Read Alladian GALATIA 5 Bible Online

GALATIA 5 - Alladian bible

GALATIA 5

¹Yépo kupenam lega pemin Kristo bí ngolum tomlen tokune. Demílo edíípe duulangka, delokke lekoda nolu agísuem abíl bílko suku mapeka.

²Ngokke agomem mínggap gelangka! Ngo Paul agí nolum podung, nolu agísuem dínbíng iyod kosu kumílo, Kristo bí nolu kepe berok rupe atí are kamayé.

³Ngo iyodsuna mipíem lukan bidung, iyot sunade tabung ayonem mepakmape igerupe aiyé.

⁴Ayonlok aronako emla sanko sulína kídí nolu Kristome mepak dungku. No yanggong lokke mooteng kaku.

⁵Idola míngke sukolok ngolu ernam rupe aidlok yéjiinamem paayé emla míínamsula toyala dung.

⁶Legade Jisu Kristo kelo iyot sunam dekom atí kamang. Míngke sudakla ayanglok yénam petom demin sanpename.

⁷Nolu kampope yédungai. Kape kísa nolum nomtone?

⁸Dekepe yadnamde nolum tomlenna lokke mang.

⁹“Siiyé anyongode apong péérop apíngem duamodo.”

¹⁰Nolu angukon aapí gemayépe emla ngokke Ruutum kíng míídíí sunamko kadung. Deke ekelai, séko nolum míílal sumodudí, bí delokke ajéngem paasuyéku.

¹¹Bíro kídía, ngo dínbíng iyot legangem lubo teteng dulate ngom kapeila iréé réétí bomdune? Depe ido aruamílo krosslok ajéngem mepakyai.

¹²Ebínbona kídíemdan, bulu dekepe idan tetela agíem inyok suduamílo emla ngo míídung.

¹³Bíro kídía, nolum apítpe yédokupe emlamin tomtune. Depe idakkom noluke yénamem paab[7] agér ina kumapeka; dempenem akone akonem ayanglok igul bosulangka.

¹⁴Tabung ayone ngiitom atello aayindung: “Nokke kumrí dooríem agí akampe ayalangka.”

¹⁵Nolu luge poge bosula delokke rekmín suyomang imílo, kaalangka, nolu agísue akone akonem inyok bosuyé.

¹⁶Depe iname ngo podung, Aidlok yélangka; delo no paab amíl lokke míídongem ipíí tuamang emla míímayé.

¹⁷Kapeila adín lokke akorde Aid akorlo gyabmang, delokke Aid lokke deteng adín akorlo gyabmang. Bínyi akmín sudung depe iname no ingkuem ipe míídudí dem ila momang.

¹⁸Idakkom nolu Aidlok yédumílo, nolu ayon aralo duumang.

¹⁹Adín agérde kénsém name; abír ajon, deemang aamo, delokke míípu míílum;

²⁰mimang kumsunam, jari montrong, kangki tatki, lupat ipat, nesu posu, akmín lumín, mikit sorit, pekpan pekran, medu yattok,

²¹delokke nemín pamín, tíngír dobat, tíngír dobat sugeyéla miri sooman nam deke kísana takamde. Sikepe yéna kídíde edílokom Shédíke amongem duubom lamang; ngo sim nolum luruu bidung, kerapekom pobituai.

²²Idakkom Aidlokke ayéde ayang, ashéng, yépo, hakjém, kanggul igul, ainam, míngke sunam,

²³remel delokke agíem mosiisunam. Sikesim akpena ayon kamang.

²⁴Séko bulu Kristokelo duududí bulu paab aapí mííyi míísangem mepak sudung.

²⁵Ngolu Aidlo duurodem Aidlokke ledulo duulaju.

²⁶Ngolu míngkímsula, pogu puak bosula delokke nemín pamín bosula imajuka.