Read Alladian GALATIA 6 Bible Online

GALATIA 6 - Alladian bible

GALATIA 6

¹Bíro kídía, akonem paab imemdope kaayémílo, nolu aidlok yéna kídíe aiyope bím mosing tokuka. Idakkom agísuem ansulangka, demamílo nolukom imemkolo olíkpelo.

²Akone akon egedem gebo sulangka, demílomin Kristoke ayonem ipíí biyéne.

³Séko loorí madola agíem kekímrupe míísu dudí, bí agíem yadsudung.

⁴Mipile agí agérem kangkí kénkí supope aido. Demílomin agíke yidsu penam legangem matapene, dekom akonem luyiisula lupe aimang,

⁵legade mipile agí egedem gesupe aido.

⁶Akone luyil agomko paatumílo dem luyil agom dem aipe tatbo pobo superung aido.

⁷Yatko sumapeka: Shédíme luyéé luléélok lunyok lamang. Tanie ingkuem ngiilík replík sududí dem paasudoku.

⁸Séko paab akorlok paab agérem ashédope ngiilík replík dudí, bí nyokku pekolo ngiilík sula nyokdung; séko Aidlok, Aid agérem ngiilík replík dudí bí turyar peko bedangem paasuyéku.

⁹Ngolu aina agérem loobak mamílo, moodí arolo ngolu aliem paasuyéku.

¹⁰Delok legape, ngoluke idíe kadung adape, apekrupe míngkesuna ekum rarung kídí, takam amilo aina agérem ibosulape.

¹¹Kaatola ngokke agí alagrulok botte botte akorem atnam sim.

¹²Luyulok amiem kaayé tatyépe emla ina kídí emin nolum iyot suyérupe emla ití bomdune. Buluke legang atelko kadung, de bulu Kristoke kross legape iréénam em paapelo emlamin idune.

¹³Dínbíng iyodsuna deteng ayonem igemang; nolu iyodsukai emnamdem bulu bottepe míísudope emlamin bulu nolum depe mandune.

¹⁴Ngokke pedan, depe epekom, ngoluke Ruutum Jisu Kristoke kross legalo bottepe míísupe; kapeila sok kross sokmin tani amonge ngokkíng siliktone delokke ngote tani amoso sito emla kénsudune.

¹⁵Dínbíng iyod sunam dekom, iyot sumanam dekom atí sanpenam kamang, idakla anípe yékunam demino sanpenamde.

¹⁶Yéponame delokke yaasame Shédíke Israel kídílo peteng, sim ayon sim imín gena takamlo duudak langka.

¹⁷Luyinnape podung, sékoteng ngom adír momapeka, kapeila ngokke amíllo Jisuke rígéyem ngo gedung.

¹⁸Ngoluke Ruutum Jisu Kristoke yanggonge bíro kídí noluke aidlo duumín daklangka. Amén.