Read Alladian GALATIA 3 Bible Online

GALATIA 3 - Alladian bible

GALATIA 3

¹Galatia mide kídía! Sékobulu nolum inompala yattune? Noluke agí amigpak keralo Jisu Kristome pansaadope kaasu tonía?

²Ngo nolukelok atíko kénpe míídung; Nolu ayonem ige kología Aidem paatone, demangkom noluke tattonamem arorupe míínam logía paadune?

³Nolu deddí pakpe mide dunía? Aidlok yélenrongem, supak nolu noluke ibomnamem tani yédu logía paape idune?

⁴Nolu atírung legang kamapía adír bomsudune? Atíko katorung!

⁵Nolu ayonem igeto emla demangkom noluke tatto namem arope míngkelok noluke aralo Shédí bí bíkke Aidem melíkla irisinyo agéreke gértonía?

⁶Abrahamme míngkítoka! “Bí Shédíme arope mííto, delokke dem bím yéjii nakope sannato.”

⁷Demílo séko bulu arope míídudí bulu Abrahamke ome-ookídíe, emla míísutoka.

⁸Shédí bí míngkelok Mipak kídíem deenape santo delokke Abrahamkíng kerapekai ngiitomem pokan bito dem Dooying kitabe: “Takam opíne nokkelok géryé” emla poto subitung.

⁹Dekemílo míngkesuna kídíe míngkesuna Abrahamke akampe gérbosuyé.

¹⁰Ayonlo míídasuna takamde gérmang kolo dung, legade sim sikepe attung: “Mosike ayon kitablo atbinam mipíem iyar gemana mipilde gérmang daklangka.”

¹¹Berokrupe, ayonlok Shédíke keralo séko meteng aronako emmang, kapeila “Yéjiinade míngkelok turla duuyé,”

¹²Ayonde míngkelo duumang; dempenem “Séko sikesim idudí bulu delok aralo duusuyé.”

¹³Kristo bí agíe ngoluke legape gérmang gela ayon aralo nyokku penam lokke ngolum relentoku; kapeila sim sikepe atbitung, “Esiilo paksulnam mipíde gérmane.”

¹⁴Aidlokke pébi sunamem míngkelok paado kupe delokke Abrahamme bitonam agamde Kristo kelok Mipak ami kídílo píídope emla bí ngolum relentoku.

¹⁵Bíro kídía, loodíke yéyi yésanglo luyii sunamko pobiso. Tani lokke luyin bosula tolík bosunam agomem kape kísa sékote inyok lamadudí delokke itumpete lamadudí, deke kísa sikom idung.

¹⁶Abraham kílang bíkke “Oten ome-oo kídílo” emmang, de milungem ludung, idakkom “Oten ome-oolo” emtua namino, depe emnamde midum atelko, de Kristo bí.

¹⁷Ngokke depe pobom namde si: Shédí bí Abrahamme daapong mobosuto delokke dem bomyar dope pébisuto. Dítag língko appi kolang tagying angum méélamlo ilennam ayonde dem daapong dem ipakmang delokke Shédíke pébisunamem inyok pete lamang.

¹⁸Kapeila Shédíke amande ayonlok idumílo demílo, de amande pébi sunamlok ikumang. Dekom Shédíke pébisunam aman demmin Abrahamme bitone.

¹⁹Demílo ayon lokke duubom namde ingkuedí? Imem agérem kaana tatna pemin itune delokke pébisunam Abrahamke otíng oyin delok aama tetengem dem duudope emlamin itune.

²⁰Pénsam amide opéé atel petom kemang, idola Shédí dan atele.

²¹Delok legape ayonde Shédíke pébi sunamem mirolpe ibosudunía? Berokpe depe imang! Legade taniem turnam bina ayonko paatuamílo, demílo yéjiinamde ayonlok lenyé rungai.

²²Idakkom Dooying kitabe podung tani among tabuu si paab lokke patek gooralo duuyindung, dekepe iname pébisunam amandem Jisume arope míngkesuna kídílo bidope itung.

²³Míngke lokke moodíe píímang adape, míngkengem ayone ngolum patek gooralo tumla meto.

²⁴Dekepe iname ngolum míngkelok deene emla sandope ayone ngolum Kristokelo[5] gíbo dungku.

²⁵Supak míngkenge angkai, ngolu ayon pegoolo duuyimang.

²⁶Jisu Kristokíng míngke sukolok nolu takam Shédíke oo tetenge,

²⁷legade nolu takam Kristokíng baptis isuna kídíe Kristoke gooralo dung.

²⁸Delo Judai demangkom Grik, abíl demangkom ruutum, milo demangkom mime, empe yanam kamang, kapeila nolu takam Kristokelo atele.

²⁹Nolu Kristo kemílo, nolu Abrahamke oten ome-ue, delokke pébisunam em yébom pena kídíe.