe iyéne.

⁶Sim mínggap sulangka: Séko anyongope amliem siyyédí bí aliem anyongoko paayéku; delokke séko amliem bojépe siyyédí bí deddínako aliem paayéku.

⁷Mipile bigode idola, demangkom lulík kootírlok bimape, bíkke aanglo bipe emla mííyin sunam akorlok bipe aido, kapeila Shédí bí ashédola binam demmin aipe míídune.

⁸Delokke Shédí bí takam yanggongem nolum jémo ladung, delomin atí takamlo delokke moodí mipílo noluke agí katengem kasudola, aina agér takamem kanampe géryéne.

⁹Dem sikepe atbitung, “Bí mibolo yédola, opanem biguldung: Bíkke yéjiinamde agínpe duuyardung.”

¹⁰Supak séko nolum amli bidudí delokke dopenam ettíngem bidudí bí noluk mesiinam ali emte bojémoyé delokke yéjiinam ayémte jémoyé.

¹¹Noluke binam mipílo nolu bidarla bidope delokke noluke bidar namem ngolu kelok Shédíme yidgedope emla nolum bebak mipílo mirem moyé.

¹²Si noluke igul agér gérnamsi Shédíke tani kídíke pííramem ipíí binam petommang, idakla angu angu bedalok Shédíme yidgename asi kísa biilendo.

¹³Kapeila nolu agísue porman lengkan sunam agér sim Kristoke dooying agérlo améngope míísudola, beleng legape delokke noluke bulumlang abídem ankí kíbosunam legape amie Shédíme yidgela erkígeyé.

¹⁴Delokke bulu nolukepe kumduem buluke aange nolukelo pííyé, kapeila Shédí bí ikumna yanggongem nolum bitung.

¹⁵Shédíke puam yimanam aman legape bím yidgedung.