Read Alladian EPHESIA 4 Bible Online

EPHESIA 4 - Alladian bible

EPHESIA 4

¹Ruutumke legape patek amipe idola, demílo tomlen namem noluke paatonam yénamem are kamolangka.

²Remagoope delokke remelope yélangka; ayanglok akone akonke egedem gebosula, jémgap bosu langka.

³Yéponam ayonlok Aidlo atelbosu penamem ralbo sulangka.

⁴Amíle atele, Aide atele nolum tomduem míídong atelkolo tomnam kísape

⁵Ruutum atel, míngkeng atel, baptis atel.

⁶Shédí atele delokke takam Abue. Bí takamke Ruutume, takamlok agér gérdung delokke takamlo duumíndung.

⁷Idakkom ngolum mipilem Kristoke orgonam yanggongem bitung.

⁸Delok legape sim sikepe podung: “Bíkke teyope saadak kuem, bí amieke yéboto delokke bulum amanem bito.”

⁹Supak “Bí saadakkuem” emnamde ingkuedí? Dekepe emnamde kerape amosokke rumkí yalumlo oyito.

¹⁰Oyina bíruumin tani gíídangem bííyin bomdo kupe emla takam teyong among emte kedon yana telo sangku nadekom.

¹¹Bímin ayokonem tomlíknam amipe ayokonem kaaluna miripe, ayokonem ngiitom lubinape delokke ayokonem palokpe delokke luyil bonape binade.

¹²Bíkke sikepe inamde, Kristoke amliem mosaadope, Shédíke ami takame Kristan agérem gérdope inamko.

¹³Dekepe iname ngolu takam dekena ngoluke míngkeng atello delokke ngoluke kénpenam Shédíke Oolo aadumsuyé. Ngolu kénbee suna amipe iyé, Kristoke aapí séguem paamínyé.

¹⁴Delo ngolu ojiipe iyimayé, sipyarlok nudu nutok kosuyimayé. Delokke delo asarlok yapgoo bomnam amipe delokke budii runa ami kídílokke ruudu ruutok ikepe iyimayé.

¹⁵Dempenem ayanglok aruem pobosula, ngoluke Dumpoope duuna Kristokíng atí takamlo ngolu siirep bosuyé.

¹⁶Bíkke pegong lomin amíl lokke ole mipíde idum sudungkune, delokke delo amíl lokke looteng loreng tabu sim apíí píílí dope ayang loge mipípe idope pílentune.

¹⁷Dekepe ila Ruutumke amínlok ngo nolum podung delokke pogap bidung, nolu Mipak ami kísape, edílokom kanííla yékumapeka.

¹⁸Buluke aapíde kaamolo dung, delokke Shédíke binam turnam yénamlokke mootedung kapeila bulu anyongkote tatpatmang delokke aapí aange edadung.

¹⁹Bulu annyii penam takamem menyoksuto; bulu agísuem atímana agérlo melíksula delokke angu angu atímana agér takamem igot kaimape idung.

²⁰Depe idokom nolu Kristome deke bedalok kénmang.

²¹Nolu bíkke legangem tattorung delokke Jisukíng duuna arolok nolum poyilto.

²²Noluke kerang yénamem menam yatnam aku aapíem mepak langkuka emla luyilto.

²³Noluke aapí ainange míímo sukupe aido,

²⁴delokke deenam delokke yéjiinam, Shédíke kísape pílennam, aro yénam aapí ainangem nolu berokpe gekupe aido.

²⁵Delok legape nolu mipile menam yadnamem mekurupe aido delokke akonke kumríem aruem pobosupe aido, kapeila ngolu takam amíl atellokke erang atele.

²⁶No marlíng dakkom imem imapeka. Nokke marlíngem doonyiem olup momapeka.

²⁷Uyuem aamo mapeka.

²⁸Pyoosi pyoorumna kídíe pyoosi pyoorum yimapeka; idakla agí alag rulok agér gérperung aido, delomin bí pííramna kídíem atíko bisu layéne.

²⁹Tatnyinam agomem lubo sumapeka, idakkom tatna kídíem aina agérem bidope, akonke pííram adulok igul bosupenam agomem pobo sulangka.

³⁰Delokke dorpít díku longe delok kepe nolukelo soktam tupket líknam Shédíke Deena Aidem buumo mapeka.

³¹Kangki ramki, aduk ak marlíng buulíng, ukmín lumín, lukaa luyéé, edoranam takam atímanem mepak bosu langkuka.

³²Akone akonem ayanglok igul bosula, ayang míípasula, Shédíke nolum Kristokíng maab kunam kísape maab bosulangka.