Read Alladian GALATIA 2 Bible Online

GALATIA 2 - Alladian bible

GALATIA 2

¹Tagying kolang tagpiko doorongem, ngo Jirusalemlo Barnabame gíbosula gítoku. Titon mete lekope gíbosuto.

²Shédí bí ngom irisinyuem lengkan kolok ngo gíperung emla mííla gíto, mirokídí dumsukolo ngokke Mipak amikídílo pogoo tonam ngiitomem ngo pokanboto. Idakkom ngo sim miro kídípe kaasunam kídílo supnampe pogooto, kapeila ngokke dukdu yotoksula ibom sunamde emmumpe ítsamlok opelo emla mííto.

³Depe ilate ngokkíng yémínna Titon meteng Grik amipe idolate dínbíng iyod sudorupe emla imang.

⁴Si lega si sikepe ikai; medu yattokna bírueke mirupe ngoluke Kristokíng atel bosunam yégíísuem malenkape emla ngoluke gooralo aala, bulu ngolum abílpe ipe emla ruudung.

⁵Ngiitom lokke arue nolukelo apíípe duusudope emla bulum ngolu anyong kote tolíkmang.

⁶Idakkom ruutumpe kaanam kídí kepe ngo podung, bulu deke duakom ngokkepe lungu supe yanam kamang; kapeila Shédí bí dekena ruutum kídar demkom teyong akorpeelok mabommang.

⁷Dem megeyéla, ngiitomem Judai ami kídílo pogoodope Pitorme bitung emnam kísape ngomte Mipak kídílo ngiitomem[2] pogoonam agérem bitung emla bulu ngom kaato.

⁸Legade Judai ami kídí lokke tomlíknam amipe ina Pitorke agér gérkolo gérbosuna Shédíkom Mipak kídílo tomlíknam kísape agér gérdung.

⁹Jems, Pitor[3] delokke Joan, aane gaangpe míída sunam ruutum kídíe Shédí bí ngom sim agér sim apekrupe panbitung emla kénkai; depe iname bulu Barnaba melang ngome ngolu takam yébosuna ajone emla kangkepe alagem horíksuto. Ngolang Barnaba bí Mipak kídílo gídope emla tolík bosuto.

¹⁰Bulu takamke poname ngolu pííramna kídíem míípang bosupe aido, dem atídem ngo erappe ilíídung.

¹¹Edílo Pitor bí Antioklo píítodí, delo bíkke imemduem ngo bím agíem berokpe uksém bomto.

¹²Jems kelok amiko píímang adape bí Mipak amilo dobo tííbosuto. Idakkom edílo bulu píítodí, bí agíe ngéllat sulangkula Mipak kídí lokke dungu sulenkaku kapeila bí dínbíng iyod suna opéé kídarem pesoto.

¹³Judai ami ayokone bíkkíng imín gelangala iname buluke miru aapí lok Barnaba meteng sotlento.

¹⁴Edílo bulu aro ngiitom bedalok agér gérbomape inamem kaatodí ngo buluke takam keralo Kepha[4] me sipe luto: “No Judai amiko, depe idola no Mipak kísape yédung delokke Judai ami kísape yémang. Demílo kapeda no Mipak kídíem Judai amikídí yéyonem mata langka emla lulíkdune?”

¹⁵“Ngolu paabna Mipak” amipe imape, odo lokkekai Judai amipe ina si

¹⁶amiem ayon bomgappe kolok arokai emla sanmang, idakkom Jisu Kristome míngke lokmin arue emla sandune dem kéndung. Dekepe iname ayonem bomgap kolok emmape ngolumteng Kristokíng míngkelok arue emdokupe ngolukom ngoluke míngkengem Jisu Kristokíng melík sudung.

¹⁷Ngolu Kristokíng aro dokuamang emla míísunam delok kaadung ngolu takam paab gene, depe emdo emla Kristo bí paab imoto emyénía? Dekepe kamarung!

¹⁸Ngokke bénpak namem ngo morep sudung kumílo, demílo ngo agíe ayonem betsune.

¹⁹Kapeila ngo Shédíkíng turkupe emla ngo ayonlok lento delokke ayonloi nyoklíkto.

²⁰Ngom Kristokíng pettaksuto delokke turnamsi ngosumang idakla Kristomin ngokkíng duudune. Ngokke amílsok turnamsi ngok legape binyok sulíkna delokke ngom ayana, Shédíke Oo em míngke suko lokmin turdune.

²¹Ngo Shédíke yanggongem lenggé sumang, kapeila yéjiiname ayonlok katuamílo, demílo Kristoke sigenamde sisamyai!