Read Alladian EPHESIA 5 Bible Online

EPHESIA 5 - Alladian bible

EPHESIA 5

¹Delok legape Shédíke ome-oo kísape, Shédíme kanggesuna tanipe yélangka.

²Kristo bí ngolum ayala delokke agísuem ngoluke legape Shédí kelo nampona amanpelang sobope binyok sunam kísape ayalok yénamem yélangka.

³Nolu Shédíke amipe ikuname, noluke aralo abír ajon demangkom kaaba tatba manam demangkom ato anyo inam agérem anyongkote mínpang kosupe aimang.

⁴Delokke irunam, gyapmanam lupo manmo demangkom jaknam panam agom lupe aimang, dempenem yidgenam petomem bompe aido.

⁵Nolu sim kénmape imaruyé; abír ajon, belum bekamna demangkom yagope kaabonade mimang kumsune, bulu Shédí kelang delokke Kristoke[6] teyong among yétem tarong paamín gemayé.

⁶Séko meteng nolu are kamana agomlok yatko sumapeka, kapeila sikena atílokmin Shédíme míngge mana ami kídíem Shédí bí aklídune.

⁷Delok legape bulum yébo dakbo sumapeka.

⁸Legade nolu kaamolo duutuai, idakkom supak nolu Ruutumkíng angundung. Angun lokke ome-oope yélangka;

⁹kapeila angun lokke ayédelo yéjiiname, arue, takam ainame dung.

¹⁰Ingkue Ruutumme mííyum sumodudí dem mata langka.

¹¹Are kamana ruak agérem mata mapeka, idakla bulum pobeng bilangka.

¹²Kapeila Shédíme míngge mana amie supnampe inamem popang emteng annyii sudung.

¹³Idakkom angunlo lokan sunam mipíde dem kaabe modung,

¹⁴kapeila angun demin takam atíem kaabeng modune. Dekepe ila sim sikepe podung: “Ipna no darngo sutolangku, sikolokke darep tolangku, delo Kristo bí nolum angunem biyé.”

¹⁵Demílo kape kísa nolu yédun akor kamana kísape imape, idakla milo aro kísape kape yédudí aipakpe ansutola.

¹⁶Aina moodíem aina agérlo gérlík langka kapeila longe kídí si atí yimang.

¹⁷Delok legape midepe inge sumapeka, idakkom Ruutumke mííname ingkuedí dem kénlangka.

¹⁸Apong tíngír sumapeka, de nyokpekolo gíbodung. Dempenem Aidlok apíípe yélangka.

¹⁹Akone akonem yidnam kumnam agomlok, kumnam mirilok, deena mirilok lula lupuem pobo sulangka. Ruutumme aapí aanglo yidgenam miriem lubo sulangka;

²⁰Agínpe Abu Shédíme atí takamlo ngoluke Ruutum Jisu Kristoke amínlok yidge langka.

²¹Kristome pesodola akone akonlo gyabbo sulangka.

²²Méng kídía, Ruutumme inam kísape noluke milo kídíem kom gyabbo sulangka.

²³Kapeila Kristo bí mondoli lokke dumponge, de bíkke amílsue, delokke dem mopítne, deke kísa milode méng lokke dumponge.

²⁴Supak mondolie Kristokíng gyabbo sunam kísape takam legalo méng kídíe buluke agí milolo gyabbo supe aido.

²⁵Milokídía, Kristoke mondoliem ayala delokke agíem sokke legape bisunam kísape, noluke méng emkom ayalangka.

²⁶Bí sim asilo arbínla deedo kupe[7] igeyéla, bíkke agomlok mondoliem Shédíkelo melík dokupe emla ito.

²⁷Depe inamde mondoliem kaaba rudope deenampe delokke imem kamadope bíkkíng melík sudokupe inamko.

²⁸Dekepakpe agí amílem ayasunam kísape milokídíe agí méng kídíemkom ayape aido. Séko agí méngem ayadudí bí agí emkom ayasudung.

²⁹Bodumpe lumílo, sékoteng agí adínem belumsuna kamang, dempenem, Kristoke mondoliem inam kísape bí agíem usaa mosaa sudung

³⁰kapeila ngolu bíkke amíl lokke tarong kone.

³¹Sok legalok “Milue agí ane abuem megeyéla bíkke ménglo lekobosu yéku, delokke annyide adín atelpe iyéku,”

³²Si míípíng manam arue idakkom ngo Kristo kelang mondoli legang emmin podune.

³³Depe idokom nolu mipile bí agíem ayasunam kísape agí méngem ayaru supe aido; delokke mééde agí miluem míngge supe aido.