Read Alladian EPHESIA 2 Bible Online

EPHESIA 2 - Alladian bible

EPHESIA 2

¹Nolu kepedan, noluke imem kolok delokke paablok nolu situai.

²Dekepe idudelo nolu tani gíída sokke atímana bedanglok gítuai; tani amosokke ruutum míídulok, supakke Shédíme míngge mana amikídíem yébona aid yédulok yétuai.

³Ngolu takamkom longeko buluke aralo duula, paab séguem[4] erab bomla delokke paab alaglok yédungai. Abíd kísape, ngolu Shédíke aklíng gooralo anngéé suyai.

⁴Idakkom bí ngolum botterupe ayang kolok, yaasamlo miremna, Shédí bí,

⁵ngoluke yémem sukolo sidungemte Kristo kelok turdokupe itung yanggong lokmin nolum mosing tungkune.

⁶Delokrongem Kristokíng lekope ngolum kiirep tulang kula teyong yétalo Kristokíng lekope duubo sumo tungku.

⁷Bíkke depe inamde yépenam longelo apekrupe míngge penam botteruna yanggongem Kristokíng ayanglok lengkan nape emla ruuname.

⁸Kapeila si ayang gooralo, míngke lokmin, nolum turmo tokune delokke de noluke ilen sumanamko, de Shédíke bisamnam aman komin,

⁹de akone míngkím sunadope, agérlok paama namko.

¹⁰Legade ngolu Shédíke agér gérkenge, ngolukepe Kristokíng aina agérem géryépe emla Shédíke itosubi namko.

¹¹Delok legape, kénsutoka, agísuem “Dínbíng iyodsuna” kídíe nolu okorlokke mibue delokke “Dínbíng iyodsumane” emtuai, (de tani alaglok amílso iyod sulíkname).

¹²Kénsutoka, depe idodelo nolu Kristo kelokke angutuai; Israel amipe santak sumape delokke míínam subomnam kamape delokke tani gíídaso Shédíme kénmape, pébisunam daapong lokke mibope yétuai.

¹³Idakkom yétonam longem mooteng tuakom nolum Jisu Kristokíng supak bíkke iyyilok anínpe langaang tungku.

¹⁴Kapeila bí agíemin ngoluke yépokue, mííngu míírang míímo kumomane delokke mirupe daksékna suppiem bénpak kune.

¹⁵Bí Judai yédongem sok ngiitomru sok delokke ayonlok mepak botoku, depe emnamde, opín annyiem bíkkíng lekobosu moto langkula anípe yébo sumotoku, dekepe yéponam bedangem igebotoku.

¹⁶Bíkke krosslo sige kolok Kristo bí buluke mirol aapíem inyoktoku. Kross logei opín anyiem amíl atelkope idokupe idumsuto delokke bulum Shédíkelo langaatoku.

¹⁷Bí aala yéponam legangem mootelo duuna nolukíng pobito delokke mongélo duuna kídí loteng poboto.

¹⁸Kristo kelokmin ngolu takam, Judai dokom delokke Mipak dokom, Aid atellok Abuke keralo aala dungkune.

¹⁹Dekepe iname, nolu kangkí manam mibope iyimang, idakkom Shédíke amikídíe delokke Shédíme míngkesuna erang atele.

²⁰Nolukom, Tomlíknam delokke kaaluna miri kídíke díílíkla mosaanam moda sukeng líídunge, de líídudei Jisu bí.

²¹Bíkkímin ekum tabung lokke siimé daaré kídare dumsudune delokke Ruutum kelo moyin nam deena kumkeng ekumpe siirep dungkue.

²²Delokke bíkkímin nolukom Shédíke dungkepe Aidlok atel bosu dungkune.