Read Alladian GALATIA 1 Bible Online

GALATIA 1 - Alladian bible

GALATIA 1

¹Tomlíknam Paul tanikelok imape, dekom Jisu Kristo keloklang bím sikolokke kiirepkuna Abu Shédí kelok melíknam

²delokke ngokkíng leko bosuna bíro kídíke, Galatia mondoli kídílo salame.

³Ngoluke Abu Shédí kelang Jisu Kristoke yanggong elang yéponame nolukíng duudaklangka.

⁴Bímin ngoluke Yayi Shédíke míngkampe ngolum silo melo aimana yépomlo yémadope emla, ngoluke paab legape agíem bipít sutone.

⁵Shédí kelo angun ralname agínpe duudak langka! Amen.

⁶Ngo nolum arí-anyope míngkai kapeila nolum Kristoke ayang gooralok tomkuna bím mepak sugeyéla angukon ngiitomlo nolu menarupe sangaadung.

⁷De angukon ngiitom aroko kala imang, idakkom nolum ebínmope emla delokke Kristoke ngiitomem ipat suyépe emla ineke kadung.

⁸Ngolu demangkom teyong lokke kotokie ngoluke pogoo tonam dooying dem megeyéla angukon dooyingko kape mílo, bím nyokyar pekolo nyoksu motoka.

⁹Ngoluke kerapekai potonam kísape, ngo supakteng lekoda podungku: noluke torík sutonam dooyingem lupat sula akone kígoonako kadumílo, bím nyokyar pekolo nyoksu motoka.

¹⁰Ngo supak tanike mííbang penam amiemía, Shédíke mííba namemía matadune? Demangkom ngo taniem mííyum sumope emlangía idune? Ngo taniem ashéyépe emla idung tetemílo, ngo Kristoke bééramang.

¹¹Bírokídía, ngokke pogootonam ngiitom dooying de tanilokke ngiitom dooying mangeke dem nolum ngo kénmope míídung.

¹²Ngo sim tanilok paamang, ngom poyilto emlate popeko kamang; dekom ngom Jisu Kristo agísue lengkan subi kolokmin paatone.

¹³Legade ngokke Judai amipe yédungem ngo kape kísa itodí dem nolu agíe tatsuto, edítko ngo Shédíke mondoliem itusiréé tone delokke línggoo tone.

¹⁴Ngo Judai dormo legangem ngokke siirum repet kídíem pemílo kényala, ngokke abukídí lokke yéruk dakruk akorem yagorupe ankídungai.

¹⁵Idakkom edílo ngom ane akii lokkekai leepeksuna delokke yanggo lok tomlenna Shédí bí ashéngkadí,

¹⁶delo bíkke Uem ngokkíng lengkan sumola, ngom Mipak kídílo ngiitom tatponem pogoodope luduem ngo sékokíte tatkí sumang,

¹⁷demangkom kera pekai Jirusalemlo duuna tomlíknam kídílote ngo gípete gímang, dekom ngo Arab amolo menape ensémto delokrongem Damaskalo enlattoku.

¹⁸Delokrongem tagumko doorongem ngo Jirusalemlo Pitorme[1] aipe kénbo sudope gíto, delokke looying kolang longoko duubosuto.

¹⁹Ngo tomlíknam abíd kídíem kaarík sumang, Ruutumke bíro Jems petomme kaato.

²⁰Ngo Shédíke keralo pobisudung, kaalangka ngokke nolum atnamsi memang.

²¹Méélamdem ngo Siria lolang Kilikialo gíto.

²²Kristo kelo duuna Judia mondoli kídíe ngom delo agíem kénmangada.

²³Bulu sikepe pokan binamem taddungai, “Kerape ngolum iréé sinyona amide supak bíkke inyok tope emla itonam míngkeng agomem pogoo dungku.”

²⁴Delo bulu ngokke legape Shédíme yidgeto.