Read Alladian EPHESIA 6 Bible Online

EPHESIA 6 - Alladian bible

EPHESIA 6

¹Ome oo kídía, noluke ane abuem Ruutum kelo kaadola míngge langka, demino ainame.

²“Nokke ane abuem míngge langka” emnamde kera yalumpe pébisunam ngiitome.

³“Demílomin nolu aipe yéyéne delokke tani amoso duute yéne.”

⁴Abu kídía, noluke ome-oo kídíem buumo mapeka, dempenem bulum kényil kaayil sumotoka delokke Ruutumke ngiitomlok luyilla sisaa motoka.

⁵Abíl kídía, noluke tani amosokke ruutum kídíem Kristome igenam kísape, aro aapílok mínggedola peso langka.

⁶Dem bulu kaalík suyépe emla kangko tatko petomlo imape, idakla Kristoke abíl kísape, noluke aapí ainalok Shédíke míngkampe ilangka.

⁷Taniem imape, Ruutumme igulnam kísape, aapíem apíípe bisula agérem gérlangka,

⁸kapeila Ruutum bí mipilem abíl dakkom, ruutum dakkom bí aina agér gérnadem amanem bisuyéku.

⁹Delokrongem, ruutum kídí nolukom noluke abíl kídíem dekepe ilangka. Bulum morít irítlok imapeka, kapeila teyolo duuna Shédíkelo nolu kelang buluke ruutum keralo kaaba mííba yaanam agom kamang dem nolu kéndung.

¹⁰Luyinnape pobidung Ruutum kelo delokke bíkke tolnarung ralnamlo edíírupe duulangka.

¹¹Nolu uyuem ikí suladope Shédíke mimag sérangem apíípe getoka.

¹²Legade ngoluke imín sunamde taniem imang, idakkom yébona ruutum kídí, ilanana tolnam ralnam, tani among sokke kaamo ruaklokke pauar delokke teyong yétalo uyu miru aid aimana kídí emmin imín sudune.

¹³Delok legape supak Shédíke mimak sérang tabungem getoka! Demílomin, edílo atímana longe pííyédí, delo mibo miru kídíem nolu tolya sulayéne, delokke mongéé mínsu rongemte, nolu amolo turasula dakyé tetene.

¹⁴Demílo, aruem ugílo uugpe gedola, yéjiinam nambíem gela dakka sulangka,

¹⁵delokke yépomona tatpona dooyingem pogoonape aleso leyukpe píllíksula edíípe dakka sulangka.

¹⁶Sok takamke teyolo, atímana lokke meyo dorna yongmuem momit ladope míngkengem tamtepe bomgap langka.

¹⁷Turnamem luprope gela delokke Shédíke agomem aid yoksape bomlangka.

¹⁸Delokke takam atí atí kumpenamem delokke roguem Aidlok kumbo sutoka. Sim aapílo gedola, orol langka delokke agínpe Shédíke ami takam legape kumyar bosu langka.

¹⁹Ngokke polenpe iyém Shédí bí ngom ngiitomem bidope ngokke legang peteng kumbi langka, demílomin ngo mirampe míípí manam ngiitomem kéndope ilayéne,

²⁰kapeila ngiitom legape ngo íkolilok yéénam migule. Ngokke pope namem berokpe pogot madope kumbilangka.

²¹Ayanam bíro delokke Ruutum kelo míngkesuna béérang Tukik, ngo kape idudí dem legang takam dem nolu kéndope bí nolum pokan boyé.

²²Bí nolum edíí podíng bodope delokke ngolu kape duududí dem nolu kéndope ngo bím nolukíng sok legape melíkdung.

²³Yéponame delokke Abu Shédí kelang Ruutum Jisu Kristoke míngkeng elang ayange bíro kídílo duumín daklangka.

²⁴Ooyimana ayalok ngoluke Ruutum Jisu Kristome ayana takamlo yanggonge duudak langka.